قازاق عالىمدارى زاعيپ جانداردىڭ كورۋىنە كومەكتەسەتىن ەرەكشە اپپارات جاساپ شىعاردى

None
None
نۇر-سۇلتان. قازاقپارات - «بولاشاق» باعدارلاماسىنىڭ تۇلەكتەرى ءابدىلدا شامەنوۆ پەن نۇربەك ەڭسەبايەۆ ونەرتاپقىش عالىمجان عابدرەشوۆپەن بىرلەسىپ، كوزى ناشار كورەتىن جانە زاعيپ جانداردى قولداۋ ماقساتىندا «SEZUAL» ستارتاپىن ىسكە قوستى.

ولار توپ مۇشەلەرىمەن بىرلەسە بۇگىنگى تاڭدا الەمدە بالاماسى جوق بىرەگەي قۇرىلعىنى وندىرىسكە ەنگىزۋمەن اينالىسىپ جاتىر، دەپ حابارلايدى قازاقپارات ءتىلشىسى.

«بولاشاق» باعدارلاماسىنىڭ ارقاسىندا تەحنولوگيالىق يننوۆاتسيالار سالاسىنداعى ەڭ باتىل يدەيالاردى جۇزەگە اسىرۋعا مۇمكىندىك الدىم. «SEZUAL» اتتى جوبامىز ناشار كورەتىن جانە زاعيپ جاندارعا وسى الەمدى كورۋگە مۇمكىندىك بەرەدى»، - دەيدى نۇربەك ەڭسەبايەۆ.

ونىڭ ايتۋىنشا، اتالعان دەۆايستى جاپپاي قولدانىسقا ەنگىزۋ زاعيپ ادامداردى جۇمىسقا قابىلەتتى ەتىپ، ولاردىڭ قوعام دامۋىنا قانداي دا ءبىر ۇلەس قوسۋىنا مۇمكىندىك بەرەدى.

«SEZUAL» - بۇل زاعيپ ادامدارعا ارنالعان كومەكشى قۇرىلعى. ول كوزى ناشار كورەتىن جانە زاعيپ جاندارعا باسقا ادامنىڭ كومەگىنسىز جۇرۋگە مۇمكىندىك بەرەدى. قۇرىلعى بەلگىلى ءبىر شەرتۋ قيمىلدارىنىڭ كومەگىمەن قورشاعان ورتاداعى نىساندارمەن جوعارى يمپۋلس ارقىلى بايلانىس ورناتادى. ناتيجەسىندە اينالاداعى زاتتاردىڭ ءپىشىنى، ماتەريالى، ولارعا دەيىنگى قاشىقتىق جانە قوزعالىس باعىتى تۋرالى اقپارات تۇسەدى. مەدالون ءپىشىندى قۇرىلعىنى جاساپ شىعارۋعا 3 -جىلعا جۋىق ۋاقىت جۇمسالعان.

«تيفلواپپاراتتى جاساۋ - ونەرتاپقىش جانە ءبىزدىڭ كوماندانىڭ يدەيالىق شابىتتاندىرۋشىسى عالىمجان عابدرەشوۆتىڭ يدەياسى. العاشىندا ديەۆايس وتە اۋىر بولعان ەدى. كەيىن قۇرىلعى ودان ءارى جەتىلدىرىلىپ، فۋنكتسيونالى كەڭەيتىلدى. اپپاراتتىڭ سىرتقى ديزاينى ازەربايجاننان كەلگەن كوزى ناشار كورەتىن جانە زاعيپ بالالار دەلەگاتسياسىنىڭ ءوتىنىشى بويىنشا وزگەرتىلدى. بالالار اپپاراتقا «مارۆەل» كوميكستەر سەرياسىنىڭ كەيىپكەرى توني ستاركتىڭ جۇرەك ءپىشىنىن بەرۋدى سۇرادى»، - دەيدى «بولاشاق» باعدارلاماسىنىڭ تۇلەگى.

دەۆايستىڭ اپروباتسياسى 2017 -جىلى باستالدى. ءوز كەزەگىندە 20 ادام قۇرىلعىنى تەكسەرىپ كورۋگە نيەت ءبىلدىردى. اپپاراتتى العاشقىلاردىڭ ءبىرى بولىپ 16 جاسىندا كورۋ قابىلەتىنەن تولىق ايىرىلعان الماتى قالاسىنىڭ تۇرعىنى جازيرا مولكىبەكوۆا سىناپ كوردى. قۇرىلعىنىڭ ارقاسىندا ول كەڭىستىكتە وڭاي باعىت الىپ، جۇرە الادى. ءسويتىپ، قۇرىلعىنى قولدانا باستاعاننان كەيىن 5 كۇن وتكەن سوڭ ج. مولكىبەكوۆا ۆەلوسيپەدپەن جۇرە باستادى.

«SEZUAL» اپپاراتى 30 جىلدان استام ۋاقىت تيفلوقۇرىلعىلارمەن جۇمىس ىستەپ كەلە جاتقان فرانسۋزدىق «CECIAA» كومپانياسىنا تانىستىرىلعانىن ايتا كەتكەن ءجون. ناتيجەسىندە زاعيپ جاندارعا ارنالعان بۇل قۇرىلعىنىڭ جاڭاشىلدىق ەكەنى راستالىپ، فرانسۋزدىق ساراپشىلار تاراپىنان وڭ باعا بەرىلدى. ونەرتاپقىشتاردىڭ ايتۋىنشا، ەگەر دەۆايس قازاقستاندا وندىرىلەتىن بولسا، اپپاراتتى ۇيرەتۋمەن قوسا العانداعى الدىن الا قۇنى شامامەن 3000 دوللار بولۋى مۇمكىن.

ال اپپارات شەتەلدە وندىرىلەتىن بولسا، قۇنى ايتارلىقتاي ارتا تۇسپەك. ازىرلەۋشىلەر اپپاراتتى جەتىلدىرە ءتۇسۋ جوسپارىمەن ءبولىستى.

«مەن ادامداردىڭ ءومىر ساپاسىن وزگەرتەتىن جوبالارعا ۇنەمى قىزىعۋشىلىق تانىتامىن. ءبىزدىڭ ۇجىمنىڭ باستى ماقساتى - ناشار كورەتىن جانە زاعيپ جاندارعا تولىققاندى ءومىر سۇرۋگە مۇمكىندىك بەرۋ. قازىر كوماندامىزدا 10 ادام بار، اپپاراتتاردى وندىرىسكە شىعارۋ بويىنشا مەملەكەتپەن ىنتىماقتاستىقتا جۇمىس ىستەۋگە دايىنبىز»، - دەپ اتاپ ءوتتى مانچەستەر ۋنيۆەرسيتەتىنىڭ «يننوۆاتسيالار مەن كاسىپكەرلىكتى باسقارۋ» ماگيستراتۋرا باعدارلاماسىنىڭ تۇلەگى ءابدىلدا شامەنوۆ.

ءابدىلدا كومپانيانىڭ ينۆەستيتسيالىق ساياساتىمەن جانە ءتۇرلى يۋريسديكتسيالاردا ونەرتابىستى پاتەنتتەۋ ماسەلەلەرىمەن اينالىسادى. قازاقستاندىق دەۆايس 18 ايعا جارامدى الدىن الا پاتەنتكە يە بولدى. 2017 -جىلى جۇمىس توبى دۇنيەجۇزىلىك بانكتىڭ ءونىمدى يننوۆاتسيالاردى ىنتالاندىرۋ جوباسى شەڭبەرىندە گرانت جەڭىپ الىپ، نازاربايەۆ ۋنيۆەرسيتەتىندە اكسەلەراتسيا باعدارلاماسىنان ءوتتى جانە «Astana Hub» رەزيدەنسياسىنىڭ ارقاسىندا سالىق پرەفەرەنسيالارىن يەلەندى.

اۆتور: بالنۇر قوجاگەلدى

سوڭعى جاڭالىقتار