ەلباسى ءابۋ-دابيدىڭ تاق مۇراگەرىمەن تەلەفون ارقىلى سويلەستى
اڭگىمە بارىسىندا ەلباسى مەن ءابۋ-دابيدىڭ تاق مۇراگەرى قازاقستان رەسپۋبليكاسى مەن بىرىككەن اراب امىرلىكتەرى اراسىنداعى ءداستۇرلى دوستىق قارىم-قاتىناستاردىڭ قارقىندى دامىپ كەلە جاتقانىن ەرەكشە اتاپ ءوتتى.
وسى ورايدا نۇرسۇلتان نازاربايەۆ پەن شەيح مۇحاممەد بەن زايد ءال ناھايان جۋىردا قازاقستان رەسپۋبليكاسىنىڭ پرەمەر-ءمينيسترى اسقار ماميننىڭ ءابۋ-دابي قالاسىنا جاساعان جۇمىس ساپارىنىڭ ناتيجەلەرىنە نازار اۋداردى. ساپار اياسىندا قازاقستاندا ونەركاسىپ، اۋىل شارۋاشىلىعى، ەنەرگەتيكا، مۇناي حيمياسى جانە فارماتسيەۆتيكا سياقتى سالالاردا جاڭا ينۆەستيسيالىق جوبالاردى ىسكە اسىرۋ تۋرالى ۇكىمەتارالىق قۇجاتقا قول قويىلعان بولاتىن.
سونداي-اق تاراپتار قازىرگى ۋاقىتتا قالالىق جانە تۋريستىك ينفراقۇرىلىمنىڭ اۋقىمدى قۇرىلىسى ءجۇرىپ جاتقان تۇركىستاندى قايتا تۇلەتۋ تاقىرىبىنا توقتالدى. سوڭىندا ەلباسى مەن ءابۋ- دابيدىڭ تاق مۇراگەرى باۋىرلاس ەكى مەملەكەت اراسىنداعى ىنتىماقتاستىقتىڭ ودان ءارى تەرەڭدەيتىنىنە جانە كەڭەيە تۇسەتىنىنە سەنىم ءبىلدىردى.