ورالدا اعايىندى ۇشەم وتان الدىنداعى اسكەري بورىشىن وتەپ ءجۇر
بۇل جايىندا ۇلتتىق ۇلاننىڭ «باتىس» وڭىرلىك قولباسشىلىعىنا سىلتەمە جاساپ قازاقپارات حابارلايدى.
18 جاسار ۇشەم اقارىس، بەكارىس جانە جانارىس زەككەنوۆتەر وسى جىلدىڭ كوكتەمىندە قۇقىقتىق ءتارتىپ اسكەرىنىڭ قاتارىنا شاقىرىلعان. اعايىندى زەككەنوۆتەر دۇنيە ەسىگىن اشقالى بەرى ءارقاشان بىرگە. «بولاشاق» اكادەمياسىنىڭ كوللەدجىن «سۋ كولىگىن پايدالانۋ» ماماندىعى بويىنشا بىتىرگەننەن كەيىن بالالاردى مەرزىمدى قىزمەتكە شاقىرعان. سول كەزدە دە ولار اجىراتپاۋدى وتىنگەن. وعان جەرگىلىكتى قورعانىس ىستەر دەپارتامەنتى قول ۇشىن سوزىپ، ءبىر اسكەري بولىمگە جىبەردى. ۇشەم پسيحولوگيالىق تەست تاپسىرعان كەزدە ولاردىڭ ءتۇر-الپەتى ءبىر- بىرىنە سايكەس كەلدى. اعايىندىلاردىڭ وزدەرى بۇعان ۇيرەنىپ قالعان.
«الايدا ءبىر ايىرماشىلىق بار: اقارىستىڭ بويى ەكى باۋىرىنان ءتورت سانتيمەترگە ۇزىن - 178 بولسا، بەكارىس پەن جانارىستىڭ بويى - 174 سانتيمەتر. الايدا بۇل اعايىندىلاردىڭ دەنە شىنىقتىرۋدا بىردەي ناتيجە كورسەتۋىنە كەدەرگى كەلتىرمەيدى. ولار اسكەرگە دايىندالۋ بارىسىندا ارنايى سپورتپەن شۇعىلدانىپ، 100 م جانە 3 شاقىرىمعا جۇگىرۋدە جانە بەل تەمىر تارتىلۋدا بىردەي كورسەتكىش كورسەتتى. ۇشەۋى دە سپورتپەن اينالىسادى. اقارىس پەن بەكارىس توعىز جاسىنان باستاپ «كاراتە-دو» سپورت سەكتسياسىنا قاتىسقان. سول ۋاقىت ىشىندە اعايىندىلار «كاراتە- دو» بويىنشا وبلىستىق جانە قالالىق سپورت تۋرنيرلەرىنە قاتىسىپ، بىرنەشە رەت جۇلدەلى ورىندارعا يە بولدى. ال جانارىس سامبو كۇرەسىنەن سپورت شەبەرىنىڭ كانديداتى اتاندى» دەپ ءمالىم ەتتى «باتىس» وڭىرلىك قولباسشىلىعى باسپا ءسوز قىزمەتىنىڭ جەتەكشىسى، پودپولكوۆنيك ەربولات سۇلتانوۆ.
ايتا كەتەيىك، 5517 اسكەري بولىمىندە ۇشەمنىڭ اسكەرگە شاقىرىلۋ جاعدايى ەشقاشان بولماعان. «قۇقىق ءتارتىبى اسكەرىندە قىزمەت ەتكەنىمدى ماقتان تۇتامىن. سەبەبى، ۇلتتىق ۇلان قاتارىندا قىزمەت ەتۋ، ومىردە لايىقتى ورنىڭدى تابۋعا كومەكتەسەتىن بارلىق زاماناۋي جاعدايلارعا يە بولۋ - ەل پرەزيدەنتىنىڭ جاستارعا قامقورلىعىنىڭ ناتيجەسى»، - دەيدى بەكارىس زەككەنوۆ.
«ۇلتتىق ۇلان اسكەرلەرىنە مەرزىمدى قىزمەتكە قازىر شىنىمەن دە ۇزدىك جاستار كەلەدى، - دەيدى 5517 اسكەري ءبولىمى باتالون كومانديرىنىڭ تاربيە جانە الەۋمەتتىك- قۇقىقتىق جۇمىستار جونىندەگى ورىنباسارى، كاپيتان دامير جاكەنوۆ.
- جاۋاپتى، ساۋاتتى، رۋحى مەن دەنەسى مىقتى، مورالدىق تۇرعىدان شىنىققان. ويتكەنى، قىسقا مەرزىم ىشىندە ءبىز ولاردى ناعىز وتان قورعاۋشى ەتىپ دايىنداپ شىعارۋىمىز كەرەك. مەنىڭ تاجىريبەمدە اعايىندى ۇشەمنىڭ مەرزىمدى اسكەري قىزمەت وتكەرۋى - ءبىرىنشى جاعداي. بۇعان دەيىن تەك ەگىزدەردى كورگەنمىن. قازىر اعايىندى ۇشەم ورال قالاسىندا قوعامدىق ءتارتىپتى جانە قوعامدىق قاۋىپسىزدىكتى قورعاۋ قىزمەتىن ءمىنسىز، ابىرويمەن اتقارىپ كەلەدى».
وتان الدىنداعى اسكەري بورىشىن اياقتاعاننان كەيىن اعايىندى زەككەنوۆتەر تۋعان قالاسى اقتاۋعا ورالادى. سودان كەيىن ولار جوعارى ءبىلىم الىپ، زاڭگەر ماماندىعىن مەڭگەرۋدى، ىشكى ىستەر ورگاندارىنا جۇمىسقا ورنالاسۋدى جوسپارلاپ وتىر.
اۆتور: اياۋلىم التىنبەك