قىتايمەن شەكاراداعى جۇك كولىكتەرى ەندى تولىقتاي ەلەكتروندى كەزەككە قويىلادى
جىل باسىنان بەرى پانفيلوۆ اۋدانىنداعى «Nur joly» بەكەتىندە جۇك كولىكتەرىنىڭ كەپتەلىسى ازايار ەمەس. وعان سەبەپ بۇعان دەيىن حابارلاعانىمىزداي قىتاي تاراپى بىزدەن باراتىن جۇك كولىكتەرىن قابىلداۋ سانىن شەكتەۋىنە بايلانىستى. ءارى كەتسە كۇنىنە 50 شاقتى جۇك كولىكتەرىن قاتاڭ سانيتارلىق تالاپتارمەن قابىلداپ جاتقان قىتاي ەلىمەن بۇعان دەيىن دە بۇل ماسەلە تالقىلانعان. الايدا پاندەميا بارلىعىنا كەدەرگى كەلتىرۋدە. قازىرگى ۋاقىتتا جۇك كولىكتەرى جول بويىندە ەمەس، «قۇرعاق پورت» ايماعىندا ارنايى تۇراقتاردا تۇر.
كەزەك ءتىزىمى بەكىتىلىپ، سول بويىنشا جۇك كولىكتەرى بىرتىندەپ وتكىزىلۋدە.
«بۇل ماسەلە جىل باسىنان تۋىنداپ كەلەدى. ءبىز ءوز تاراپىمىزدان بارلىق مۇمكىندىكتى جاساپ جاتىرمىز. سول ءۇشىن شتاب قۇردىق. جۇرگىزۋشىلەردىڭ جاعدايىن، كەزەگىن تالقىلايمىز. بارلىعىن شەشۋ ءۇشىن جۇمىس جۇرگىزۋدەمىز. ءتىزىم بويىنشا جاسالعان وسى كەزەك اياقتالۋعا جاقىن. سوسىن كەزەك ارنايى سايت ارقىلى ەلەكتروندى كەزەكپەن جۇرەدى. كەزەكتەن قالىپ قالعان، قۇجاتى دۇرىس بولماي قالعان جۇك كولىكتەرىن نەگىزگى كەزەك بىتكەسىن ولاردى كەزەككە قويىپ، وتكىزۋگە كومەك جاسايمىز»، - دەدى پانفيلوۆ اۋدانىنىڭ اكىمى تالعات ومىراليەۆ.
قازىرگى ۋاقىتتا 400 دەن استام جۇك كولىگى كەزەگىن كۇتىپ تۇر. ەندىگى كەزەك gocargo.kz سايتى ارقى جۇرگىزىلەدى. بۇل كەزەكپەن «Euro Transit» ج ش س اينالىساتىن بولادى. جۇرگىزۋشىلەر كەزەگىن ونلاين تۇردە قاشان كىرەتىنىنە دەيىن باقىلاپ وتىراتىن بولادى، - دەگەن اۋدان باسشىسى كەڭەيتىلگەن شتاب وتىرىسىندا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇمابايەۆقا جۇرگىزۋشىلەر شاعىمى نەگىزىندە تەكسەرىس جۇمىستارىن جۇرگىزۋدى ۇسىندى.
اۆتور: سامال قابىشەۆا