شىعىس قازاقستاندا ەرتەڭنەن باستاپ ءبىرقاتار شەكتەۋ ەنگىزىلمەك

قازاقپارات - شىعىس قازاقستان وبلىسىندا 17- 31 قازان ارالىعىندا ءبىرقاتار شەكتەۋ ەنگىزىلەدى، دەپ حابارلايدى قازاقپارات ءتىلشىسى.

ش ق و باس سانيتارلىق دارىگەرىنىڭ ورىنباسارى گ. تاعايەۆانىڭ كوروناۆيرۋس ينفەكتسياسىنىڭ الدىن الۋ شارالارىن كۇشەيتۋ تۋرالى قاۋلىسىندا وسكەمەن، سەمەي، ريددەر، كۋرچاتوۆ قالالارىنىڭ جانە وبلىس اۋداندارىنىڭ پەريمەترى بويىنشا شەكتەۋ شارالارىنىڭ شەكاراسىن ساقتاۋ قاجەتتىگى ايتىلعان. «جۇمىس كۇندەرى (دۇيسەنبىدەن جۇماعا دەيىن) تۇرعىندار اراسىندا ماسكا كيۋ رەجيمى مەن الەۋمەتتىك اراقاشىقتىق ساقتالىپ، دەمالىس (سەنبى، جەكسەنبى) جانە مەرەكە كۇندەرى بەي- بەرەكەت كوشەگە شىعۋ شەكتەلەدى. دەمالىس ورىندارىنا جەكە نەمەسە ءبىر وتباسى مۇشەلەرىن قوسپاعاندا، 3 ادامنان ارتىق بارۋعا بولمايدى»،-دەلىنگەن قۇجاتتا.

ويىن- ساۋىق، سپورتتىق ءىس- شارالاردى، ميتينگىلەردى، كورمەلەردى، فورۋمداردى، كونفەرەنتسيالاردى، وتباسىلىق سالتاناتتى، ەسكە الۋ شارالارىن (بانكەتتەر، ۇيلەنۋ تويى، مەرەيتوي، اس بەرۋ) جانە باسقا دا بۇقارالىق شارالاردى وتكىزۋگە، سونداي- اق ويىن- ساۋىق مەكەمەلەرىنىڭ (كاراوكە، بيليارد، كومپيۋتەرلىك كلۋبتار، تۇنگى كلۋبتار، بوۋلينگ ورتالىقتارى، جابىق ءۇي- جايلارداعى بالالاردىڭ ويىن الاڭدارى مەن اتتراكتسيوندارى، باتۋتتار جانە ت. ب. ) ، كينوتەاترلاردىڭ (اشىق اۋاداعى كينوتەاترلاردى قوسپاعاندا) ، بۋكمەكەرلىك كەڭسەلەردىڭ جۇمىسىنا تىيىم سالىنعان.

وبلىس ىشىندە قاتىنايتىن اۆتوبۋستاردىڭ قوزعالىسىنا ءالى دە رۇقسات بەرىلمەدى. «كۇشەيتىلگەن سانيتاريالىق- دەزينفەكتسيالىق رەجيمدى، ماسكا كيۋ جانە الەۋمەتتىك قاشىقتىقتى ساقتاعان كەزدە جانە ءتيىستى دايىندىق اكتىلەرىن العاننان كەيىن مەديتسينالىق ورتالىقتار، ستوماتولوگيالار (جازىلۋ بويىنشا) ، اۆتوجۋۋ ورىندارى، اۆتوموبيلدەرگە تەحنيكالىق قىزمەت كورسەتۋ جانە جوندەۋ ستانتسيالارى، تۇرمىستىق تەحنيكانى جوندەۋ وبەكتىلەرى، حيميالىق تازالاۋ، كىر جۋۋ جانە حالىققا قىزمەت كورسەتۋ بويىنشا باسقا دا وبەكتىلەر، بيزنەس- ورتالىقتارى (ساقتاندىرۋ كومپانيالارى، ادۆوكات، نوتاريۋس، بۋحگالتەر، كونسالتينگ قىزمەتتەرى، جىلجىمايتىن مۇلىك جونىندەگى اگەنتتىكتەر، جارناما اگەنتتىكتەرى، سوت ورىنداۋشىلارى جانە ت. ب. ) ؛ فيتنەس- ورتالىقتار مەن سپورتتىق- ساۋىقتىرۋ ورتالىقتارى، ترەناجەر زالدارى، سپورت كەشەندەرى، سپا ورتالىقتارى/سالوندارى (تولتىرىلۋى 30% - دان اسپايتىن، ءبىراق 50 ادامنان ارتىق ەمەس، الدىن الا جازىلۋ بويىنشا) جۇمىسىن جالعاستىرا الادى»،- دەلىنگەن قاۋلىدا.