اتىراۋلىق وقۋشى الوە وسىمدىگىنەن سۋسابىن مەن يوگۋرت جاساپ شىعاردى
وبلىستىق ءبىلىم باسقارماسى باسپا ءسوز قىزمەتىنىڭ مالىمەتىنە قاراعاندا، جىلىوي اۋدانىنىڭ ورتالىعى - قۇلسارى قالاسىندا تۇراتىن 9-سىنىپ وقۋشىسى نۇرداۋلەت ماندياروۆ الوە وسىمدىگىنەن بەت كۇتىمىنە ماسكا، سۋسابىن مەن بالالارعا ارنالعان يوگۋرت جاساپ شىعارعان.
قازىر ول 8 №-جالپى ءبىلىم بەرەتىن ورتا مەكتەپتە وقيدى. ول بوس ۋاقىتىندا الوە وسىمدىگىن زەرتتەپ، ونىڭ قاسيەتىن جوعالتپاي، قۇرامىنداعى ەلەمەنتتەر ساقتالعان قولجەتىمدى ءونىم الۋ باعىتىنداعى عىلىمي جوبانى ىسكە اسىرعان. ونىڭ ايتۋىنشا، الوە وسىمدىگى ارقىلى بارلىق اۋرۋلاردى ەمدەيتىن دارىلىك زاتتار شىعارۋعا بولادى.
«عىلىمي جوبامنىڭ تاقىرىبى - «دەنساۋلىق پەن سۇلۋلىق كەپىلى - الوە». اتالعان وسىمدىكتىڭ پايداسى ۇشان- تەڭىز. قازىرگى ۋاقىتتا ەكولوگيانىڭ ناشارلاۋىنا بايلانىستى تەرى، اسقازان اۋرۋلارى، ءتۇرلى اللەرگيالار كوپ كەزدەسەدى. سوندىقتان اتالعان اۋرۋلارعا قارسى الوە وسىمدىگىنەن وتاندىق ونىمدەر شىعارسام دەگەن نيەتىم بار. بولاشاقتا وسى باعىتتاعى جوبامدى جالعاستىرىپ، عىلىمي جاڭالىق اشقىم كەلەدى»،-دەيدى جاس عالىم نۇرداۋلەت ماندياروۆ.
وقۋشىنىڭ عىلىمي جەتەكشىسى، حيميا ءپانىنىڭ ءمۇعالىمى فاريدا ماشىرىقوۆا شاكىرتىنىڭ بولاشاعىنان زور ءۇمىت كۇتەتىنىن جاسىرمايدى.
«نۇرداۋلەتتىڭ عىلىمي جوبا اياسىندا تاجىريبەلىك مۇمكىندىگىن سىناپ كورۋى جوعارى ناتيجە كورسەتتى. ول الوەدان دايىندالعان ءونىمنىڭ تابيعيلىعى مەن پايدالى ەكەنىن عىلىمي تۇرعىدان دالەلدەدى. ونىڭ ماقساتى - وسىمدىكتەن قولجەتىمدى ونىمدەر ازىرلەپ، كۇندەلىكتى قولدانىسقا ەنگىزۋ. بۇل باعىتتا كوپ ىزدەندى. زەرتتەۋشىلىك داعدىسىنىڭ جوعارى دەڭگەيدە ەكەنىن تانىتقان وقۋشى بۇل جوبانى عىلىمي زەرتتەۋ نىساناسىنا اينالدىرادى»-دەيدى فاريدا ماشىرىقوۆا. ەسكە سالا كەتەلىك، بۇدان بۇرىن اتىراۋلىق وقۋشىلاردىڭ عىلىمي جۇمىسى حالىقارالىق جيناققا ەنگەن ەدى.