مەملەكەت باسشىسى ناتاليا گودۋنوۆاعا ءبىرقاتار تاپسىرما بەردى
قاسىم- جومارت توقايەۆقا اگروونەركاسىپ كەشەنىن قولداۋعا بولىنگەن داعدارىسقا قارسى قارجىنىڭ جۇمسالۋىنا جۇرگىزىلگەن تەكسەرۋ جۇمىستارىنىڭ الدىن الا ناتيجەلەرى جانە «جۇمىسپەن قامتۋدىڭ 2020-2021 -جىلدارعا ارنالعان جول كارتاسى» باعدارلاماسىنىڭ جۇزەگە اسىرىلۋى تۋرالى ەسەپ بەرىلدى.
قازاقستان پرەزيدەنتىنە ەكونوميكانى قولداۋعا جانە پاندەميامەن كۇرەسكە باعىتتالعان قاراجاتتىڭ ەسەپ كوميتەتى مەن تەكسەرۋ كوميسسيالارىنىڭ قاتاڭ باقىلاۋىندا ەكەنى ايتىلدى. الدىن الا قورىتىندىلار بويىنشا 940 ميلليارد تەڭگەگە جۋىق قارجىنىڭ جۇمسالۋى تەكسەرىلگەن. ءقازىردىڭ وزىندە قاراجاتتىڭ ءتيىمسىز جوسپارلانۋىنا جانە جۇمسالۋىنا قاتىستى ءبىرقاتار قارجىلىق زاڭ بۇزۋشىلىق دەرەكتەرى انىقتالعان.
ەسەپ كوميتەتىنىڭ ءتوراعاسى مەملەكەت باسشىسىنا ەكونوميكانى جانە حالىقتىڭ الەۋمەتتىك تۇرعىدان وسال توپتارىن قولداۋعا باعىتتالعان قارجىنى تەكسەرۋ جۇمىستارىنىڭ قورىتىندى ناتيجەلەرى بيىلعى جەلتوقسان ايىندا پرەزيدەنتكە ۇسىنىلاتىنىن حابارلادى.
سونىمەن قاتار قاسىم- جومارت توقايەۆ 2021-2023 -جىلدارعا ارنالعان رەسپۋبليكالىق بيۋدجەت جوباسىن باعالاۋ قورىتىندىسىمەن تانىستى.
مەملەكەت باسشىسىنا كۆازيمەملەكەتتىك سەكتور قىزمەتىنىڭ تيىمدىلىگىنە جۇرگىزىلگەن اۋديتورلىق جۇمىستاردىڭ جالعاساتىنى، سونداي- اق، «نۇرلى جەر» تۇرعىن ءۇي قۇرىلىسى مەملەكەتتىك باعدارلاماسىنىڭ جۇزەگە اسىرىلۋىنا جۇرگىزىلگەن تەكسەرۋ جۇمىستارىنىڭ قورىتىندىلارى تۋرالى اقپارات بەرىلدى.
كەزدەسۋ سوڭىندا قاسىم- جومارت توقايەۆ ناتاليا گودۋنوۆاعا ءبىرقاتار ناقتى تاپسىرما بەردى.