ەلوردا بازارلارىندا ۇرلانعان مال ەتى ساتىلىپ كەلگەن
جەدەل-پروفيلاكتيكالىق شارا بارىسىندا مال ۇرلاۋعا قاتىسى بار ادامدار انىقتالدى. ەلورداعا كىرەبەرىستەگى بەكەتتەردە مال نەمەسە ەت ونىمدەرىن تاسىمالدايتىن بارلىق كولىكتىڭ سەرتيفيكاتى، ۆەتەرينارلىق قۇجاتى، انىقتامالارىنىڭ بار-جوعى تەكسەرىلدى.
جۇرگىزىلگەن شارا اياسىندا پوليتسەيلەر قالاداعى ساۋدا ورىندارىنا ەت ونىمدەرىن جەتكىزۋشىلەردىڭ ءتيىستى قۇجاتتارىن دا تەكسەردى. كۇيگەنجار، مارالدى، وقجەتپەس، وركەن، توبىل بەكەتتەرىندە جانە «الەم» ساۋدا ۇيىندە 14 زاڭ بۇزۋ فاكتىسى انىقتالدى. ۆەتەرينارلىق تالاپتاردى ساقتاماعانى ءۇشىن ق ر ا ق ب ت ك 406-بابى نەگىزىندە اكىمشىلىك حاتتاما تولتىرىلدى. سونىمەن قاتار، ەلوردانىڭ شەتىندەگى اۋىلداردى ارالاۋ كەزىندە 5 مال جايۋ ەرەجەسىن بۇزۋ فاكتىسى انىقتالدى.
جايىلىپ جۇرگەن ءتورت تۇلىك مالدىڭ يەلەرى انىقتالىپ، ولار ق ر ا ق ب ت ك 408-باپ بويىنشا اكىمشىلىك جاۋاپكەرشىلىككە تارتىلدى. سونداي-اق، ولارمەن ەلوردا اۋماعىندا جايىلىم تالاپتارىن ساقتاۋ بويىنشا پروفيلاكتيكالىق سيپاتتاعى اڭگىمە وتكىزىلدى. مىسالى، «كۇيگەنجار» كەنتىنىڭ ماڭىندا جىلقىلار ءۇيىرى يەسىز قالعان جانە جول بويىندا قاراۋسىز جايىلىپ جۇرگەن. وسىلايشا ولار كولىك قوزعالىسىنا قاۋىپ توندىرەدى.