بەيجىڭ كوشەلەرىندە روبوت- تاكسيلەر قاتىناپ ءجۇر

نۇر -سۇلتان. قازاقپارات - بەيجىڭدە روبوت- تاكسي جۇيىتكىپ ءجۇر. جۇرگىزۋشىسى جوق كولىك ازىرگە تەك بەلگىلەنگەن ءبىر باعدارمەن قاتىنايدى.

قازىردىڭ وزىندە قىزمەتتىڭ بۇل تۇرىنە سۇرانىس كوپ. ويتكەنى قازىر ونى ۇيالى تەلەفونداعى ارنايى قوسىمشا ارقىلى تەگىن پايدالانۋعا بولادى. كولىكتەگى جولاۋشىلار سانى ەكەۋدەن اسپاۋى ءتيىس. كومپيۋتەرمەن باسقارىلاتىن كولىكتەر 1 اي شاماسىندا سىناقتان وتەدى. وسى ۋاقىت ارالىعىندا كولىك ىشىندە قاۋىپسىزدىكتى قاداعالايتىن نۇسقاۋشى وتىرادى. ازىرگە روبوت-تاكسي قالانىڭ تەك بىرنەشە اۋدانىندا قاتىناپ ءجۇر.

جولاۋشىلار پىكىرى:

- جۇرگىزۋشىسىز تاكسيگە تەگىن ءمىنىپ كورۋگە بولاتىنىن جاڭالىقتاردان ەستىدىم. سوندىقتان وسىندا كەلدىم. بۇرىن بولماعان جاڭا دۇنيە عوي.

- ماشينا ىشىندە ادام بولاتىنىن بىلگەندىكتەن قورىققان جوقپىن. اۆتوماتتاندىرىلعان تاكسيدى كورگىم كەلدى.

- جول بويى ەشقانداي وقىس وقيعا بولعان جوق، جۇرگىزۋشى باسقارۋ تەتىگىنە قول تيگىزبەدى. الايدا توتەنشە ءبىر جاعداي بولسا، مىسالى، كەنەتتەن بوگەت شىعا قالسا، جۇرگىزۋشى كولىكتى ءوزى باسقارادى.

بۇل كولىكتى قىتايداعى تەحنولوگيالىق كومپانيالاردىڭ ءبىرى جاساپ شىعاردى. ءجۇرىسى جۇمساق، جاياۋ جۇرگىنشەلەر مەن جولداعى بوگەتتەردى الىستان بايقايدى. الايدا كەمشىلىكتەرى دە بار. جىلدامدىعى باياۋ جانە كەپتەلىس پەن اۋا-رايى كۇرت بۇزىلعاندا كوپ ويلانىپ قالادى.

ۆان شەننان، كومپانيا ونىمدەرىن پايدالانۋ بويىنشا باس مەنەدجەر:

- قىزمەتىمىزگە جۇرتتىڭ قىزۋعىشىلىعى جوعارى. قالانىڭ ەكى اۋدانىندا 40 كولىك قاتىناپ ءجۇر. تاپسىرىستار سانى كۇنىنە 400 گە دەيىن جەتەدى.

قازىردىڭ وزىندە روبوت- تاكسي قىتايدىڭ ەكى قالاسىندا قىزمەت كورسەتۋدە. بەيجىڭدە سىناق قاراشانىڭ التىسىنا دەيىن جالعاسادى.

24.kz