اۋىر قىلمىس جاساپ، ىزدەۋدە جۇرگەن رەسەي ازاماتى قازاقستاننان ۇستالدى
ءىس-شارانىڭ ماقساتى - بەلگىلى ءبىر تۇرعىلىقتى مەكەنجايى، قۇجاتتارى جوق جانە قاڭعىباستىقپەن اينالىساتىن ادامدار اراسىنداعى قىلمىستاردىڭ الدىن الۋعا جانە جولىن كەسۋگە، حابار-وشارسىز كەتكەن ادامداردىڭ ورنالاسقان جەرىن انىقتاۋعا، سونداي-اق قىلمىسكەرلەردى ىزدەۋگە باعىتتالعان.
بۇل تۋرالى كولىكتەگى پوليتسيا دەپارتامەنتىنىڭ باستىعى وڭال بەكەيەۆ ايتتى. ونىڭ ايتۋىنشا، كولىك پوليتسەيلەرى جولاۋشى پويىزدارىندا، ۆوكزالداردا، پاركتەر مەن پەررونداردا تەكسەرۋ جۇرگىزدى . 13-قازان كۇنى دەپارتامەنتتىڭ كريمينالدىق پوليتسيا قىزمەتكەرلەرى اتالعان ءىس- شارانى وتكىزۋ بارىسىندا اقمولا وبلىسى شۋچينسك قالاسىنىڭ تەمىرجول ۆوكزالى اۋدانىندا رەسەي فەدەراتسياسىنىڭ 49 جاستاعى ازاماتىن انىقتاپ، ۇستادى.
اتالعان ازامات وتكەن جىلدىڭ قىركۇيەك ايىنان بەرى رەسەي فەدەراتسياسى قىلمىستىق كودەكسىنىڭ 159-بابى 3-بولىگى ( الاياقتىق ) بويىنشا اۋىر قىلمىس جاساعانى ءۇشىن ىزدەۋدە بولعان. قازىر وعان قاتىستى «ەشقايدا كەتپەۋ» تۋرالى بۇلتارتپاۋ شاراسى قابىلداندى. سول كۇنى نۇر-سۇلتان قالاسىندا ۇرلىق جاساعان 26 جانە 33 جاستاعى تاعى ەكى ازامات ۇستالدى.
و. بەكەيەۆ جەدەل الدىن الۋ ءىس-شاراسى اياسىندا بەلگىلى تۇرعىلىقتى جەرى جوق 243 ادامنىڭ داكتيلوسكوپيالىق ەسەپكە قويىلعانىن ايتتى.
«مۇنداي شارالار ادامنىڭ قىلمىس جاساۋعا ىقتيمال قاتىستىلىعىن، ادامنىڭ ىزدەۋدە جۇرگەنىن انىقتاۋعا مۇمكىندىك بەرەدى. تۇرعىلىقتى جەرى جوق ادامدار اراسىندا ىزدەستىرىلىپ جاتقان 6 ادام، ونىڭ ىشىندە اۋىر قىلمىس جاساعانى ءۇشىن ىزدەستىرىلگەن 3 قىلمىسكەر ۇستالدى. سونداي-اق، حابار-وشارسىز كەتكەن ءبىر ادام انىقتالدى»، - دەيدى پوليتسيا پولكوۆنيگى.
اۆتور: گۇلزات اقجولوۆا