اتىراۋ وبلىسىندا وقۋشىلارعا بەرىلگەن پلانشەتتەردىڭ ءبىرازى جارامسىز بولىپ شىقتى

اتىراۋ. قازاقپارات - اتىراۋ وبلىسىندا وقۋشىلارعا بەرىلگەن پلانشەتتەردەن اقاۋ تابىلدى، دەپ حابارلايدى قازاقپارات.

«اتىراۋ - ادالدىق الاڭى» جوبالىق كەڭسەسىنىڭ قوعامدىق باقىلاۋى اتىراۋ قالاسى مەن اۋداندارعا بولىنگەن پلانشەتتەردىڭ تەحنيكالىق ساپاسى مەن تاراتىلۋىنا مونيتورينگ جۇرگىزدى.

«مونيتورينگ كەزىندە جاڭا پلانشەتتەردىڭ كەيبىرى جارامسىز بولىپ شىقتى. اتاپ ايتقاندا، مەكتەپتەرگە تاراتىلعان 1999 پلانشەتتىڭ 166 سىنان اقاۋ تابىلدى. ماسەلەن، جىلىوي اۋدانىندا 400 پلانشەتتىڭ 44 ى، يندەر اۋدانىندا 240 پلانشەتتىڭ تورتەۋى، يساتايدا 240 پلانشەتتىڭ 29 ى، قۇرمانعازى اۋدانىندا 400 پلانشەتتىڭ ۇشەۋى، قىزىلقوعادا 240 پلانشەتتىڭ 27 سى، ماقاتتا 206 پلانشەتتىڭ 20 سى، ماحامبەت اۋدانىندا 273 پلانشەتتىڭ 39 ى پايدالانۋعا جارامسىز ەكەنى انىقتالدى. بيۋدجەت قاراجاتىنا ساتىپ الىنعان پلانشەتتەردىڭ كەلىسىمشارتقا سايكەس، ءبىر جىلدىق كەپىلدىك مەرزىمى بار. سوعان بايلانىستى ولاردى جاڭاسىنا اۋىستىرىپ بەرۋ جالعاسۋدا»، - دەپ حابارلادى وبلىستىق سىبايلاس جەمقورلىققا قارسى ءىس- قيمىل دەپارتامەنتىنىڭ باسپا ءسوز قىزمەتىنەن.

ەسكە سالا كەتەلىك، بۇدان بۇرىن اتىراۋ وبلىسىنىڭ مەكتەپتەرىنە پلانشەتتەر جەتكىزىلگەنىن حابارلاپ ەدىك.

اۆتور: بەك مۇستافا