ەرلان تۇرعىمبايەۆ قازا تاپقان پوليتسەيلەردىڭ وتباسىلارىنا كوڭىل ايتتى

نۇر-سۇلتان. قازاقپارات - ىشكى ىستەر ءمينيسترى ەرلان تۇرعىمبايەۆ قازا تاپقان پوليتسەيلەر قانات وتاربايەۆ پەن قانات ءحاميدۋلليننىڭ وتباسىلارىنا كوڭىل ايتتى، دەپ حابارلايدى قازاقپارات ءى ءى م سىلتەمە جاساپ.

«ولاردىڭ كاسىبيلىگى مەن پاراساتتىلىعىن، ءوز قىزمەتىنە ادالدىعىن باسشىلىق تا، حالىق تا باعالاعان. ولار ارىپتەستەرىنىڭ اراسىندا سىيلى بولدى. ىشكى ىستەر ورگاندارىنىڭ بارلىق جەكە قۇرامى قازا تاپقانداردىڭ تۋىستارى مەن جاقىندارىمەن بىرگە قايعىرادى»، - دەدى مينيستر ەرلان تۇرعىمبايەۆ.

ايتا كەتسەك، پوليتسيا كاپيتانى قانات ايداربەك ۇلى وتاربايەۆ ىشكى ىستەر ورگاندارىندا 16 جىل قىزمەت ەتكەن. ارتىندا جۇبايى مەن ءۇش بالاسى قالدى، ولاردىڭ ەڭ كىشىسى 3 جاستا. پوليتسيا كاپيتانى قانات بولات ۇلى حاميدۋللين ىشكى ىستەر ورگاندارىندا 12 جىل قىزمەت ەتكەن. مارقۇمنىڭ ارتىندا جۇكتى ايەلى مەن جەتى جاسار ۇلى قالدى. بۇگىن تۇندە اقمولا وبلىسىندا جول اپاتى بولىپ، پوليتسيا قىزمەتكەرلەرى كوز جۇمدى.

اۆتور: مارلان جيەمباي