د د ۇ: كوروناۆيرۋس تۋبەركۋلەزدەن بولاتىن ءولىمنىڭ وسۋىنە اكەلۋى ىقتيمال

جەنەۆا. قازاقپارات - دۇنيەجۇزىلىك دەنساۋلىق ساقتاۋ ۇيىمى تاياۋ جىلدارى تۋبەركۋلەزدەن بولاتىن ءولىم- ءجىتىمنىڭ كۇرت ءوسۋى مۇمكىن ەكەندىگىن ەسكەرتتى، دەپ حابارلايدى قازاقپارات ءتىلشىسى ءال-جازيرا اگەنتتىگىنە سىلتەمە جاساپ.

بۇعان كوروناۆيرۋس پاندەمياسىنان تۋىنداعان داعدارىستار مەن قاراجاتتىڭ جەتىسپەۋشىلىگى سەبەپ بولۋى مۇمكىن. ددۇ 2020 -جىلدىڭ ءبىرىنشى جارتىسىندا تۋبەركۋلەزدىڭ جاڭا جاعدايلارى تۋرالى ەسەپ بەرۋ مەن باقىلاۋدىڭ ەداۋىر تومەندەگەنىن ايتتى، ويتكەنى ەلدەر COVID-19 تارالۋىن بولدىرماۋعا شەكتەۋلەر ەنگىزگەن بولاتىن.

ەسەپتە الەمدەگى تۋبەركۋلەز اۋرۋى ەڭ جوعارى ەلدەردىڭ قاتارىنا كىرەتىن ءۇندىستان، يندونەزيا جانە فيليپپين ەلدەرى 2020 -جىلدىڭ التى ايىنداعى جاعداي تۋرالى حابارلامالار وتكەن جىلدىڭ سايكەس كەزەڭىمەن سالىستىرعاندا %25-30 تومەندەگەنى تۋرالى ايتقان.

د د ۇ مودەلىنە سايكەس، اۋرۋ جاعدايلارى تۋرالى حابارلامالار سانىنىڭ مۇنداي ازايۋى تۋبەركۋلەزدەن قوسىمشا ءولىمنىڭ كۇرت وسۋىنە اكەلۋى مۇمكىن. 2018-2019 -جىلدار ارالىعىندا شامامەن 14 ميلليون ادام تۋبەركۋلەزدەن ەمدەلگەن، ءبىراق بۇل 2022 -جىلعا دەيىن ەمدەلۋگە ۇمىتتەنگەن 40 ميلليوننىڭ ۇشتەن ءبىرى عانا.

د د ۇ مالىمەتتەرى بويىنشا، ناۋقاستاردىڭ شامامەن %85 ىن التى اي بويى ءدارى-دارمەكپەن ءساتتى ەمدەۋگە بولادى. ەمدەۋ سونىمەن قاتار ينفەكسيانىڭ ودان ءارى تارالۋىن ازايتادى. 2000 -جىلدان باستاپ تۋبەركۋلەزدى ەمدەۋ 60 ميلليوننان استام ادامنىڭ ءولىمىن ساقتاپ قالدى.

ەستەرىڭىزگە سالا كەتەيىك، تۋبەركۋلەز الەمدەگى ەڭ قاۋىپتى جۇقپالى اۋرۋ بولىپ سانالادى. بۇل كوبىنەسە وكپەگە اسەر ەتەتىن جانە وڭاي تارالۋى مۇمكىن باكتەريالاردان بولادى.

اۆتور: گۇلزات اقجولوۆا