قول جۋمايتىن ادامدار قانداي اۋرۋعا ۇشىرايدى - دارىگەر كەڭەسى

None
None
نۇر-سۇلتان. قازاقپارات - بۇگىن قازاقستاندا جانە الەمنىڭ كوپتەگەن ەلدەرىندە بۇكىلالەمدىك قول جۋۋ كۇنى اتالىپ وتەدى، دەپ حابارلايدى قازاقپارات ءتىلشىسى.

بىرىككەن ۇلتتار ۇيىمى، سونىڭ ىشىندە ب ۇ ۇ بالالار قورى 2008 -جىلى 15-قازاندا بۇكىلالەمدىك قول جۋۋ كۇنىن جاريالادى.

قولدى سابىنمەن جۋۋ - جىل سايىن 3,5 ميلليون بالانىڭ ءومىرىن قياتىن ءتۇرلى اۋرۋلاردىڭ الدىن الۋعا كومەكتەسەدى. وسى ورايدا نۇر-سۇلتان قالاسى جەدەل مەديتسينالىق كومەك ستانسياسىنىڭ ەپيدەميولوگ-دارىگەرى بايان وسپانوۆا تازالىق پەن گيگيەنالىق داعدىلاردىڭ قانشالىقتى ماڭىزدى ەكەنىن ءتۇسىندىردى.

«كۇن سايىن ادامداردا تەرىنىڭ جاڭا قاباتى قۇرىلادى. ول 2 اپتا سايىن جاڭارىپ وتىرادى. ءبىزدىڭ تەرىمىزدە كوپتەگەن ءتۇرلى ميكرواعزالار بار. ولاردى رەزيدەنتتىك فلورا دەپ اتايمىز، ياعني ءوز ميكروبتارىمىز تەرىدە ءومىر ءسۇرىپ، كوبەيە الاتىن فلورا. بارلىق ادامنىڭ جەكە رەزيدەنتتىك ميكروفلوراسى بولادى. ءبىراق، ادامدار ءتۇرلى زاتتاردى ۇستاعاندا، ترانزيتورلىق ميكروفلورا پايدا بولادى. ياعني تەرى ۇستىندە ينفەكسيالىق ميكروبتار قالۋى مۇمكىن. سول ماقساتتا وسى ترانزيتورلىق ميكروفلورانى جويۋ ءۇشىن قولدى مىندەتتى تۇردە مۇقيات جۋۋ كەرەك»، - دەدى ب. وسپانوۆا قازاقپارات تىلشىسىنە بەرگەن سۇحباتىندا.

دارىگەر قول جۋىلماسا، ترانزيتورلىق ميكروفلورا شىرىشتى قاباتقا ءتۇسۋى مۇمكىن ەكەنىن ەسكە سالدى.

«بۇل ءتۇرلى اۋرۋلارعا اكەپ سوعۋى مۇمكىن. ماسەلەن، كوزدىڭ شىرىشتى قاباتىنا تۇسسە - كونيۋكتيۆيت، مۇرىن مەن اۋىزعا تۇسسە - رينيت، فارينگيت، ستوماتيت سىندى ينفەكسيامەن بايلانىستى اۋرۋلار تۋىنداۋى مۇمكىن. ماسەلەن، دارەتحانادان كەيىن قول جۋۋ كەرەك دەپ نەگە ايتامىز؟ ويتكەنى، وندا ىشەك فلورالارى بولۋى مۇمكىن، ولار ادام اعزاسىنا ەنسە، ديزەنتەريا، سالمونەللەز، ەنتەريت سىندى ىشەك ينفەكسيالارى ءورشۋى مۇمكىن. سوسىن تاماق ىشەر الدىندا دا قول جۋۋ كەرەك. سەبەبى، ىدىس- اياقتى ۇستاعاندا دا اعزاعا ينفەكسيا ەنۋى مۇمكىن»، - دەيدى مامان.

كوروناۆيرۋس ينفەكسياسى دا زات ۇستىندە سالىستىرمالى تۇردە ۇزاق ۋاقىت ساقتالادى.

«قازىر دە ماسكا تاعىپ، قول جۋمايتىن بولساق، ەش قورعانىس بولمايدى. ويتكەنى ادامدار ماسكانى ءبىر تاعادى، ءبىر شەشەدى. كەي ادامدار ءبىر ماسكانى كۇنى بويى تاعىپ جۇرەدى. ۇيگە كىرگەندە قالتاسىنا سالادى دا، سىرتقا شىققاندا سول كىر ماسكانى الىپ كيەدى. سول لاس اۋامەن دەم الادى. ياعني، جۋىلماعان قولدان ۆيرۋستىق، ىشەك ينفەكسيالارى، ءتىپتى تاماقتان ۋلانۋ قاۋىپتەرى بار»، - دەدى ب. وسپانوۆا.

سونىمەن بىرگە، دارىگەر وقىرماندارعا قول جۋۋ تاسىلدەرى جونىندە كەڭەس بەردى.

«ادەتتەگى سابىن مەن انتيباكتەريالىق سابىننىڭ قۇرامى ءارتۇرلى. جاي سابىندار تەرىدەگى كىردەن تازارتادى. ال باكتەرياعا قارسى سابىندار تەرىدەگى زياندى- زيانسىز بارلىق ميكرواعزالاردى جويادى. مۇنداي سابىنداردى ادەتتە مەديتسينادىق ماماندار قولدانۋى ءتيىس. ال تۇرعىندار كۇندەلىكتى ومىردە ادەتتەگى سابىندى پايدالانسا دا جەتكىلىكتى. ال ەگەر ۇيدە ىشەك ينفەكسياسى بار ناۋقاس بولسا، ونىڭ اينالاسىنداعى ميكرواعزالاردى جويۋ ءۇشىن ارينە، باكتەرياعا قارسى سابىن كەرەك»، - دەپ ءتۇسىندىردى ب. وسپانوۆا. قول جۋۋدا سۋ تەمپەراتۋراسى ماڭىزدى ەمەس.

دەگەنمەن، سۋ بولمە تەمپەراتۋراسىندا بولعانى ءجون.

«جىلى سۋمەن سابىن تەزىرەك شايىلادى. ال سالقىن سۋمەن ۇزاعىراق جۋۋ كەرەك بولادى. ەڭ باستىسى - تەردىەگى سابىندى دا جاقسىلاپ شايۋىمىز كەرەك. ويتكەنى، سابىن دا تەرىدە قالىپ قويسا، باكتەريالاردىڭ كوبەيۋىنە جايلى ورتا بولۋى مۇمكىن. ياعني، سابىننان دا قولىمىزدى تازارتۋ ماڭىزدى. قول جۋۋ ۋاقىتىنا كەلسەك، ساعاتقا قاراپ، سەكۋند ساناۋدىڭ قاجەتى جوق. بارلىعىن كەزەك- كەزەگىمەن جۋۋ كەرەك. ەڭ الدىمەن الاقاندى ىسقىلاپ جۋعاندا 5 كە دەيىن ساناۋ كەرەك. سودان كەيىن قولدىڭ سىرتى - 1,2,3,4,5. ساۋساقتاردىڭ اراسى - 5 سەكۋند، باس بارماق پەن تىرناقتاردى دا شامامەن 5 سەكۋندتان جۋۋعا بولادى. وسىلايشا، ءبىر مينۋتقا جەتەر- جەتپەس ۋاقىتتا قول جۋۋعا بولادى. ال مەديتسينالىق قىزمەتكەرلەردىڭ ءوز ەرەجەسى بار - وتا الدىندا، ينە سالاردا نەمەسە ناۋقاستاردى تەكسەرۋدە قول جۋاتىن ارنايى ەرەجەلەر بەلگىلەنگەن»، - دەدى بايان وسپانوۆا.

اۆتور: ايجان سەرىكجان قىزى

سوڭعى جاڭالىقتار