تۋريستەر ءۇشىن كوروناۆيرۋسقا بايلانىستى شەكتەۋلەر از ەلدەر اتالدى

نۇر -سۇلتان. قازاقپارات – حالىقارالىق اۋە قاتىناسى قاۋىمداستىعى (IATA) كوروناۆيرۋسقا بايلانىستى شەكتەۋلەر دارەجەسى كورسەتىلگەن ينتەراكتيۆتى كارتاداعى مالىمەتتەردى جاڭارتتى.

IATA مالىمەتتەرى بويىنشا، قازىرگى ۋاقىتتا سەگىز مەملەكەت قانا «شەكتەۋ جوق ەلدەر» تىزىمىنە ەنگەن، ياعني ول مەملەكەتتەردە ساياحاتشىلارعا قاتاڭ شەكتەۋلەر جوق.

سونىمەن، مەكسيكادا، گايتيدە جانە تۇركيادا شەتەلدىكتەردەن كوروناۆيرۋستىڭ جوق ەكەنىن راستايتىن انىقتاما تالاپ ەتىلمەيدى. تەك ارنايى ونلاين ساۋالنامانى تولتىرىپ، ەلگە ۇشىپ كەلگەن كەزدە كورسەتۋ قاجەت جانە بايلانىسسىز تەرمومەتريادان ءوتۋ كەرەك.

29-شىلدەدەن باستاپ شەتەلدىكتەرگە برازيلياعا بارۋعا رۇقسات ەتىلدى. COVID-19 تەستىنەن ءوتۋ تالاپ ەتىلمەيدى. مەديتسينالىق ساقتاندىرۋ مىندەتتەلەدى. البانيا، اۋعانستان دا كوروناۆيرۋستىڭ تالداۋ ناتيجەلەرىن قاجەت ەتپەيدى.