ال ءسىز، اتاقتى كريستيان ديوردىڭ مۋزاسى قازاق قىزى بولعانىن بىلەسىز بە؟

None
None
نۇر-سۇلتان. قازاقپارات - اللا يلچۋن - دۇنيەجۇزىنە تانىلعان، ءسان الەمىندە ترەند قالىپتاستىرا بىلگەن، 40 جىل تاعىنان تايماعان مودەل.

الايدا، بۇل بۇرىمدى مودەلدىڭ مودەلدىك جولىنا دەيىنگى جانە كەيىنگى ءومىرى جۇمباق بولىپ كەلگەن بولاتىن. ءتىپتى، ۇلتىنىڭ كىم ەكەنى بەيمالىم بولعان. تەك 60 قا كەلگەندە عانا اكەسىنىڭ اتىن جاريالاپ، ءتۇبى قازاق ەكەنىن مويىندادى. ەندى ءبارىنىڭ كوكەيىندە ءبىر سۇراق تۋىندايتىنى ءسوزسىز: قازاق قىزى پاريجگە قالاي كەلدى؟ كريستيان ديور مىرزاعا قالاي جولىقتى؟

اللا يلچۋننىڭ اكەسى قۋانتحان يلچۋن قازاق جەرىندە الماتىدا دۇنيەگە كەلگەن. الايدا جۇمىس بابىمەن قىتايدىڭ حاربين قالاسىنا قونىس اۋدارادى. وسىندا قۋانتحان جۇبايى تامارامەن تانىسىپ وتباسىن قۇرادى. كوپ ۇزاماي دۇنيەگە اللا كەلەدى. بىرنەشە ۋاقىتتان كەيىن بۇل مەملەكەتتە قيىن جاعدايلار تۋىنداپ، يلچۋن جانۇياسى ەۋروپاعا قونىس اۋدارادى.

العاشىندا اللا يلچۋن مەيرامحانادا داياشى بولىپ جۇمىس ىستەيدى. مودەل بولۋ ءتىپتى ويىنا كىرىپ تە شىقپاعان. ءبىراق، 1947 -جىلى اللا قۇربىسىمەن بىرگە ديور ءۇيىنىڭ كاستينگىنە كەلەدى. بۇل تۋرالى ول Chicago Tribune گازەتىنە بەرگەن سۇحباتىندا بىلاي دەپ ەسكە الادى: «مەن جۇمىس ىزدەپ جۇرگەن قۇربىما سەرىك بولىپ بارعان ەدىم. سەبەبى ول جالعىز بارۋعا ۇيالاتىنىن ايتتى. مەنى كورىپ ديور جۇمىس جاساۋ تۋرالى ۇسىنىس جاسادى. ال قۇربىم كاستينگتەن وتكەن جوق، دەگەنمەن ءبىز جاقسى قارىم- قاتىناسىمىزدى ساقتاپ قالدىق».


وسىلايشا، اللا ويلاماعان جەردەن ديور ءۇيىنىڭ ەكزوتيكالىق جۇلدىزىنا اينالادى. اللانىڭ ازياتتىق ءتۇر كەلبەتى، كوزىنىڭ قيىعى، نەبارى 47 سانتيمەترلىك قىپشا بەلى ءبارىن تاڭقالدىرادى. سول كۇننەن باستاپ، قازاقتان شىققان سۇلۋ بويجەتكەن «ديوردىڭ مۋزاسىنا» اينالدى. ول مودەل مانسابىن 1967 -جىلى اياقتادى. دەگەنمەن سوڭعى رەت مودەل 1987 -جىلى ديور ءۇيىنىڭ 40 جىلدىق مەرەيتويىنا وراي پوديۋمعا شىقتى. سونىمەن قاتار جاقىندا وسى جىلدىڭ قاڭتار ايىندا بەرلين كەنجەتاي ۇلىنىڭ «مۋزا Dior» كىتابى جارىققا شىقتى. الداعى ۋاقىتتا اللا يلچۋن تۋرالى كينو ءتۇسىرۋ دە جوسپاردا.

NewsRoom

سوڭعى جاڭالىقتار