قازاقتان شىققان تۇڭعىش ايەل كينورەجيسسەر تۋرالى بىلەسىز بە؟

نۇر -سۇلتان. قازاقپارات - ك س ر و كينەموتوگرافيستەر وداعىنىڭ مۇشەسى جانە كەڭەستىك شىعىستان تۇڭعىش شىققان قازاق ايەل كينورەجيسسەر، قازاقستاننىڭ ەڭبەك سىڭىرگەن ونەر قايراتكەرى - داريعا بايجۇمان قىزى تنالينا.

داريعا تنالينا اقمولا وبلىسىندا تۋىپ- وسكەن. اكەسى ءبىلال تنالين - بەلگىلى رەۆوليۋتسيونەر، ساكەن سەيفۋللينمەن سەرىكتەس بولعان. وتىزىنشى جىلداردىڭ نەبىر زوبالاڭىن كورىپ وسكەن داريعا بايجۇمان قىزى الماتى تەاتر ۋچيليشەسىندە ءبىلىم الادى. 1939 -جىلى ماسكەۋدەگى ۆ گ ي ك- كە ءتۇسىپ، الدىمەن اكتەرلىك، سوسىن تەك ەركەكتەردىڭ كاسىبى سانالىپ كەلگەن رەجيسسەرلىك فاكۋلتەتتە وقيدى. اتاقتى الەكساندر دوۆجەنكودان ساباق الادى، ۆياچەسلاۆ تيحونوۆ، سەرگەي بوندارچۋك، ۆاسيلي شۋكشين، سۇلتان قوجىقوۆ، نوننا مورديۋكوۆالارمەن بىرگە وقيدى.

1940 -جىلى «رومانتيكي» دەگەن كينوعا ءتۇسىپ، باستى رولدەگى چۋكوت قىزى تين-تين رولىن سومداپ شىعادى. كوپ ۇزاماي سۇراپىل سوعىس تۋىپ، سول تۇستا باستالعان كينومەن بايلانىستى كاسىبىن ءومىرىنىڭ سوڭىنا دەيىن ۇزگەن جوق.

«موسفيلمدە» نەبىر ساڭلاقتارمەن 22 جىل قىزمەت ەتە ءجۇرىپ، قازاقستاندا «الىستاعى تاۋدا»، قىرعىزستاندا «سالتانات»، تۇرىكمەنستاندا «ەرەكشە تاپسىرما، رەسەي مەن ۋكراينادا «يليا مۋرومەتس» اتتى كينولار تۇسىرگەن.

1964 -جىلدان «قازاق فيلمنىڭ» رەجيسسەرى رەتىندە الەمدىك جانە كەڭەستىك التىن قورداعى ونداعان فيلمدەردى قازاق تىلىنە دۋبلياج جاساعان. داۋىستى ءدال بەرۋدىڭ ۇلكەن شەبەرى بولعان. «سوعىس جانە بەيبىتشىلىك»، «باگراتيون»، «اتامەكەن» سىندى فيلمدەردى قازاقشا سويلەتتى. «قىز بەن جىگىت»، «بوتاگوز» فيلمدەرىنىڭ كينولەنتالارىن قالىپقا كەلتىردى. مۇنىڭ ءبارى داريعا اپامىزدىڭ ەرەن ەڭبەگىنىڭ ءبىر بولشەكتەرى عانا.

2008 -جىلى كينو سالاسىنىڭ بار قىر-سىرىن «ونەر» باسپاسىنان شىققان «چەرنو- بەلوە كينو» اتتى مونوگرافيالىق كىتاپتى جارىققا شىعاردى. ول كىتاپتا كينو سالاسىنىڭ مەترى وتكەن ءومىر جولدارىن، ءومىرىنىڭ وزەگىنە اينالعان كاسىبىنىڭ قىر-سىرىن، وتاندىق كينەماتوگرافيانىڭ قالىپتاسۋ جولدارىن بۇگە- شىگەسىنە دەيىن باياندايدى. داريعا اپامىزدىڭ ارمانعا جەتۋ ءۇشىن جاساعان ەڭبەكتەرى وسكەلەڭ ۇرپاققا ۇلگى.