قازاقستاننىڭ دەنساۋلىق ساقتاۋ سالاسىنداعى الەمدىك دەڭگەيى جاريا بولدى
دەنساۋلىق ساقتاۋ سالاسىنىڭ دەڭگەيى بويىنشا الەمدىك رەيتينگتى ءىرى مالىمەتتەر بازاسى سانالاتىن Numbeo جاريالادى. اتالمىش رەيتينگتە قازاقستان 93 مەملەكەتتىڭ ىشىندە 53-ورىن العان. ءبىزدىڭ ەل سونىمەن قاتار ت م د ەلدەرىنىڭ ىشىندە دەنساۋلىق ساقتاۋ جۇيەسىنىڭ ساپاسى بويىنشا ەڭ جوعارى يندەكسكە يە.
بۇل تىزىمدە بەلارۋس (59-ورىن)، رەسەي (63-ورىن)، ۋكراينا (78-ورىن) جانە ازەربايجان (91-ورىن) قازاقستاننان قالىپ كەلەدى.
رەيتينگ دەنساۋلىق ساقتاۋ جۇيەسىنىڭ جۇمىس ساپاسىن، مەديتسينالىق جابدىقتارمەن، قۇرىلعىلارمەن قامتاماسىز ەتۋ دەڭگەيىن، مەديتسينالىق قىزمەتكەرلەر مەن دەنساۋلىق ساقتاۋ سالاسىىنداعى مامانداردىڭ كاسىبيلىگىن، ەمحانالارداعى ەمدەلۋ قۇنىن جانە تاعى باسقا كورسەتكىشتەردى باعالايدى.
بۇل تۇرعىدا ۇزدىك بەس ەلدىڭ قاتارىنان تايۆان، وڭتۇستىك كورەيا، فرانسيا، جاپونيا جانە دانيا كورىندى. 2020 -جىلدىڭ قاڭتار- شىلدە ايلارىندا قازاقستاندا دەنساۋلىق ساقتاۋ سالاسىندا جالپى سوماسى 749,2 ميلليارد تەڭگەنىڭ قىزمەتى كورسەتىلگەن.
بۇل - ءبىر جىل بۇرىنعى كورسەتكىشكە قاراعاندا 19,2 پايىز كوپ. سونىمەن قاتار بۇل قىزمەتتەردىڭ 80,4 پايىز - بيۋدجەت ەسەبىنەن، 11,8 پايىز - حالىق ەسەبىنەن، 7,8 پايىز - كاسىپورىندار ەسەبىنەن كورسەتىلگەن.
ايماقتاردى ءبولىپ قاراعاندا دەنساۋلىق ساقتاۋ سالاسىندا كورسەتىلگەن قىزمەتتەردىڭ كوبى الماتىعى تيەسىلى: 128,5 ميلليارد تەڭگە - ءبىر جىل بۇرىنعى كورسەتكىشتەن 22,6 پايىزعا ارتىق. ەكىنشى جانە ءۇشىنشى ورىن نۇر-سۇلتان (104,2 ميلليارد ت گ، +10,1 پايىز) جانە قاراعاندى وبلىسى (53,1 ميلليارد تەڭگە، +24 پايىز) تۇر. كورسەتكىشى ەڭ ۇلكەن ەكى قالا مەن ءبىر وبلىسقا ەلدە كورسەتىلگەن جالپى مەديتسينالىق قىزمەتتەردىڭ ۇشتەن ءبىرى تيەسىلى. قىزمەت سەكتورىنىڭ جارتىسىنان كوبى اۋرۋحانادا كورسەتىلگەن.
اتاپ ايتقاندا اۋرۋحانالاردىڭ حيرۋرگيالىق بولىمشەسىندە - 80,1 ميلليارد تەڭگە، گينەكولوگيالىق بولىمشە مەن پەرزەنتحانالاردا - 37,3 ميلليارد تەڭگە، پسيحياترلىق اۋرۋحانالاردا - 16,8 ميلليارد تەڭگەنىڭ قىزمەتى كورسەتىلگەن.
اۆتور: ايان بەكەن ۇلى