«مەن قازاقشا سويلەيمىن»: ۇلت وكىلدەرى اراسىنداعى رەسپۋبليكالىق بايقاۋ اياقتالدى
ش. شاياحمەتوۆ اتىنداعى «ءتىل- قازىنا» ۇلتتىق عىلىمي- پراكتيكالىق ورتالىعى ۇيىمداستىرعان بايقاۋدىڭ شارتى بويىنشا ۇمىتكەر قازاقتىڭ «باتىرلار جىرىنان» بىرەۋىن جاتقا مانەرلەپ وقىپ بەرۋگە ءتيىس بولدى.
«مەملەكەت باسشىسى «انا ءتىلى» گازەتىنە بەرگەن ءوزىنىڭ ارنايى سۇقباتىندا قازاق ءتىلىن جاقسى بىلەتىن وزگە ۇلت وكىلدەرىن قولداۋ تۋرالى تاپسىرما بەرگەن بولاتىن. بۇل اكسيانىڭ ماقساتى - جاستاردى ەلىنە دەگەن سۇيىسپەنشىلىك، ادالدىق، ەڭبەكقورلىق، ار- نامىس ءتارىزدى ادامگەرشىلىك قۇندىلىقتار نەگىزىندە تاربيەلەۋ جانە قازاق ءتىلىن ۇلتارالىق قاتىناس تىلىنە اينالدىرۋدى كەڭىنەن ناسيحاتتاۋ. قاتارىڭىزدىڭ كوپتىگى، ءاربىرىڭىزدىڭ جان- جاقتى دايىندىعىڭىز كوڭىل قۋانتپاي قويمايدى»، - دەدى قورىتىندى باس قوسۋدا قۇتتىقتاۋ ءسوز سويلەگەن ءتىل كوميتەتىنىڭ ءتوراعاسى ادىلبەك قابا.
«ءتىل- قازىنا» ورتالىعىنىڭ باس ديرەكتورى، جازۋشى الىبەك اسقاردىڭ پىكىرىنشە، ەلىمىزدىڭ ون ءتورت ءوڭىرى مەن ءۇش قالاسىنان ەڭبەكتەگەن سابيدەن ەڭكەيگەن كارىگە دەيىن 20 ەتنوس وكىلىنەن قۇرالعان 243 ۇمىتكەر قاتىسقان. «قوبىلاندى باتىر» جىرى بايقاۋ بارىسىندا 76 رەت تولعانسا، ودان كەيىن «الپامىس باتىر» ەپوسى تۇر. قاتىسۋشىلاردىڭ جاس ەرەكشەلىگىنە كوز جۇگىرتسەك، ەڭ جاسى - نۇر- سۇلتان قالاسى «بايتەرەك» بالاباقشاسىنىڭ تاربيەلەنۋشىسى 5 جاسار ماريا بولسا، ۇلكەنى - شىمكەنت قالاسىنىڭ تۇرعىنى، زەينەتكەر فاتكۋلبايانوۆا ناسيما بوريس قىزى ەكەن.
«بالا كۇنىمىزدەن «باتىلار جىرىن» باسىمىزعا جاستانىپ وسكەن حالىقتىڭ ۇرپاعىمىز عوي. سان عاسىرلار قويناۋىنان كەلە جاتقان جىر جاۋھارلارىنان وزگە ۇلت وكىلدەرىنىڭ ەكى ايدان استام ۋاقىت بويى ءسوز مارجانىن توككەنىن كورگەنىڭدە، قازاق ءتىلىنىڭ بولاشاعى تۋرالى ەرىكسىز ۇلكەن ۇمىتپەن ويلانىپ قالاسىڭ»، - دەدى ول.
ۇيىمداستىرۋشىلاردىڭ ايتۋىنشا، «باتىرلار جىرىنان» باسقا، پاتريوتتىق رۋحتاعى پوەزيالىق شىعارمالار مەن تاريحي تاقىرىپقا ارنالعان باللادا- داستان وقىعاندار بولدى. «باتىرلار جىرىنان» ءۇزىندىنى مانەرلەپ جاتقا وقىپ، الەۋمەتتىك جەلىدە ەڭ كوپ ءلۇپىل جيناعان تومەندەگى ازاماتتار جۇلدەگەر بولىپ انىقتالدى. ولاردىڭ ءارقايسىسىنا 30 مىڭ تەڭگە كولەمىندە سىيلىقاقى بەرىلدى: پاۆلودار وبلىسى ەكىباستۇز قالاسى №25-قازاق قىزدار گيمنازياسىنىڭ 11-سىنىپ وقۋشىسى لەگكايا ينەسسا ۆيكتوروۆنا، اقتوبە وبلىسى العا اۋدانى بالالار مەن جاسوسپىرىمدەر سپورت مەكتەبىنىڭ جاتتىقتىرۋشى- وقىتۋشىسى كاراسايەۆا يلونا الەكساندروۆنا، تۇركىستان وبلىسى سوزاق اۋدانىنىڭ تۇرعىنى اشيرمەت سيتارا سۇلتانمۇرات قىزى، تاراز قالاسى «حابار-24» تەلەارناسىنىڭ ءتىلشىسى ترەگۋبوۆا ۆيكتوريا ۆياچەسلاۆوۆنا، تۇركىستان وبلىسى سارىاعاش اۋدانى، ارىستانباپ جوعارى كوللەدجىنىڭ 2-كۋرس ستۋدەنتى راۆان- ناحچيۆاني ينديرا.
بۇدان باسقا مانەرلەپ وقىپ، شەبەرلىك كورسەتكەن تاعى 10 ۇزدىك قاتىسۋشى ق ر مادەنيەت جانە سپورت مينيسترلىگى ءتىل ساياساتى كوميتەتى ءتوراعاسىنىڭ ديپلومىمەن ماراپاتتالدى. ولار: قاراعاندى وبلىسى، پريوزەرسك قالاسى №2-ورتا مەكتەپتىڭ 7-سىنىپ وقۋشىسى كۋزنەتسوۆ ۆلاديمير، الماتى وبلىسى تالعار اۋدانى №4-جالپى ءبىلىم بەرەتىن مەكتەپتىڭ باستاۋىش سىنىپ ءمۇعالىمى پوپلاۆسكايا ەلەنا يگوريەۆنا، پاۆلودار وبلىسى شاقات ورتا مەكتەبىنىڭ 11-سىنىپ وقۋشىسى ەۆلويەۆا گالينا، قاراعاندى وبلىسى، پريوزەرسك قالاسى №2-ورتا مەكتەپتىڭ 8-سىنىپ وقۋشىسى مۋراشكينا ديانا الەكساندروۆنا، الماتى قالاسى №110-مەكتەپ- گيمنازيانىڭ 6-«د» سىنىپ وقۋشىسى كۋزوۆنيكوۆ رۋسلان، اقتاۋ قالاسىنان مۇعالىم سيلچەنكو يرينا سەرگەيەۆنا، اقتوبە وبلىسى، قوبدا اۋدانى تالدىساي اۋىلدىق كلۋبى قىزمەتكەرى مالتسيەۆ الەكساندر ۆلاديميروۆيچ، الماتى وبلىسى قاپال اۋىلى اكىمى اپپارتىنىڭ باس مامانى چەپەل ۆلاديمير سەرگەيەۆيچ، شىمكەنت قالاسى م. مامەتوۆا اتىنداعى №111-جالپى ورتا ءبىلىم بەرەتىن مەكتەپتىڭ 9-سىنىپ وقۋشىسى ابدۋگافۋروۆا ازيزا، نۇر-سۇلتان قالاسى «№1-بايتەرەك» بالاباقشاسىنىڭ تاربيەلەنۋشىسى ماريا.
شارا مودەراتورى ورتالىق ديرەكتورىنىڭ ورىنباسارى ايدوس تۇرسىنباي ۇلى مالىمدەگەندەي، بۇل بايقاۋدان ەشكىم قۇر الاقان قالعان جوق. ويتكەنى ارامىزدا قازاق تىلىندە سويلەمەيتىن نەمەسە سويلەسەم، جاڭساق ايتىپ كۇلكى بولامىن- اۋ دەپ ءالى دە بولسا تارتىنىپ، ورىنسىز قىسىلىپ جۇرگەندەرگە بۇلاردىڭ ءارقايسىسىنىڭ باتىل ارەكەتى ۇلگى بولارلىق. «باتىرلار جىرىنان» جاتقا ءۇزىندى وقىپ، قازاق ءتىلىن ناسيحاتتاۋ بويىنشا قوسقان ۇلەسى ءۇشىن بارلىق تالاپكەرگە «ءتىل- قازىنا» ۇلتتىق عىلىمي- پراكتيكالىق ورتالىعى باس ديرەكتورىنىڭ العىس حاتى تابىستالدى.