باعى اشىلماعان ستاليننىڭ جالعىز قىزى

نۇر -سۇلتان. قازاقپارات- س س س ر ديكتاتورى يوسيف ستاليننىڭ جالعىز قىزى سۆەتلانا اكەسىنىڭ سۇيىكتى قىزى بولعانى باعى مەن سورىنا اينالدى.

ونىڭ جەكە ءومىرى تۋرالى قانشا جازىلسا دا، اشىلماعان سىرلارى كوپ.

كرەملدىڭ حانشايىمىنىڭ ستاليننىڭ قىزىنىڭ تاعدىرى ەشكىمدى بەي-جاي قالدىرماسى انىق.

بالا كەزىنەن بارلىق جاقسى نارسەلەرگە يەلىك ەتكەن سۆەتلانانىڭ ءومىرى پاتشانىڭ قىزىنىڭ ومىرىندەي شالقىپ ءوتۋى كەرەك-تۇعىن. الايدا ولاي ەمەس، ول دا قاراپايىم ادام. ءارى «جازمىشتان وزمىش جوق» دەگەن بار. اكەنىڭ باتاسى، قىز بالاسىنا باق سىيلارى انىق. اكە تىلەگىنە نەگە قارسى شىقتى؟ باعى اشىلدى ما؟

بۇگىن ءبىز ميلليونداعان ادامنىڭ العىسى مەن قارعىسىنا قالعان ديكتاتوردىڭ قىزىنىڭ ءومىرى تۋرالى جاريالايمىز.

سۆەتلانا التى جاسىندا اناسىنان ايىرىلعان. ول شەشەسىنىڭ وزىنە قول جۇمساعانىن تەك بىرنەشە جىلدان كەيىن بىلگەن. وعان دەيىن سوقىرىشەكتەن قايتىس بولعان دەپ كەلگەن.

بالا كۇنىندە ستاليننىڭ وڭ قولى بەريانىڭ ۇلى سەرگوعا عاشىق بولعان دەسەدى. اكەسى قىزىنىڭ بالا ماحابباتىن قۇپتامادى جانە قارسى بولمادى. الايدا قىزمەتكەرىنە سەنبەيتىنى تۋرالى قىزىنا ۇنەمى قۇلاققاعىس ەتىپ وتىرعان.

ناعىز عاشىق بولۋدى سۆەتلانا وزىنەن 23 جاس ۇلكەن الەكسەي كەپلەرگە سەزىنگەن. ول كەزدە ەندى عانا 17 جاسقا تولعان كەزى. 40 جاستاعى پروديۋسسەر جانە سەناريست، اجىراسقان ەۆرەي كەپلەر دە ديكتاتوردىڭ قىزىنا شىنايى سەزىمىن بىلدىرگەن سىڭايلى. تەك قانا اكەسىنىڭ ءبىلۋى، اعىلشىن تىڭشىسى دەگەن ايىپپەن، ايداۋعا جونەلتىلۋىمەن بۇل قارىم- قاتىناس توقتايدى. بەس جىل ايداۋدا بولعان ول، عاشىعىنا كەزدەسۋگە كەلمەكشى بولىپ، تاعى دا بەس جىلعا ايداۋعا جونەلتىلەدى. ءدال وسى وقيعا اكە مەن قىزىنىڭ اراسىنا سالقىندىق تۇسىرەدى. تۇكىرىگى جەرگە تۇسپەيتىن اكەنىڭ ءوز پەرزەنتىنە ءسوزى وتپەگەنى قاتتى باتادى. ال قىزىنىڭ بولسا، ءوز كەزەگىندە، اكەگە دەگەن ماحابباتى جەك كورۋ سەزىمىنە اينالادى.

وسىلايشا سۆەتلانا اكەنىڭ تار قاپاسىنان كۇيەۋگە شىعىپ قانا قۇتىلاتىنىن سەزەدى. وزىمەن بىرگە وقىعان گريگوري موروزوۆقا تۇرمىسقا شىعادى. ستالين بۇل نەكەگە سالقىن قاندىلىق تانىتادى. 1945 -جىلى يوسيف اتتى ۇلىن ومىرگە اكەلەدى. ال 1947 -جىلى ستاليننىڭ بۇيرىعىمەن، ەشبىر سەبەپسىز ەكى جاس اجىراسادى.

كەلەسى كۇيەۋىن ديكتاتور ءوزى تاڭداپ بەرەدى. ول يۋري جدانوۆتان ەكاتەرينا اتتى قىز بوسانادى. نەكەسى ءۇش جىل ءومىر سۇرەدى. بۇدان كەيىن ول قاراپايىم، مەيىرىمدى انادان، سۋىق ايەلگە اينالادى. ءوزى شەشىم قابىلداپ، وتباسىمەن ايىرىلىسادى. بۇل كەزدە اۋرۋعا دۋشار بولعان اكەسى قىزىنىڭ ومىرىنە نەمقۇرايلى قارادى.

بۇدان كەيىن يۆان سۆانيدزەگە تۇرمىسقا شىعادى. ول ستاليننىڭ ءبىرىنشى ايەلىنىڭ ءىنىسى بولعان. اكەسى ونى الدىمەن جۇيكە اۋرۋلار اۋرۋحاناسىنا جاتقىزىپ، كەيىننەن حالىق جاۋى ەتىپ، ايداۋعا جىبەرەدى.

اكەسىنىڭ ولىمىنەن سوڭ، سۆەتلانا الليلۋيەۆا، ياعني اناسىنىڭ تەگىنە وتەدى. ميللونداعان ادامنىڭ ولىمىنە سەبەپكەر بولعان اكەسىنىڭ تەگى وزىنە كەرى اسەر ەتەتىنىن ءبىلدى.

شىن ماحابباتىن سۆەتلانا 1963 -جىلى كەزدەستىرەدى. وزىنەن 26 جاس ۇلكەن برادەش سينگح اتتى ۇندىسكە تۇرمىسقا شىعۋىنا نيكولاي حرۋشەۆتىڭ ءوزى قارسى بولعان ەكەن. بۇل ماحابباتى دا ۇزاققا سوزىلمادى. قاتەرلى ىسىكپەن اۋىرعان ول، بەس جىلدان سوڭ كوز جۇمادى. سينگحتىڭ سوڭعى اماناتى بويىنشا، ونىڭ كۇلىن گانگا وزەنىنە اعىزىپ، اقتىق ساپارعا اتتاندىرۋ بولاتىن. سۆەتلانا شەتەلدىك سۇيىكتىسىن بيلىكتىڭ قارسىلىعىنا قاراماستان، اپارۋعا بەل بۋادى. بۇدان كەيىن ول سوۆەت وكىمەتىنە قايتىپ ورالمادى. ا ق ش-تى پانالاعان ول، ۋيليام پيتەرسكە تۇرمىسقا شىعادى.

ارحيتەكتور بولعان ول ناعىز قاتىنقۇمار مەن قۇمار ويىنشىسى بولىپ شىعادى.

سۆەتلانا وسى كەزدە ءوز ءومىرى تۋرالى ەكى مەمۋار جازادى. وندا كوممۋنيستىك جۇيە مەن اكەسىن ايىپتايدى. بۇل كىتاپتار ا ق ش-تا جاقسى ساتىلىپ، سۆەتلانا ستالينا اۋقاتتى ايەلگە اينالادى. لانا پيتەرس دەپ اتى-ءجونىن وزگەرتەدى. سۆەتلانانى امەريكان جۇبايى قارىزدارىنان قۇتىلۋشىسى رەتىندە كورەدى. ورتاق ءبىر قىزى ولگا پيتەرس دۇنيەگە كەلگەن سوڭ، ايەلى مەن قىزىن تاستاپ كەتەدى. كەيىننەن ول قىزى كريس ەۆانس دەپ اتى-ءجونىن اۋىستىرادى.

كرەمل حانشايىمىنىڭ بارلىق جاعدايى جاسالسا دا، بارماقتاي باعى بولمادى. ءوز باقىتىن دۇنيەجۇزىن شارلاپ تا تابا المادى. ايەل باقىتىن ىزدەپ ءجۇرىپ، ول انالىق بورىشىن وتەمەگەن. ۇلكەن بالاسى يوسيف، كەيىننەن كارديولوگ بولىپ تانىلعان. قىزى ەكاتەرينا دا اكەسىنىڭ تۋىستارىنىڭ ۇيىندە وسەدى. بالا كۇنىندە تاستاپ كەتكەنى ءۇشىن اناسىن ەشقاشان كەشىرە المايدى. ال كەنجە قىزى امەريكالىق ينتەرناتتا وسكەن.

ستاليننىڭ قىزى جالعىزدىقپەن 2011 -جىلى قارتتار ۇيىندە قاتەرلى ىسىكتەن قايتىس بولدى. ول كەزدە جاسى 85 تە بولاتىن. ونىڭ دەنەسى كىشى قىزىنا جونەلتىلگەن. ال قايتا كومىلگەنى تۋرالى ءالى كۇنگە دەيىن بىردە-ءبىر مالىمەت جوق.

NewsRoom