ۇلتتار ليگاسى: قازاقستان مەن البانيا العاش رەت تەڭ ءتۇستى
قوس قۇراما ماتچ بارىسىندا تەڭ دارەجەدە ويىن كورسەتتى. ءبىرىنشى كەزەڭدە ەكەۋىنىڭ دە گول سوعاتىن بىرنەشە مۇمكىندىگى بولعان ەدى. دەگەنمەن ونى ۇتىمدى پايدالانا العان جوق. ەكىنشى كەزەڭدە قۇرامالار ەسەپتى وزگەرتەتىن قولايلى ءساتتى ىزدەدى. ايتا كەتەرلىگى، البانيا فۋتبولشىلارىنىڭ بەلسەندىلىگى ايقىن اڭعارىلىپ تۇردى. ولار گول سوعاتىن بىرنەشە مۇمكىندىكتى قۇر جىبەرىپ الدى. ويىن 0:0 ەسەبىمەن تەڭ اياقتالدى. قازاقستان مەن البانيا قۇرامالارى بۇدان بۇرىن 2006 -جىلعى الەم چەمپيوناتى ىرىكتەۋ كەزەڭىندە ەكىنشى توپتا باق سىناستى.
قازاقستان قۇراماسى اتالعان قارسىلاسىنا سول جولى ءوز الاڭىندا 0:1، سىرت الاڭدا 1:2 ەسەبىمەن جول بەرىپ قويدى. وسىلايشا ەكى قۇراما ءوز تاريحىندا تۇڭعىش رەت تەڭ ءتۇسىپ وتىر. ەستەرىڭىزگە سالا كەتەلىك، ەكى قۇراما س ليگاسى ءتورتىنشى توبىندا سىنعا تۇسەدى. اتالعان توپتاعى ليتۆا مەن قۇرامالارى بۇگىن ءوزارا شەبەرلىك بايقاسادى. ازىرگە تۋرنير كەستەسىندە ەكى قۇراما ءتورت ۇپاي جيناپ، ءبىرىنشى جانە ەكىنشى ورىندى ءوزارا ءبولىسىپ تۇر. قازاقستان قۇراماسى بۇدان بۇرىن ەكى كەزدەسۋ وتكىزدى. الدىمەن 4 قىركۇيەكتە سىرت الاڭدا ليتۆانى 2:0 ەسەبىمەن جەڭىپ، 7-قىركۇيەكتە ءوز الاڭىندا بەلارۋسكە 1:2 ەسەبىمەن جەڭىلىپ قالدى. قازاقستان قۇراماسى ەندى 14 قازاندا بەلارۋسپەن سىرت الاڭدا وينايدى.