ءمادينا دۋمان قىزى «قىتاي داۋىسى» مۋزىكالىق جوباسىندا ديماشتىڭ ءانىن ورىندادى
اتالعان جوبانىڭ 8-قازان كۇنى وتكەن 8- اينالىمىندا ءمادينا دۋمان قىزى ديماش قۇدايبەرگەننىڭ «ۇمىتىلماس كۇن» ءانىن قازاق جانە قىتاي تىلدەرىندە ورىنداپ، كورەرمەندەردىڭ ەرەكشە ىقىلاسىنا بولەنگەن. سونداي- اق، وسى ەلدە تۇراتىن تاعى ءبىر قانداسىمىز مەيرامبەك اقساي ۇلى انگە قوبىز بەن سىبىزعى ءۇنىن قوسىپ سۇيەمەلدەگەن.
مادينا دۋمان قىزى قىتايدىڭ weibo الەۋمەتتىك جەلىسىندەگى جەكە پاراقشاسىندا وسى «قىتاي داۋىسى» جوباسىندا ديماشتىڭ ءانىن ورىنداپ شىققاننان كەيىنگى اسەرىمەن بولىسكەن.
«ماعان «قىتاي داۋىسى» جوباسىندا ديماش اعامىزدىڭ ءانىن ورىنداۋعا مۇمكىندىك بەرگەنى ءۇشىن لي جيان حانىمعا راحمەت ايتامىن! بۇل ءان ماعان ەرەكشە ۇنايدى! بايقاۋدىڭ وسى كەزەڭىندە ماۋسىمدىق اۋا رايىنىڭ وزگەرىسىنە بايلانىستى تاماعىمدى ءسال قارلىقتىرىپ، اۋىرتىپ الدىم. سوندىقتان ءوزىم ويلاعانداي دەڭگەيدە ءاندى جەتكىزە الماعان سەكىلدىمىن. دەسە دە ناتيجەسى قانداي بولماسىن، ءوز ۇلتىمنىڭ ءانىن وسى ساحناعا الىپ شىققانىما وتە قۋانىشتىمىن. ءوز حالقىڭنىڭ بولمىسىن، بيىك ونەرىن ءان ارقىلى باسقالارعا ءتۇسىندىرىپ، جەتكىزۋ ماعىنالى ءىس جانە باقىتتى سەزىمگە بولەيدى!» ، - دەپ ءانشى اسەرلى جازبا قالدىرعان.
ەسكە سالا كەتەيىك، اتالعان جوبا قىتايدىڭ «جىجياڭ» تەلەارناسىندا كورسەتىلىپ جاتىر. قازاقپاراتتا ءمادينا دۋمان قىزىنىڭ وسى قىتايداعى تالانتتار شوۋى اتانعان تەليەۆيزيالىق جوبانىڭ العاشقى كەزەڭىندە «قارىزدار ەمەسپىن» اتتى ءاندى ورىنداپ، تالىمگەرلەر مەن كورەرمەندەردىڭ جوعارى باعاسىنا يە بولعانى تۋرالى جازعان بولاتىنبىز.
اۆتور: باقىتجول كاكەش