ەلوردادا شەتەلدىك بالا كۇتۋشى جۇمىس بەرۋشىلەردى توناپ كەتتى

نۇر- سۇلتان. قازاقپارات - نۇر- سۇلتان قالاسىنىڭ پوليتسيا قىزمەتكەرلەرى وسى ءىس بويىنشا 36 جاستاعى رەسەيلىك ايەلدى ۇستادى، دەپ حابارلايدى قازاقپارات ءتىلشىسى.

ەرلى- زايىپتىنىڭ ۇيىندە بالا كۇتۋشى بولىپ جۇمىس ىستەگەن ايەل ءۇي يەلەرىنىڭ جوقتىعىن پايدالانىپ، پاتەردەن التىن جۇزىكتى، ءيىسسۋ مەن جەكە زاتتاردى ۇرلاپ كەتكەن. وسىلايشا 400 مىڭ تەڭگەنىڭ زاتتارىن جىمقىرعان. جەدەل ىزدەستىرۋ جۇمىستارى بارىسىندا پوليتسيا قىزمەتكەرلەرى كۇدىكتىنىڭ قاي جەردە جۇرگەنىن انىقتاعان. بەلگىلى بولعانداي، ۇرلىق جاساعان ايەل جىمقىرعان دۇنيەلەرىن ساتىپ جىبەرىپ، الماتىعا شىعىپ كەتكەن. ول جاقتا دا بالا كۇتۋشى بولىپ جۇمىسقا تۇرعان. استاناعا جەتكىزىلگەن ر ف ازاماتى كىناسىن مويىنداپ وتىر. سونىمەن بىرگە ونىڭ بۇرىن دا سوتتى بولعانى انىقتالدى. اتالمىش ءىس بويىنشا ق ر قىلمىستىق كودەكسىنىڭ 188-بابى (ۇرلىق) بويىنشا سوتقا دەيىنگى تەرگەۋ امالدارىن جۇرگىزۋدە. ۇستالعان ايەلدىڭ وسىعان ۇقساس قىلمىستارعا قاتىسىنىڭ بار- جوعى انىقتالۋدا.