موڭعول ءانشىسى حالىق ءانى «اعاجاي التايدى» شىرقادى - شەتەلدەگى قازاق ءتىلدى ب ا ق- قا شولۋ

نۇر- سۇلتان. قازاقپارات- «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

ابايدىڭ قارا سوزدەرى وزبەك تىلىندە كىتاپ بولىپ شىقتى - «ءو ز ا» اقپاراتتىق اگەنتتىگى

اباي قۇنانباي ۇلىنىڭ 175 جىلدىق مەرەيتويىنا وراي اقىننىڭ «قارا سوزدەرى»، «اباي قورا سўز» اتتى كىتاپ بولىپ وزبەك تىلىندە جارىق كوردى. تۋىندىنىڭ تاشكەنت تورىندە تۇساۋكەسەرى ءوتتى، دەپ حابارلايدى «ءو ز ا» اقپاراتتىق اگەنتتىگى.

اتالعان ب ا ق- تىڭ دەرەگىنشە، يگى شارا قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى دارحان ساتىبالدىنىڭ باستاماسىمەن جۇزەگە اسقان. سونداي- اق، حالىقارالىق تۇركى اكادەمياسىنىڭ قولداۋىمەن وزبەكستان جازۋشىلار وداعىنىڭ مۇشەسى، جازۋشى، اۋدارماشى، پروفەسسور قوزوقبوي يۋلدوشيەۆ وزبەك تىلىنە ءتارجىمالاعان. وسىناۋ يگى شارادا ءسوز العان ەلشى دارحان امانگەلدى ۇلى ەكى ەل اراسىندا تاريحي، مادەني بايلانىستار بۇگىنگى تاڭدا تىعىز قارىم- قاتىناستا ەكەنىن جانە مۇنداي شارالار ەكى باۋىرلاس ەل اراسىنداعى ءوزارا ىنتىماقتاستىقتىڭ دامۋىنا وڭ ىقپال ەتەتىنىن ايتتى. ول قازاقتىڭ ماڭدايىنا بىتكەن نار تۇلعا ابايدىڭ ايتقان ناقىلى ەكى ەلدىڭ رۋحاني يگىلىگىنە جارايتىنىن تىلگە تيەك ەتكەن.

«تۇساۋكەسەردە وزبەكستانداعى قازاق مادەني ورتالىعىنىڭ مۇشەلەرى، ءو ر ءبىلىم مينيسترلىگىنىڭ وكىلى، ب ا ق وكىلدەرى قاتىسىپ شارا سوڭىندا ابايدىڭ قارا سوزدەرىن وزبەك تىلىندە سويلەتكەن قوزوقبوي يۋلدوشيەۆقا قازاقى سالت- ءداستۇر بويىنشا شاپان جابىلىپ، قوشەمەت كورسەتىلدى»، دەپ تۇيىندەيدى وزبەكستاندىق ب ا ق.

موڭعول ءانشىسى ا. ءمونح- ۋندراح حالىق ءانى «اعاجاي التاي» - دى شىرقادى - Kaznews

موڭعوليالىق Kaznews اقپاراتتىق پورتالىندا وسىنداي تاقىرىپتاعى اقپارات جارىق كوردى. بايان- ولگيلىك جاس ءانشى ا. ءمونح- ۋندراح حالىق ءانى «اعاجاي التاي» - دى شىرقادى. ا. ءمونح- ۋندراح بۇعان دەيىن قازاقتىڭ حالىق اندەرىنەن پوپۋري دە ورىنداعان بولاتىن، دەپ جازادى موڭعولياداعى Kaznews اقپاراتتىق پورتالى.

اتالعان ب ا ق- تىڭ كەلتىرگەن دەرەكتەرىنە سۇيەنسەك، بايان- ولگي ايماعىندا تۇراتىن ۇلتى موڭعول(ۇراڭقاي) جاس ءانشى امگالان ءمونح- ۋندراح قازاقتىڭ حالىق اندەرىن ناقىشىنا كەلتىرە ورىنداۋىمەن كوپتىڭ كوڭىلىنەن شىعىپ جۇرگەن ءانشى ەكەن. امگالان قىزى ءمونح- ۋندراح امانكەلدى توقتامۇرات ۇلى اتتى قازاق ازاماتىمەن وتباسىن قۇرعان. ول باقداۋلەت، جانداۋلەت ەسىمدى قوس ۇل تاربيەلەپ وتىرعان قازاق كەلىنى.

جاس ءانشى بۇگىندە بايان- ولگي ايماعىندا جولداسى امانكەلدىنىڭ باسقارۋىنداعى «بارۋۋن بۇرگەد» كومپانياسىندا مەنەجەر بولىپ قىزمەت ىستەيدى.

يران قازاقستانعا قۇرما ەكسپورتتايدى - «فارس» اقپارات اگەنتتىگى

يراننىڭ وڭتۇستىگىندەگى دەزفۋل قالاسىنىڭ قۇرماسى كوپتەگەن ەلدەرگە، ولاردىڭ ىشىندە قازاقستانعا ەكسپورتتالادى، دەپ جازادى parstoday اقپارات اگەنتتىگى.

يراندىق ب ا ق- تىڭ دەرەگىنشە، دەزفۋل قالاسى ەرەكشە كليماتتىق جاعدايىنا بايلانىستى تسيترۋستىق داقىلداردىڭ 12 تۇرىمەن بىرگە قۇرما ءوسىرۋ سالاسىندا جوعارى مۇمكىندىككە يە. يراننىڭ قۇرما ەكسپورتىنىڭ 50 پايىزىن حۋزەستان قۇرماسى قۇرايدى. حۋزەستان قۇرماسى قازاقستان، رەسەي، ب ا ءا، اۆستراليا، تۇركيا، تاجىكستان، چەحيا، پولشا، سينگاپۋر، رۋمىنيا مەن كاناداعا ەكسپورتتالادى ەكەن. اتالعان اقپارات كوزى دەرەگىنە سۇيەنسەك، يراننان قازاقستانعا قۇرمادان باسقا كوكونىستەردە ەكسپورتتالادى.

«وتكەن 5 ايدا قۇنى 242 ميلليون دوللاردى قۇرايتىن 1094539-نان اسا توننا كوكونىس ءتۇرلى ەلدەرگە، سونىڭ ىشىندە قازاقستانعا ەكسپورتتالدى. يران - كوكونىس ەكسپورتى جونىنەن الەمدەگى بەسىنشى، ال باتىس ازيادا ءبىرىنشى ەل. يراننىڭ كوكونىسى 37 ەل، اتاپ ايتار بولساق، قازاقستان، رەسەي، ۆەنگريا، پولشا، تۇركيا، نورۆەگيا مەن ت. ب. ەلدەرگە ەكسپورتتالادى»، دەپ تۇيىندەيدى «فارس» اقپارات اگەنتتىگى.

اق شاربىلى اسقار تاۋ - تيانشاننەت

قىركۇيەك ايىنىڭ سوڭعى كۇندەرى شىنجاڭداعى ىلە قازاق اۆتونوميالى وبلىسى، موڭعۇلكۇرە اۋدانى، سارقوبى اۋىلى دولان تاۋى اڭعارىندا كۇزگى قار جاۋدى، دەپ حابارلايدى kazakh.ts.cn پورتالى.

سان ءتۇرلى تۇسكە ەنگەن اسقار تاۋدىڭ باسىنا كەلىپ ورالعان اق شاربى بۇلتتار تابيعاتتى ونان سايىن سۇلۋلاندىرا ءتۇستى دەپ جازادى اۆتور.

«قاردان كەيىنگى دولان اڭعارىندا التىن رەڭدەس سارى ءتۇستى ۇيەڭكى جاپىراعى كۇز سامالىمەن قالىقتاپ، بەينە سۇلۋ پەريزات گۇل جاپىراعىن شاشقانداي اسەر بەردى. ورمانمەن كومكەرىلگەن تاۋلار اق، سارى، جاسىل تۇستەرگە بويالدى. تابيعات اياسىنان جايبىراقات جايىلعان جىلقىلاردى دا كورۋگە بولادى. ونداعى قازاق مالشىلاردىڭ ءۇيىنىڭ مورجاسىنان شۇباتىلا شىققان ءتۇتىن سۇلۋ تابيعاتتى ونان سايىن كورىكتى ەتە تۇسكەندەي. بەتكەيدەگى سارى، جاسىل، قىزىل ءتۇستى شوپتەر مەن اعاشتار، كوك اسپان، اقشا بۇلتتارمەن جاراستىق تاۋىپ، كوركى كوز ءسۇرىندىردى.. .» ، دەپ جازادى قىتايدىڭ «تيانشاننەت» اقپاراتتىق پورتالى.

2500 جىلدىق تاريحى بار 59 تابىت تابىلدى - TRT

مىسىردىڭ ساككارا ارحەولوگيالىق قورعاۋ الاڭىنان 10-12 مەتر تەرەڭدىكتە ورنالاسقان 3 زيراتتان 59 اعاش تابىت تابىلدى، دەپ جازادى تۇركيا راديو تەليەۆيزيا پورتالى.

مىسىردا تابىلعان بۇل 59 تابىتتىڭ 2 مىڭ 500 جىلدىق تاريحى بار دەپ بولجانۋدا دەيدى TRT.

اتالعان ب ا ق- تىڭ دەرەگىنشە، بۇل تاريحي مۇرالاردى قوعامعا تانىستىرۋ ءۇشىن ارحەولوگيالىق قورعاۋ الاڭىندا ۇيىمداستىرىلعان باسپا ءسوز ءماسليحاتىنا مىسىر تاريحي مۇرالار ءمينيسترى حاليد ءال- اناني، جانە 60 وكىلەتتى ەلشى مەن 200 دەن استام جەرگىلىكتى جانە شەتەلدىك باسپا ءسوز وكىلى قاتىسقان.

«مينيستر اناني جاقسى قورعالعان تابىتتارعا جاسالعان العاشقى زەرتتەۋلەر ناتيجەسىندە، بۇل ءبىزدىڭ زامانىمىزدان بۇرىنعى 6-7- عاسىرلاردا بيلىك جۇرگىزگەن 26- پەرعاۋىن حاندىعى داۋىرىنە ءتان ەكەنى انىقتالعانىن ايتتى. سونداي- اق، اتالعان تاريحي مۇرالارمەن بىرگە ونداعان قولا مۇسىندەر تابىلعان»، دەپ جازادى TRT.

ۇلان- باتىردا «اباي جانە ءال- فارابي كەشى» وتكىزىلدى - Kaznews

ۇلان- باتىردا قازاقستان رەسپۋبليكاسىنىڭ موڭعولياداعى ەلشىلىگى ۇلى اقىن، اعارتۋشى اباي قۇنانباي ۇلىنىڭ 175 جىلدىعىنا جانە كورنەكتى فيلوسوف ءابۋ ناسىر ءال- فارابيدىڭ 1150 جىلدىعىنا ارنالعان «اباي جانە ءال- فارابي كەشىن» ۇيىمداستىردى، دەپ حابارلادى موڭعوليانىڭ Kaznews اقپاراتتىق پورتالى.

ءىس- شاراعا قۇرمەتتى قوناقتار رەتىندە موڭعوليا ۇكىمەتى جانىنداعى مادەنيەت جانە ونەر ىستەرى جونىندەگى اتقارۋشى اگەنتتىگىنىڭ باسشىلىعى، «ابايدىڭ قارا سوزدەرى» كىتابىنىڭ موڭعول تىلىندەگى اۋدارماسىنىڭ اۆتورى، مادەنيەت، سىرتقى ىستەر، ءبىلىم جانە عىلىم مينيسترلىكتەرىنىڭ، جەرگىلىكتى بۇقارالىق اقپارات قۇرالدارىنىڭ وكىلدەرى جانە قازاق دياسپوراسىنىڭ تانىمال قايراتكەرلەرى قاتىسقان.

ءىس- شارالار بارىسىندا موڭعول تىلىندەگى «ابايدىڭ قارا سوزدەرى» (سۋرگاالۋۋد) كىتابىنىڭ تۇساۋكەسەرى بولعان. كىتاپتىڭ اۆتورى، ديپلومات، پروفەسسور، تاريحشى، جازۋشى جانە اۋدارماشى سۇلتان تاۋكەي ۇلى اباي مۇراسى - قازاق حالقىنىڭ عاسىرلار بويى جيناقتالعان جانە بارلىق دانالىقتى بويىنا سىڭىرگەن رۋحاني بايلىق ەكەنىن باسا ايتتى.

«كەش بارىسىندا ابايدىڭ «جەلسىز تۇندە جارىق- اي» جانە «ايتتىم سالەم قالامقاس» تۋىندىلارى موڭعول حالقىنىڭ ۇلتتىق اسپابى «مورين حۋۋرمەن» ورىندالدى. بۇدان باسقا، كەشكە كەلگەن قوناقتار قازاق دياسپوراسىنىڭ دارىندى جاستارىنىڭ ورىنداۋىندا كوپشىلىك ءسۇيىپ تىڭدايتىن «كوزىمنىڭ قاراسى» جانە «سەگىز اياق» مۋزىكالىق شىعارمالارىن، سونداي- اق مانەرلەپ وقىلعان ابايدىڭ ولەڭدەرى مەن قارا سوزدەرىن تاماشالادى. كەش بارىسىندا اباي مەن ءال- فارابيگە ارنالعان فوتوكورمەلەر مەن كىتاپ كورمەلەرى ۇيىمداستىرىلدى. سوڭىندا قوناقتارعا ۇلى ويشىلدار اباي مەن ءال- ءفارابيدىڭ ءومىرى مەن شىعارماشىلىعى تۋرالى دەرەكتى فيلمدەر كورسەتىلدى»، دەپ تۇيىندەيدى Kaznews اقپاراتتىق پورتالى.

اۆتور: بەيسەن سۇلتان