قاتاڭ كارانتين قايتالانسا، قانشا ادام جۇمىسسىز قالۋى مۇمكىن

نۇر-سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ەلىمىزدە قاتاڭ كارانتين ەنگىزىلسە، ەڭبەك نارىعىنداعى جاعداي قانداي بولاتىنىن سيپاتتاپ بەردى، دەپ حابارلايدى قازاقپارات ءتىلشىسى.

«ەپيدەميولوگيالىق احۋالعا توقتالساق، ۇكىمەت ەلىمىزدە ەپيدەميولوگيالىق جاعدايدىڭ تۇراقتىلىعىن ساقتاۋ ءۇشىن بارلىق قاجەتتى شارالاردى قابىلداۋدا. ەگەر ىندەتكە قاتىستى جاعداي ۋشىعىپ كەتسە، ۇكىمەت ەكونوميكانى، بيزنەستى جانە حالىقتى قولداۋ بويىنشا ءتيىستى قادامداردى جاسايدى. الايدا ناقتى ءبىر تولەمدەر مەن سومالار جايىندا ايتۋ ەرتەرەك»، - دەدى ب. نۇرىمبەتوۆ ورتالىق كوممۋنيكاتسيالار قىزمەتىندە.

سونىمەن قاتار ول ەڭبەك مينيسترلىگى ىندەتكە قاتىستى الداعى بولۋى مۇمكىن جاعدايعا ءتيىستى باعالاۋ جۇرگىزگەنىن ايتتى.

«ەڭبەك رەسۋرستارىن دامىتۋ ورتالىعىمىز جاعدايدىڭ ەڭ ناشار دەگەن نۇسقاسىنا ءتيىستى باعالاۋ جۇرگىزدى. وسى ورايدا بىزدە كوكتەمدە بولعان قاتاڭ كارانتيندىك شارالاردى ەسكەرىپ، ەڭبەك نارىعىن زەردەلەدى. ەگەر ۇكىمەت وسىنداي قاتاڭ شارالاردى قابىلداۋعا ءماجبۇر بولسا، وندا 4 ميلليونعا جۋىق ادام وزدەرىنىڭ جۇمىس ورىندارىن ساقتاپ قالادى»، - دەدى ۆەدومستۆو باسشىسى. بۇل تۇرعىدا ءبىرىنشى كەزەكتە قۇرىلىس، اۋىل شارۋاشىلىعى، دەنساۋلىق ساقتاۋ سالالارىندا ساقتالادى.

«2,5 ميلليون ادام قاشىقتان جۇمىس ىستەۋ رەجيمىنە وتەدى. بۇل جوعارى بىلىكتىلىك ماماندارىنا قاتىستى. 2 ميلليونعا جۋىق ادامعا قاتىستى جۇمىس ۋاقىتىنىڭ قىسقارۋى بولۋى مۇمكىن. وسى ورايدا ساۋدا، كولىك، تاماقتاندىرۋ سالاسىن قامتۋى ىقتيمال. ءبىزدىڭ ساراپشىلاردىڭ ەسەبىنشە، قاتاڭ كارانتين ەنگىزىلسە، تاعى 160 مىڭعا تارتا ادام جۇمىستان بوساتىلىپ، جۇمىسسىز قالۋى مۇمكىن»، - دەپ ءتۇسىندىردى مينيستر.

اۆتور: رۋسلان عابباسوۆ