كەنەسارى حاننىڭ قارىنداسى تابىلدى

نۇر -سۇلتان. قازاقپارات - كەنەسارى حاننىڭ پاتشالىق ەكسپانسياعا قارسى كۇرەسكەن جورىقتارىن كوپشىلىك جاقسى بىلەدى.

مۇردەسى قىرعىز جەرىندە دەپ، باسى ءوزى كۇرەسكەن پاتشالىق ەلدىڭ ءبىر قۋىسىندا دەپ تاريحتى توپشىلايتىنىمىز بەلگىلى. وسى كۇرەستى جولعا جان اياماي دەم بەرگەن ءبىر تۇلعان حان كەنەنىڭ تۋعان قارىنداسى بوپاي حانشا. بۇل تۋرالى Newsroom.kz سايتى حابارلايدى.

ابىلايدىڭ ۇلى قاسىمنىڭ بايبىشەسى ايكۇمىستەن التى بالا تارايدى. كەنەسارى، سارجان، ەسەنگەلدى، كوشەك، اعاتاي جانە بوپاي. بوپاي بويجەتكەن شاعىندا ءابىلقايىردىڭ سامەكە دەگەن ۇلىنا ۇزاتىلادى. سامەكە ەكەۋىنىڭ شاڭىراعىنان التى ۇل ومىرگە كەلەدى. كەيىن التى ۇل ەرجەتىپ، اناسىمەن بىرگە اتقا قونىپ، كەنەسارىنىڭ ساربازدارىنىڭ قاتارىنا اتتاندى. بوپاي حانشانى تاريحي دەرەكتەر دە، ءىلياس ەسەنبەرليننىڭ «قاھار» رومانى دا باتىل، ەرجۇرەك، كۇرەس جولىنداعى تاقىمىنىڭ تەككە قىسىلماعانىن دالەلدەپ جازادى. اسكەرگە قاجەتتى الىم-سالىقتاردى جيناۋدى كەنەسارى قارىنداسى بوپايعا سەنىپ تاپسىرعان. ول وسى اسكەردى تۇراقتى ۇستاپ تۇرۋعا قاجەتتى دۇنيەلەرىن تۇگەندەيتىن 600 ساربازدان تۇراتىن جاساقتى باسقارعان.

كەنەسارى حان تاعدىرىنىڭ قايعىلى اياقتالۋىمەن، ەن دالانى دۇبىرلەتىپ وتكەن جورىقتاردان بۇگىندە تەك قانا اڭىزدار عانا سول ەرلىكتەردىڭ شەجىرەسىنەن سىر شەرتەتىندەي.

وسىناۋ اتى اڭىزعا اينالاعان قازاقتىڭ قىزىنىڭ ەسىمى ۇرپاق جادىنا ۇلتتىق پاتريوتيزمنىڭ جارقىن ۇلگىسى بولىپ تۇرادى. سوڭعى جىلدارى رۋحاني جاڭعىرۋ باعدارلاماسى اياسىندا تاريحتى تۇگەندەپ، تۇلعالارى تىرىلمەسە دە، ەرلىك جولدارىن جاڭاشا ناسيحاتتاۋ ماقساتىندا «قازاقستاننىڭ كيەلى جەرلەرى گەوگرافياسىنا» جوباسى قولعا الىنىپ ءجۇر.

اقتوبە وبلىسى بويىنشا «قازاقستاننىڭ كيەلى جەرلەرى گەوگرافياسىنا» رەسپۋبليكالىق دەڭگەيدە ەنگىزىلگەن 10 نىساننىڭ قاتارىنا كەنەسارى حاننىڭ قارىنداسى بوپاي حانىم جەرلەنگەن قورىمى دا ەنگىزىلدى. بۇل تاريحي مەكەننىڭ ورنالاسقان اۋماعى اقتوبە وبلىسى، ايتەكە بي اۋدانى، كىلەمجايعان اۋىلىنان سولتۇستىك- باتىسقا قاراي 15 ك م جەردە. جەر اتاۋى دا حانشانىڭ اتىمەن بوپاي اتالادى. جەر اتاۋلارى سويلەسىن.