اقسايدا توعىز قاباتتى ءۇيدىڭ قابىرعاسىندا اباي بەينەلەندى

ورال. قازاقپارات - اقساي قالاسىندا توعىز قاباتتى ءۇيدىڭ قابىرعاسىنا ۇلى ابايدىڭ سۋرەتى سالىندى، دەپ حابارلايدى قازاقپارات ءتىلشىسى.

مۋرالدىڭ جانىنا ادامزاتتى ادالدىققا، ىزگىلىك اتاۋلىعا شاقىراتىن اقىن ولەڭىنىڭ جولدارى جازىلعان. كومپوزيتسيانىڭ اشىلۋ راسىمىنە قاتىسقان اۋدان اكىمى ميرجان ساتقانوۆ ابايدىڭ 175 جىلدىعىنا وراي 175 ءىس-شارانىڭ جىل سوڭىنا دەيىن جالعاساتىنىن جەتكىزدى.

اتالمىش شاراعا ق ر سىبايلاس جەمقورلىققا قارسى ءىس-قيمىل اگەنتتىگىنىڭ بقو بويىنشا دەپارتامەنتى باستاماشى بولدى.

«ابايدىڭ «پايدا ويلاما، ار ويلا» دەگەن ءسوزى قازىرگى تاڭدا دا ءمان-ماڭىزىن جويعان جوق. الداعى ۋاقىتتا تۇرعىنداردى ادال ءومىر سۇرۋگە ۇندەيتىن مۋرالدار مەن بيلبوردتار باسقا اۋدانداردا دا بوي كوتەرەدى. ۇلى تۇلعالارىمىزدىڭ دانالىق سوزدەرى كەيىنگى ۇرپاققا وي سالىپ، ادالدىقتىڭ اق ءجىبىن اتتاماۋىنا سەپتەسەتىن بولادى»، دەدى دەپارتامەنت باسشىسىنىڭ ءبىرىنشى ورىنباسارى نۇرداۋلەت سامەت.

«اقجايىق - ادالدىق الاڭى» جوباسى اياسىندا سالىنعان مۋرالدىڭ دەمەۋشىلەرى - «RENKO» جانە «ايالا» ج ش س. ۇلى اقىننىڭ بەينەسىن سالۋعا داريا جانە ياكوۆ پولەشۋك 15 كۇن ۋاقىتىن جۇمساعان. ابايدىڭ جان دۇنيەسىن، ىشكى تولعانىسىن كورسەتۋ ءۇشىن سۋرەتشىلەر قويۋ قانىق تۇستەردى كوبىرەك پايدالانعان. مۋرالدى تۇنگى مەزگىلدە جارىقتاندىرۋ دا قاراستىرىلعان. ەندى قالا تۇرعىندارى مەن قوناقتارى 10-شاعىناۋداننان اباي بەينەسىن كورىپ تۇراتىن بولادى.

ەسكە سالا كەتەيىك، بۇدان بۇرىن اقسايدا كوپقاباتتى ءۇيدىڭ قابىرعاسىنا باتىرحان شۇكەنوۆتىڭ سۋرەتى سالىنعانىن جازعان بولاتىنبىز.