حالىق تابىسىنا ىقپال ەتەتىن جىگەرلى شەشىمدەر جاسالدى - دانيا ەسپايەۆا
«مەملەكەت باسشىسىنىڭ بيىلعى جولداۋى الەۋمەتتىك سالانى، سونداي- اق ەكونوميكالىق بلوكتاعى رەفورمالارعا قاتىستى ناقتى مىندەتتەردى ايقىندادى. ۇسىنىلعان رەفورمالاردىڭ ءبىرى باسەكەلەستىكتى قورعاۋ جانە دامىتۋ اگەنتتىگىن قۇرۋعا قاتىستى بولدى. بۇل ءوز كەزەگىندە قالىپتاسقان جاعدايدا قاجەت بولىپ تۇرعان شەشىم ەدى. ەكونوميكاداعى مونوپوليزاتسيالانۋدىڭ جالعاسۋى جالپى ەكونوميكا مەن قوعامنىڭ ارى قاراي داماۋىنا توسقاۋىل بولاتىنى انىق. وسى ورايدا قايتا قۇرىلعان اگەنتتىك كونتسەنتراتسيانىڭ وزگەرۋى مەن نارىق قاتىسۋشىلارىنىڭ قىسقارۋىنا الىپ كەلگەن سالىقتىق ءارى قارجىلىق جانە باسقا دا شامادان تىس تالاپتارى بار سەكتورلاردا مەملەكەتتىك رەتتەۋدى قايتا قاراستىرۋمەن اينالىسادى دەپ ويلايمىن»، - دەدى د. ەسپايەۆا.
ونىڭ ايتۋىنشا، توتەنشە جاعدايدى ەنگىزۋ اياسىندا پرەزيدەنت ەكونوميكا مەن كاسىپورىنداردى ساقتاۋعا ءارى جاندانداندىرۋعا، سونداي- اق حالىق تابىسىن قالپىنا كەلتىرۋگە ىقپال ەتەتىن ءبىرقاتار شاراعا قاتىستى جىگەرلى شەشىم جاسادى. بۇل شارالار بيزنەستى قولداۋعا باعىتتالىپ، سالىقتىق جانە نەسيەلىك ىنتالاندىرۋ تۇرىندەگى قولداۋ ەسكەرىلدى. سايكەسىنشە، ءتيىستى قادامدارعا مەملەكەت تاراپىنان قوماقتى قاراجات ءبولىنىپ، وڭتايلى ناتيجە بولدى.
«مەنىڭ ويىمشا، بيىل قىركۇيەكتە جاريالانعان جولداۋ شاعىن جانە ورتا بيزنەستى قورعاۋعا ىقپال ەتەتىن بولادى. سەبەبى وسى تۇرعىدا قاجەتتى شەشىمدەر پىسىقتالعانى انىق. بانك سەكتورىندا قىزمەت ەتكەن مامان رەتىندە زارداپ شەككەن شاعىن جانە ورتا بيزنەس سەكتورلارىنىڭ بارلىق نەسيەلەرى بويىنشا پايىزدىق مولشەرلەمەلەردى سۋبسيديالاۋدى قولدايمىن»، - دەدى دەپۋتات.
ونىڭ سوزىنە قاراعاندا، توتەنشە جاعداي ەنگىزىلگەننەن بەرى جانە كارانتين مەرزىمىندە «اق جول» پارتياسى كاسىپكەرلەرگە ناقتى كومەك جاساۋ بويىنشا ۇكىمەتكە بىرنەشە مارتە وتىنىمدەر جولدادى.
«سوندىقتان پرەزيدەنتتىڭ ەكونوميكانىڭ زارداپ شەككەن بارلىق سەكتورلارىندا قولدانىستاعى كرەديتتەرى بويىنشا پايىزدىق ستاۆكالاردى جىلدىق 6 پايىزعا دەيىن مەملەكەتتىك سۋبسيديالاۋ ارقىلى قوسىمشا كومەك كورسەتۋ شەشىمى قازىرگى جاعدايدا ناقتى قولداۋ بولىپ وتىر»، - دەدى د. ەسپايەۆا.
ونىڭ پايىمىنشا، بيزنەستى قولداۋدىڭ بارلىق شارالارى حالىق تابىسىنىڭ ارتۋىنا ىقپال ەتەدى ءارى دەر كەزىندە جاسالۋدا. الايدا، قابىلدانىپ وتىرعان شارالاردىڭ ماڭىزدىلىعىن ەسكەرە وتىرىپ، «اق جول» پارتياسى شاعىن جانە ورتا بيزنەستى مەملەكەتتىك قولداۋ قادامدارىن جەتىلدىرۋ قاجەت دەپ سانايدى. بۇدان بولەك دەپۋتات ستراتەگيالىق جوسپارلاۋ جانە رەفورمالار اگەنتتىگىنىڭ قۇرىلۋىنا قاتىستى پىكىر ءبىلدىردى.
«اتالعان اگەنتتىكتى قۇرۋ ەكى ماڭىزدى ماقساتتى قامتيدى دەپ ويلايمىن. بۇل تۇرعىدا مەملەكەتتىڭ ۇزاقمەرزىمدى ەكونوميكالىق ءارى الەۋمەتتىك ساياساتىن، سونداي- اق مينيسترلەر كابينەتى جۇمىسىنا باعالاۋ جۇرگىزۋدى قامتاماسىز ەتەدى»، - دەپ اتاپ ءوتتى د. ەسپايەۆا.