قوستانايدا جۇمىرتقا باعاسى كۇرت قىمباتتادى
قوستاناي تۇرعىندارى جۇمىرتقانىڭ قىمباتتاۋىن ەلدى مەكەندەردەگى كارانتين مەن ارقالىقتاعى قۇس فابريكاسىنىڭ ۋاقىتشا جابىلىپ قالۋىمەن بايلانىستىرادى. سەبەبى، قىركۇيەك ايىندا ساۋدا ورتالىقتارىندا «جاس قانات» فابريكاسىنان شىعاتىن 1-ساناتتاعى 10 دانا جۇمىرتقا 280-285 تەڭگە تۇرسا، قازىرگى باعاسى 360-370 تەڭگەگە جەتكەن.
ايتا كەتەيىك، قوستاناي وبلىسىندا قۇس تۇماۋى تاراعان 8 ەلدى مەكەندە كارانتين جاريالاندى.
«قوستاناي قالاسىنىڭ ورتالىق بازارىندا دا وسى جاعداي. جۇمىرتقانىڭ ىرىكتەلگەن، جوعارى سۇرىپتى تۇرلەرى سوڭعى اپتا ىشىندە بىرنەشە رەت كوتەرىلدى. بۇرىنعىدان 60-70 تەڭگەگە ءوسىپ كەتكەن. اۋىلدار كارانتينگە جابىلدى عوي. باعانىڭ ءوسۋى سودان بولۋى ءتيىس»، - دەيدى قالا تۇرعىنى گۇلنۇر مەيرام قىزى.
ال قوستاناي قالالىق اكىمدىگىنىڭ وكىلدەرى بۇل جاعداي جۇمىرتقانىڭ قىمباتتاۋىنا اسەر ەتكەن جوق دەپ وتىر.
«جۇمىرتقا باعاسى اسا قاتتى قىمباتتاعان جوق. قازىر تۇراقتاندىرۋ قورىندا بەلگىلەنگەن جۇمىرتقا باعاسى 270-280 تەڭگەنىڭ توڭىرەگىندە. ال نارىقتاعى باعانىڭ ازداپ وسۋىنە باسقا جاعدايلار ىقپال ەتىپ وتىر. قازىر قۇستىڭ جەمى قىمباتتادى، كوممۋنالدىق قىزمەت باعاسى ءوستى. بۇعان قۇس تۇماۋىنىڭ قاتىسى بار دەپ رەسمي تۇردە ايتا المايمىز. باعانى تۇراقتاندىرۋدا اۋىلشارۋاشىلىعى جارمەڭكەسىنىڭ ماڭىزى زور. قوستانايدا 17-قازاندا جارمەڭكە وتكىزۋدى جوسپارلاپ وتىرمىز. سول كەزدە 10 دانا جۇمىرتقا 270 تەڭگەدەن ساتىلاتىن بولادى»، - دەدى قوستاناي قالاسى اكىمدىگىنىڭ كاسىپكەرلىك ءبولىمىنىڭ جەتەكشىسى يلونا تيموشەنكو.
ەسكە سالا كەتەيىك، بۇگىن ارقالىق قالاسىنداعى قالا قۇراۋشى كاسىپورىن «اگروينتەرقۇس» ج ش س جۇمىسىن ۋاقىتشا توقتاتتى.