مەملەكەتتىك قوردىڭ اكتيۆتەرى نەلىكتەن تومەندەپ كەتتى

الماتى. قازاقپارات - ۇلتتىق بانك ءتوراعاسىنىڭ ورىنباسارى ءاليا مولدابەكوۆا ۇلتتىق قوردىڭ ديناميكاسى جانە ونىڭ اكتيۆتەرىنىڭ مولشەرىنە اسەر ەتەتىن فاكتورلار تۋرالى ايتتى، دەپ حابارلايدى قازاقپارات ءتىلشىسى.

الدىن الا دەرەكتەرگە قاراعاندا، ۇلتتىق قوردىڭ ۆاليۋتالىق اكتيۆتەرى اي قورىتىندىسىندا 1,4 ميلليارد دوللارعا تومەندەپ، قىركۇيەكتىڭ سوڭىندا 57,3 ميلليارد دوللار بولعان.

«قىركۇيەكتە 230 ميلليارد تەڭگە سومادا بيۋدجەتكە كەپىلدى ترانسفەرتتەردى ءبولۋ بويىنشا مىندەتتەمەلەردى ورىنداۋ ءۇشىن ۇلتتىق قوردىڭ ۆاليۋتالىق اكتيۆتەرىن شامامەن 551 ميلليون دوللار سومادا ساتۋ ۇلتتىق قورى مولشەرىنىڭ تومەندەۋ سەبەبىنىڭ ءبىرى بولدى»، - دەيدى ءاليا مولدابەكوۆا.

ونىڭ ايتۋىنشا، مۇنايدىڭ سالىستىرمالى تۇردە تومەن باعاسىنىڭ ساقتالۋى سەبەبىنەن ۆاليۋتالىق ءتۇسىم 43 ميلليون دوللار عانا بولدى.

«ەكونوميكالىق بەلسەندىلىكتىڭ قالپىنا كەلۋى جانە كورونوۆيرۋستان جاقىن ارادا ۆاكسينا پايدا بولۋى جونىندەگى پوزيتيۆتىك كۇتۋلەر اياسىندا جەتەكشى الەمدىك يندەكستەر پاندەميا باستالعانعا دەيىنگى ماندەرگە قايتا ورالدى. ناتيجەسىندە، تامىزدىڭ سوڭىنداعى جاعداي بويىنشا جىل باسىنان بەرى ۇلتتىق قوردىڭ ينۆەستيسيالىق كىرىسى شامامەن 2,3 ميلليارد ا ق ش دوللارى، ال ونىڭ كىرىستىلىگى %4,2 عا جۋىق بولدى. الايدا، COVID-19 ەكىنشى رەت قايتالانۋى جونىندە قاۋىپتەنۋ قىركۇيەكتە نارىقتى تاعى دا تومەندەتتى، MSCI دامىعان ەلدەرىنىڭ اۋقىمدى اكسيالار نارىعىنىڭ يندەكسى %3,6 عا ازايدى. ا ق ش دوللارىنىڭ نىعايۋىنا بايلانىستى اۋقىمدى مەملەكەتتىك وبليگاتسيالار پورتفەلىنىڭ تەرىس كىرىستىلىگى 0,68% كورسەتتى»، - دەپ اتاپ ءوتتى ول.

مۇنىڭ سالدارىنان ۇلتتىق قوردىڭ ينۆەستيتسيالىق كىرىسى قىركۇيەكتە تەرىس بولدى (-850 ميلليون دوللار). قوردىڭ جالپى ينۆەستيسيالىق كىرىسى جىل باسىنان باستاپ وڭ بولىپ قالا بەرەدى جانە شامامەن 1,5 ميلليارد دوللاردى قۇرايدى.