قازاقستان كوروناۆيرۋس ۆاكتسيناسىن جەتكىزۋ ءۇشىن الەۋەتتى وندىرۋشىلەرمەن جۇمىس جۇرگىزىپ جاتىر

نۇر-سۇلتان. قازاقپارات - قازاقستان كوروناۆيرۋسقا قارسى ۆاكتسيناعا قاجەتتىلىگىن قامتاماسىز ەتۋ ءۇشىن الەۋەتتى وندىرۋشىلەرمەن جۇمىس جۇرگىزىپ جاتىر.

بۇل تۋرالى ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.

«مينيسترلىك جەرگىلىكتى اتقارۋشى ورگاندارمەن بىرلەسىپ، اۋرۋ ورشىگەن جاعدايدا حالىقتىڭ مەديتسينالىق كومەككە قولجەتىمدىلىگىن قامتاماسىز ەتۋگە باعىتتالعان ءبىرقاتار شارانى جۇزەگە اسىرىپ جاتىر. حالىقتىڭ ءالسىز توپتارىن ۆاكسيناتسيالاۋ ءۇشىن تۇماۋعا قارسى 2,2 ميلليون دوزا ۆاكتسينا ساتىپ الىندى. ۆاكتسيناتسيالاۋ 15-قىركۇيەكتە باستالىپ، بۇگىنگى كۇنى 1,5 ميلليوننان استام ادام ەگىلدى. ەلدىڭ كوروناۆيرۋسقا قارسى ۆاكسيناعا قاجەتتىلىگىن قامتاماسىز ەتۋ ءۇشىن الەۋەتتى وندىرۋشىلەرمەن جۇمىس جۇرگىزىلىپ جاتىر. ۆاكتسيناتسيالاۋعا جاتاتىن حالىقتىڭ الدىن الا سانى 2,8 ميلليون ادامدى نەمەسە تۇرعىنداردىڭ 15 پايىزىن قۇرايدى»، - دەدى مينيستر اقوردادا مەملەكەت باسشىسى قاسىم- جومارت توقايەۆتىڭ توراعالىعىمەن وتكەن كەڭەستە.

سونىمەن قاتار ول كارانتين شارالارىنىڭ ورىندالۋىن باقىلاۋ جۇمىستارى جۇرگىزىلىپ جاتقانىن ايتتى.

«مونيتورينگ توبىنىڭ جۇمىسى بارىسىندا 17-تامىزدان بەرى 14812 رەيد جۇرگىزىلىپ، 5147 نىساندا كارانتين رەجيمىن بۇزۋ انىقتالدى. كارانتين رەجيمىن نەگىزگى بۇزۋشىلىقتار - بۇل ادامدار كوپ جينالاتىن شارالار وتكىزۋ، ماسكا رەجيمىن بۇزۋ، الەۋمەتتىك اراقاشىقتىق ساقتاماۋ جانە انتيسەپتيىكتەردىڭ بولماۋى. كارانتين رەجيمىن بۇزۋشىلارعا جالپى سوماسى 300 ميلليون تەڭگەدەن اساتىن 5160 تان استام اكىمشىلىك ايىپپۇل سالىندى»، - دەدى الەكسەي سوي.