وزبەكستاننان قازاقستانعا قانداي تاۋارلار كوپ ەكسپورتتالادى
«2020 -جىلدىڭ 1-قىركۇيەگىندەگى دەرەكتەر بويىنشا، وزبەكستاننىڭ شەت ەلدەرگە ەكسپورتتاعان جيھاز ونىمدەرىنىڭ جالپى سوماسى 2 ميلليون دوللاردى قۇرادى. بۇل 2019 -جىلدىڭ وسى كەزەڭىمەن سالىستىرعاندا 841 مىڭ دوللارعا كوپ. سوڭعى سەگىز ايدا ەكسپورتتالعان جيھاز ونىمدەرىنڭ ەڭ كوپ ۇلەسى قازاقستانعا (763,9 مىڭ دوللار)، قىرعىزستانعا (619,3 مىڭ دوللار)، تاجىكستانعا (294,2 مىڭ دوللار) جانە رەسەيگە (146,6 مىڭ دوللار) تيەسىلى»، - دەپ مالىمدەدى وزبەكستان رەسپۋبليكاسىنىڭ مەملەكەتتىك ستاتيستيكا كوميتەتى.
سونداي-اق، 8 اي قورىتىندىسى بويىنشا وزبەكستاننان قازاقستانعا ەكسپورتتالعان شىنى ىدىستار مەن شىنى بۇيىمداردىڭ جالپى سوماسى 7,4 ميلليون دوللاردى قۇراعان.
«2020 -جىلى وزبەكستان 14 مەملەكەتكە 11,6 ميلليون دوللاردىڭ شىنى ىدىستارى مەن شىنى بۇيىمدارىن ەكسپورتتادى. ونىڭ باسىم بولىگى قازاقستان (7,4 ميلليون دوللار)، تۇرىكمەنستان (1,9 ميلليون دوللار)، تاجىكستان (976,5 مىڭ دوللار)، قىرعىزستان (589,7 مىڭ دوللار)، گرۋزيا (435,4 مىڭ دوللار) جانە رەسەي فەدەراتسياسى (204,1 مىڭ دوللار) ۇلەسىنە كەلدى»، - دەپ جازدى وزبەكستان رەسپۋبليكاسىنىڭ مەملەكەتتىك ستاتيستيكا كوميتەتى. بۇدان وزگە، 8-اي ىشىندە قازاقستان وزبەكستانعا 47,7 ميلليون ليتر بەنزين ەكسپورتتاعان.
«2020 -جىلدىڭ 1-قىركۇيەگىندەگى مالىمەتتەر بويىنشا، وزبەكستان شەت ەلدەردەن 90,1 ميلليون ليتر بەنزين يمپورتتادى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 87 ميلليون ليترگە ارتىق. وزبەكستان جانار- جاعارمايدى ەڭ كوپ كولەمدە قازاقستاننان (47,7 ميلليون ليتر)، رەسەيدەن (36,5 ميلليون ليتر)، تۇرىكمەنستاننان (5,6 ميلليون ليتر) جانە قىرعىزستاننان (232,1 مىڭ ليتر) ساتىپ الدى»، - دەپ ءمالىم ەتتى وزبەكستاننىڭ مەملەكەتتىك ستاتيستيكا كوميتەتى.
اۆتور: ءاليحان اسقار ۇلى