«سارى كوبەلەك ساعىنىش» اتتى حالىقارالىق جىر ءمۇشايراسى وتەدى

نۇر- سۇلتان. قازاقپارات - تاۋەلسىزدىك مەرەكەسىنە وراي اقىن، ساعىنىشتىڭ سيمۆولىنا اينالعان شايىر- جىراۋ، «الاش» ادەبي سىيلىعىنىڭ يەگەرى جاركەن بودەش ۇلىنىڭ شىعارماشىلىعىنا ارنالعان «سارى كوبەلەك ساعىنىش» اتتى حالىقارالىق جازبا اقىندار ءمۇشايراسى وتەدى.

ءمۇشايرانى دۇنيەجۇزى قازاقتارىنىڭ قاۋىمداستىعى، «وتانداستار قورى» ك ە ا ق جانە «Alash-CUP» قايىرىمدىلىق قورى بىرلەسىپ ۇيىمداستىرىپ وتىر.

«ەلباسى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى ماقالاسىندا «ادام بالاسى - شەكسىز زەردەنىڭ عانا ەمەس، عاجايىپ سەزىمنىڭ يەسى. تۋعان جەر - اركىمنىڭ شىر ەتىپ جەرگە تۇسكەن، باۋىرىندا ەڭبەكتەپ، قاز باسقان قاسيەتتى مەكەنى. تالاي جاننىڭ ءومىرباقي تۇراتىن ولكەسى. ونى قايدا جۇرسە دە جۇرەگىنىڭ تۇبىندە الديلەپ وتپەيتىن جان بالاسى بولمايدى» دەپ اتاپ وتكەندەي، تۋعان جەرگە ساعىنىش - ەت جۇرەكتى پەندەنىڭ جۇرەك تۇكپىرىندەگى ءلۇپىلى. ال ونىڭ اقىندار ساناسىن بۇلقىندىرىپ، جىر بولىپ ورىلمەۋى مۇمكىن ەمەس. وسى تۇرعىدان قاراعاندا شەتەلدەن كەلگەن، تۋعان جەرى جاتتىڭ مەنشىگىندە قالعان قازاق اقىندارىنىڭ جان سەزىمى ايتپاسا دا تۇسىنىكتى. تۋعان جەرىن جارتى عاسىر جىرلاعان جاركەن اقىننىڭ «جاۋىر بولعان» ساعىنىش دەرتى جىرقۇمار تالاي جاستىڭ جۇرەگىن شىمشىلاعان عاجايىپ سەزىمگە ۇلاسقانى انىق. بۇل شارانىڭ ماقساتى - جاس ۇرپاقتىڭ ساناسىندا جاركەن بودەش ۇلىنىڭ شىعارماشىلعىن ناسيحاتتاۋ، جاستار شىعارماشىلىعىن قولداۋ كورسەتۋ»، - دەيدى جوبا اۆتورى، وتانداستار قورىنىڭ مەنەدجەرى تالاپبەك تىنىسبەك ۇلى.

ءمۇشايراعا قىرىق جاسقا دەيىنگى اقىندار ەكى ولەڭىمەن قاتىسا الادى. ءبىرىنشى ولەڭى اقىن جاركەن بودەش ۇلىنىڭ شىعارماشىلىعىنا، اقىندىق بولىمىسىنا، تۇلعالىق كەلبەتىنە ارنالۋى مىندەتتى. ەكىنشى ولەڭ ساعىنىش، تۋعان جەر تاقىرىبىندا بولماق. شىعارمالار ءبىرىنشى جەلتوقسانعا دەيىن [email protected] ەلەكتروندى پوشتاسىنا قابىلدانادى. ءمۇشايرا قورتىندىسى قازىلار القىسىنىڭ شەشىمىمەن تاۋەلسىزدىك كۇنى قارساڭىندا جاريالانىپ، جەڭىمپازداردى سالتاناتتى ماراپاتتاۋ ءراسىمى وتكىزىلمەك.

اۆتور: ريزابەك نۇسىپبەك ۇلى