يندونەزيانىڭ بۋتون ارالىندا سىرت كەلبەتى وزگەشە تايپا تۇراتىنى انىقتالدى
دەرەككوز مالىمەتىنشە، ەرەكشە كەلبەتتى ادامداردى يندونەزيالىق گەولوگ كورچينا پاساريبۋ تاپقان ەكەن.
گەولوگ 2019 -جىلدان بەرى يندونەزيانىڭ اۋىلدىق جەرلەرىندەگى ومىرگە قىزىعۋشىلىق تانىتقان. سوسىن ول تايپالار مەن مادەني مۇرالارعا ەرەكشە نازار اۋدارا باستادى.
ەر ادام وسى جىلدىڭ 17-قىركۇيەگىندە بۋتون ارالىنا بارىپ، ونداعى جەرگىلىكتى تۇرعىنداردى سۋرەتكە تۇسىرگەن.
«كوك كوزدىلەر - ەرەكشە جانە ادەمى. ولار ماعان شابىت بەردى. كوك - مەنىڭ ەڭ سۇيىكتى ءتۇسىم»، - دەيدى كورچينا پاساريبۋ.
ونىڭ ايتۋىنشا، بۋتون ارالىنىڭ تۇرعىندارى سۋرەتكە تۇسۋدەن باس تارتپاعان، كەرىسىنشە قۋانا قارسى العان.
ەر ادام ولاردىڭ سۋرەتىن Instagram جەلىسىندەگى پاراقشاسىندا جاريالادى.
مامانداردىڭ سوزىنە قاراعاندا، كوزدىڭ مۇنداي ءتۇسى سيرەك كەزدەسەتىن گەنەتيكالىق اۋرۋ سالدارىنان پايدا بولدى. ونى ۆااردەنبۋرگ سيندرومى دەپ اتايدى ەكەن. مۇنداي اۋرۋعا شالدىققان ادامنىڭ بەت تەرىسىنىڭ ءتۇسى، شاشى، كوزى وزگەرىپ، ەستۋ قابىلەتىنەن ايىرىلاتىنى ايتىلادى.
