قازاق اقساقالى موڭعوليا پارلامەنتىنىڭ سپيكەرىنە قامشى سىيلادى - شەتەلدەگى قازاق ءتىلدى ب ا ق- قا شولۋ

None
None
نۇر- سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاق اقساقالى موڭعوليا پارلامەنتىنىڭ سپيكەرىنە قامشى سىيلادى - KAZNEWS

موڭعوليا پارلامەنتىنىڭ سپيكەرى گومبوجاۆىن زاندانشاتار 28 - قىركۇيەكتە بايان- ولگەي ايماعىنا جۇمىس ساپارىمەن باردى، دەپ حابارلايدى موڭعوليالىق KAZNEWS اقپاراتتىق پورتالى.

اتالعان ب ا ق- تىڭ جازۋىنشا، سپيكەر ءوزىنىڭ الەۋمەتتىك جەلىسىندەگى پاراقشاسىندا تومەندەگىدەي جازبا قالدىرىپتى.

«بايان- ولگەيدە تۇرعىندارمەن كەزدەسۋ كەزىندە اكەمنىڭ سىنىپتاسى، ەڭبەك سىڭىرگەن اگرونومشى راحادىل جانە اكەممەن بىرگە «چانداگان» بىرلەستىگىندە جۇمىس ىستەگەن تراكتورشى ايىپحان وزدەرىنىڭ جاقسى ەستەلىكتەرىمەن ءبولىسىپ، ماعان جاقسىلىق پەن تابىس تىلەدى. راحادىل اقساقال قازاقتىڭ قامشىسىن سىيعا تارتتى. ول قامشىنىڭ ەلدە ادىلدىكتى، ءتارتىپتى ساقتاۋ ءۇشىن قاجەت بولاتىنىن ايتتى. اكەمنىڭ دوستارىنىڭ باتاسىن قابىل الىپ، ادىلەتتىلىك جولىندا ءوزىمدى دە قامشىلاپ جۇرەتىن بولامىن» - دەلىنگەن.

شاۆكات ميرزيايەۆ نۇكىس قالاسىنداعى جىراۋلار مەكتەبىنە باردى - «ءو ز ا» اقپاراتتىق اگەنتتىگى

قاراقالپاقستان رەسپۋبليكاسىنا بارعان وزبەكستان پرەزيدەنتى شاۆكات ميرزيايەۆ نۇكىس قالاسىندا جاڭادان اشىلعان وپەرا جانە جىراۋلار مەكتەپ- ينتەرناتىنا باردى، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

اتالعان ب ا ق- تىڭ جازۋىنشا، وپەرا جانە جىراۋلىق مەكتەپ- ينتەرناتىنىڭ بۇل ورتادا اشىلۋىنا قاراقالپاق ەلىنىڭ وزىنە ءتان ءداستۇرلى جىراۋلىق ماقامىنىڭ ساقتالۋى تۇرتكى بولعان. سونىڭ نەگىزىندە بۇل جەردەن وزبەكستان جانە قاراقالپاقستاننىڭ حالىق جىراۋلارى مەن ەڭبەك سىڭىرگەن ارتىستەر شىققان.

«جىراۋلىق ءداستۇردى جالعاستىرىپ، ونى جاس ۇرپاققا جەتكىزۋگە قىزمەت ەتۋ ماقساتىندا جاڭادان بوي كوتەرگەن مەكتەپ، وتكەن ايدا پايدالانۋعا بەرىلگەن. ءداستۇرلى ءبىلىم ورداسى 150 ورىنعا ارنالعان. مۇندا 9-شى سىنىپتى اياقتاعان دارىندى وقۋشىلار كونكۋرستىق نەگىزدە قابىلدانادى. قازىرگى ۋاقىتتا 30-عا جۋىق ۇل مەن قىز وقۋدى باستاپ، ولارعا بەلگىلى ونەر شەبەرلەرى مەن تاربيەشىلەرى ساباق بەرۋدە»، - دەپ جازادى ءو ز ا.

اقپارات كوزىنىڭ جازۋىنشا، جاڭادان اشىلعان مەكتەپپەن ارنايى بارىپ تانىسقان وزبەكستان پرەزيدەنتى شاۆكات ميرزيايەۆ «مۇنداي مەكتەپتەردى اشۋدىڭ باستى ماقساتى - تاريحىمىزدى، مادەنيەتىمىزدى زەرتتەۋ، ءداستۇرىمىزدى ءتۇسىنۋ. جىراۋلىق - بۇل قاراقالپاق حالقىنىڭ تاماشا ءداستۇرى، ءبىز ونىڭ دامۋىنا بارلىق جاعداي جاسايمىز» - دەپ ءوز باعاسىن بەرگەن.

تابيعاتتىڭ «ءتۇس بوياۋى» كۇز كورىنىسىن ارلەندىردى – تيانشاننەت

التاي تاۋلارىنىڭ باتىس سولتۇستىك بولەگىندە ورنالاسقان «قاناس كولىندە» تابيعاتتىڭ «ءتۇس بوياۋى» كۇز كورىنىسىن ارلەندىردى، دەپ جازادى قىتايلىق kazakh.ts.cn پورتالى.

«التاي ايماعىنداعى «قاناس كولى» تۋريستىك زوناسى ءبىر جىلداعى مىڭ قۇلپىرىپ، ءجۇز تۇرلەنگەن ەڭ تاماشا مەزگىلگە ءوتتى. سارى، جاسىل رەڭى ارالاس اعاشتار اراسىندا كوگىلدىر وزەن باياۋ اعىپ جاتىر. الۋان ءتۇستى اعاشتاردىڭ ساعىمى كوگىلدىر وزەن بەتىندە قىزىل، سارعىلىت، سارى، جاسىل، كوك ءتۇس بولىپ قۇبىلدى. وسىلايشا تابيعاتتىڭ «ءتۇس بوياۋى» قاناس ءوڭىرىن ماي بوياۋلى سۋرەتتەي ارلەپ، كۇزدىڭ ءسانىن كىرگىزدى. نازارلارىڭىزعا وسى ەرەكشە تابيعات سىيىنىڭ كورىنىستەرىنەن فوتورەپورتاج ۇسىنامىز»، - دەپ جازادى «تيانشاننەت» اقپاراتتىق پورتالى.

ەسكە سالا كەتەيىك، قاناس كولى - قىتايدىڭ قازاقتار قونىستانعان التاي ايماعىنىڭ بۋىرشىن اۋدانىندا ورنالاسقان تۋريستىك زونا. قاناس وزەنى قورىقتاعى نەگىزگى وزەن. مۇزدى القاپتىڭ ەرۋى سالدارىنان تاۋ وزەنىنىڭ ارناسى كەڭەيىپ، تەرەڭدەپ كولگە اينالعان. كولەمى 44 مىڭ 780 شارشى مەتر. كولدىڭ ەڭ تەرەڭ جەرى 188.5 مەتر. قاناستىڭ اينالاسىن ءبىر- بىرىمەن جالعاسىپ، توبەسى مۇز قۇرسانعان شىڭدار قورشاپ تۇرادى. قالىڭ ورمان، كوكوراي شالعىن، جاپ- جاسىل بەتكەي، تۇپ- تۇنىق كول كوزدىڭ جاۋىن الادى.

پارسى ءتىلى اۋعانستاننىڭ ۇلتتىق ءتىلى رەتىندە جاريالاندى - «فارس» اقپارات اگەنتتىگى

اۋعانستان ۇكىمەتى پارسى ءتىلىن شەتەلدىك تىلدەر تىزىمىنەن الىپ تاستاپ، بۇل ءتىلدى ەلدىڭ ۇلتتىق تىلدەرىنىڭ ءبىرى رەتىندە جاريالادى، دەپ جازادى «فارس» اقپارات اگەنتتىگى.

«اۋعانستاننىڭ ۇلتتىق ستاتيستيكا جانە اقپارات باسقارماسىنىڭ باستىعى احماد دجاۆيد راسۋلي: «ەلدىڭ پارسى ءتىلدى ازاماتتارىنىڭ نارازىلىعىنا بايلانىستى پارسى ءتىلى شەت تىلدەر تىزىمىنەن الىنىپ، وسى ەلدىڭ ۇلتتىق تىلدەرىنە قوسىلدى. وسى ۋاقىتقا دەيىن اۋعانستاندا ەلەكتروندى جەكە كۋالىك فورماسىن تولتىرعان كەزدە پارسى جانە تاجىك تىلدەرى شەت تىلدەرى، ال ۋردۋ، پاندجابي، اراب، سيندي، موڭعول، قازاق جانە باسقا دا كەيبىر تىلدەر جەرگىلىكتى ءتىل رەتىندە كورسەتىلدى. بۇل ماسەلە پارسى ءتىلدى ازاماتتاردىڭ نارازىلىعىن تۋدىرعان»، - دەدى»، - دەپ جازادى Рarstoday

وزبەكستانداعى پالاۋدىڭ ەڭ قىمبات باعاسى بۇحارادا دايىندالادى - «ءو ز ا» اقپاراتتىق اگەنتتىگى

مەملەكەتتىك ستاتيستيكالىق كوميتەتىنىڭ وزبەكستان اۋماعىنداعى پالاۋ ورتالىقتارىندا وتكىزگەن باقىلاۋ قورىتىندىسىنا وراي ەلدەگى ەڭ قىمبات پالاۋ بۇحارا وبلىسىندا تىركەلگەن، دەپ جازادى وزبەكستاننىڭ «ءو ز ا» مەملەكەتتىك اقپاراتتىق اگەنتتىگى.

«بۇحارا وبلىسىندا ءبۇتىن ءبىر سالىم استىڭ باعاسى ورتاشا 18667 سۋمعا ساتىلۋدا.

(2020 -جىلدىڭ قىركۇيەك ايىنداعى باعا)

جوعارىداعى مالىمەتتەردى جيناقتاۋ بارىسىندا تەك تاڭدالعان قوعامدىق تاماقتانۋ ورىندارىنداعى (پالاۋ ورتالىعى) پالاۋدىڭ ورتاشا باعالارى عانا ەسكەرىلگەن بولىپ، مەيرامحانالار مەن رەستورانداعى باعانىڭ سومماسى قوسىلماعان»، - «ءو ز ا» اقپاراتتىق اگەنتتىگى.

تۇز كولىننەن شىعارىلعان تۇز 60 ەلگە ەكسپورت ەتىلدى – ت ر ت

تۇز كولىننەن شىعارىلعان تۇزدىڭ كوبى رەسەي مەن ا ق ش- تى قامتىعان افريكا جانە ەۋروپا ەلدەرىنە ەكسپورت ەتىلەدى، دەپ جازادى تۇركيا راديو تەلەۆيزيا پورتالى.

اتالعان ب ا ق- تىڭ جازۋىنشا، كويۋنجى تۇز كاسىپورنىنىڭ ايماقتىق ديرەكتورى احمەت سولاك ەڭ ءىرى نارىقتىڭ رەسەي ەكەنىن ءمالىم ەتكەن.

كاسىپورىن ءونىمىنىڭ 90 پايىزىن ەكسپورتقا شىعاراتىندارىن ايتقان احمەت سولاك: «وڭدەلمەگەن تۇزدىڭ دا 25 پايىزىن ەكسپورت ەتەمىز. قازىر 60 ەلگە تۇز ەكسپورت ەتۋدەمىز. تۇزدىڭ كوبىن رەسەي مەن اقش- تى قامتىعان افريكا جانە ەۋروپا ەلدەرىنە ساتۋدامىز» دەدى.

سولاك تۇركيانىڭ تۇز ەكسپورتىنىڭ جىل سايىن ارتقانىنا نازار اۋدارىپ، ەكسپورتتىڭ ۇلكەن ۇلەسى تۇز كولىنە ءتان ەكەنىن ءبىلدىردى. الەمدە تۇز كولىنە ۇقسايتىن 6 كول بولعانىن، مۇنىڭ ۇشەۋىنەن تۇز وندىرگەندەرىن حابارلاعان سولاك: «ەلىمىزدە كونيا، اكساراي جانە انكارانىڭ توعىسقان ايماعىنداعى تۇز كولى جابايى جانۋارلار ءومىرى ءۇشىن دە وتە ماڭىزدى. تۇز ءوندىرۋ شەكتەلگەن كولدىڭ وڭتۇستىگىندە قوقيقازدار جاز بويى قوناقتايدى. تۋريستەردىڭ دە مەكەنىنە اينالعان تۇز كولى اسىرەسە قيىر شىعىستان كەلگەن كوپتەگەن شەتەلدىك تۋريستەردى وزىنە باۋرايدى» دەدى.

قازاقستاننان چارتەرلىك رەيسپەن 95 ازامات كەلدى - KAZNEWS

28 - قىركۇيەكتە كەشكى ساعات 22:31- دە الماتى - ۇلانباتىر باعىتى بويىنشا «ءحۇننۇ ەير» اۋە كومپانياسىنىڭ ارنايى چارتەرلىك رەيسى «بۋيانت ۋحاا» حالىقارالىق اۋەجايىنا كەلىپ قوندى، دەپ جازادى موڭعوليالىق KAZNEWS اقپاراتتىق پورتالى.

«وسى ۇشاقپەن موڭعوليانىڭ 95 ازاماتى وتانىنا ورالدى. ازاماتتاردى ج ا ز ۇ ورتالىعىنا، اسكەري ورتالىق اۋرۋحانا جانە ءتوۆ ايماعىنىڭ باتسۇمبەر سۇمىنىندا ورنالاسقان قاريالاردىڭ دەمالىس ورتالىعىندا وقشاۋلادى. ۇشاقپەن كەلگەندەر موڭعوليا مەن قازاقستانعا كارانتين ەنگىزىلىپ، موڭعول- رەسەي شەكاراسى جابىلعانعا دەيىن جەكە ساپارمەن كەلىپ (جەرلەۋ راسىمىنە قاتىسۋ، ەمدەلۋ، جەكە ىستەرىمەن جانە تۋعان- تۋىسقاندارىنا كەلۋ)، وسى ەلدە قالۋعا ءماجبۇر بولعان ازاماتتار بولىپ تابىلادى»، - دەپ جازادى KAZNEWS اقپاراتتىق پورتالى.

اۆتور: باقىتجول كاكەش


سوڭعى جاڭالىقتار