ق ر پرەزيدەنتى ءبىرقاتار مەملەكەتتىڭ ەلشىلەرىنەن سەنىم گراموتالارىن قابىلدادى

نۇر- سۇلتان. قازاقپارات - بۇگىن «اقوردا» رەزيدەنتسياسىندا ءبىرقاتار شەت مەملەكەتتىڭ جاڭادان تاعايىندالعان توتەنشە جانە وكىلەتتى ەلشىلەرىنىڭ قازاقستان پرەزيدەنتى قاسىم- جومارت توقايەۆقا سەنىم گراموتالارىن تاپسىرۋ ءراسىمى ءوتتى، دەپ حابارلايدى قازاقپارات اقورداعا سىلتەمە جاساپ.

مەملەكەت باسشىسىنا بەلارۋس رەسپۋبليكاسىنىڭ ەلشىسى پاۆەل ۋتيۋپين، فينليانديا رەسپۋبليكاسىنىڭ ەلشىسى سويلي ماكەلاينەن- بۋحانيست، اۆستريا رەسپۋبليكاسىنىڭ ەلشىسى ۆيللي كەمپەل، ماجارستان ەلشىسى ميحاي ماتياش گالوشفاي سەنىم گراموتالارىن تاپسىردى.

قاسىم- جومارت توقايەۆ شەتەلدىڭ ديپلوماتيالىق ميسسياسى باسشىلارىمەن اڭگىمەلەسۋ بارىسىندا اتالعان ءتورت مەملەكەتتىڭ بارلىعىمەن قازاقستاننىڭ قارىم- قاتىناسى جاقسى جانە ءتۇرلى سالالارداعى ىقپالداستىق دەڭگەيى جوعارى ەكەنىن اتاپ ءوتتى. وسىعان بايلانىستى پرەزيدەنت مەملەكەتتەر اراسىنداعى ءتيىمدى ىنتىماقتاستىقتىڭ ودان ءارى دامي بەرەتىنىنە سەنىم ءبىلدىردى.

- سىزدەر ەۋروپانىڭ ءتورت مەملەكەتىنىڭ وكىلىسىزدەر. ەلىمىزدىڭ سىرتقى ساياسي تۇجىرىمداماسىندا ەۋروپامەن اراداعى قارىم- قاتىناستارعا ەرەكشە ءمان بەرىلدى. ەۋروپا قازاقستاندا ساياسي، ەكونوميكالىق ىنتىماقتاستىق جانە ينۆەستيتسيا تارتۋ ءىسى بويىنشا ماڭىزدى ءرول اتقارادى. ىنتىماقتاستىعىمىز ودان ءارى جالعاسا بەرەدى دەپ ويلايمىن. قازاقستان مەن سىزدەردىڭ ەلدەرىڭىز اراسىنداعى ىقپالداستىققا قوسىمشا سەرپىن بەرۋىمىز قاجەت، - دەدى مەملەكەت باسشىسى.

پرەزيدەنت كوروناۆيرۋس پاندەمياسىنا بايلانىستى مەملەكەتتىڭ مەيلىنشە كۇردەلى كەزەڭدى باستان وتكەرىپ وتىرعانىن ايتتى.

- ءبىز قازىرگى جاعدايدا ەكىجاقتى قاتىناستارعا دا، جاھاندىق ولشەمگە دە اسەر ەتەتىن جاڭا كۇن ءتارتىبىن قاراستىرۋىمىز كەرەك. ءبىز COVID-19 پاندەمياسىنىڭ قيىندىقتارى مەن سالدارىن ەڭسەرۋ ءۇشىن وسى سالادا ءوزارا تىعىز ىقپالداستىق ورناتامىز دەپ ۇمىتتەنەمىن، - دەدى قاسىم- جومارت توقايەۆ.

مەملەكەت باسشىسى ءوزىنىڭ قازاقستان حالقىنا ارناعان جىل سايىنعى جولداۋىندا ەلىمىزدى جاڭعىرتۋ، قوعامدىق ءومىردى دەموكراتيالاندىرۋ ماسەلەلەرىن قوزعاعانىن اتاپ ءوتىپ، ديپلوماتتاردى اتالعان سالاداعى بايلانىستاردى نىعايتۋعا ءتيىستى دەڭگەيدە ءمان بەرۋگە شاقىردى.

- ءوزارا تۇسىنىستىكتى نىعايتۋ ءۇشىن ەلىمىزدىڭ ۇكىمەتىنە دە، وزدەرىڭىزدىڭ ۇكىمەتتەرىڭىزگە دە كومەكتەسەسىزدەر دەپ ۇمىتتەنەمىن. قازىرگى ۋاقىتتا بۇل اسا ماڭىزدى. كوپتەگەن مەملەكەتتەردىڭ اراسىنداعى وسىنداي ءوزارا تۇسىنىستىكتىڭ جوقتىعى حالىقارالىق قاتىناستاردىڭ شيەلەنىسۋىنە الىپ كەلەدى. ماسەلەنىڭ ءمانى وسىندا، - دەدى مەملەكەت باسشىسى.

قاسىم- جومارت توقايەۆ ەلشىلەردى قازاقستانداعى ديپلوماتيالىق ميسسيالارىنىڭ رەسمي تۇردە باستالۋىمەن قۇتتىقتاپ، ولاردىڭ ەكىجاقتى قاتىناستاردى ءارى قاراي نىعايتۋ ىسىنە تابىس تىلەدى. سونىمەن قاتار ءوزىنىڭ ارىپتەستەرىنە - بەلارۋس، فينليانديا، اۆستريا جانە ماجارستان مەملەكەتتەرىنىڭ باسشىلارى مەن ۇكىمەتتەرىنىڭ جەتەكشىلەرىنە جۇرەكجاردى سالەمىن جولدادى.