ەرەكشە ءومىر سالتىن ۇستاناتىن ەگدە جاستاعى ەلوردالىقتار تۋرالى نە بىلەمىز
اتاۋلى كۇنگە وراي ەلىمىزدە جاسى ەگدە تارتسا دا، ەرەكشە ءومىر سالتىن ۇستاناتىن ەلوردالىقتار توپتاماسىن ۇسىنامىز دەپ جازادى نۇر-سۇلتان اكىمدىگىنىڭ رەسمي سايتى.
مارافونشى، پرەزيدەنتتىك كوپسايىستان قۇراما كوماندا مۇشەسى، 73 جاستاعى امەگۇلسىن مۇسىلمانوۆا سپورتتىڭ كوپ تۇرىنەن جارىستارعا قاتىسىپ تۇرادى. اتاپ ايتقاندا، شاڭعى، تاۋ ترەيلدەرى، كوپسايىس، كەرلينگ، تەننيس سەكىلدى سپورت تۇرلەرىنەن كوپتەگەن جارىستارعا قاتىسقان. «قالالىق، اۋداندىق، رەسپۋبليكالىق مارافوندارعا قالماي قاتىسۋعا تىرىسامىن. پرەزيدەنتتىك كوپسايىستان قۇراما مۇشەسى بولدىم. بارلىق جارىستاردان جۇلدەلى ورىن الىپ ءجۇرمىن. كوماندالىق، جەكە دە ەسەپتە ءبىرىنشى ورىنعا يە بولعان كەزدەر كوپ بولدى»، - دەدى امەگۇلسىن مۇسىلمانوۆا.
ول كۇندەلىكتى جاتتىعۋ جاساپ، نەمەرەسىمەن بىرگە 5-10 شاقىرىم جۇگىرەتىنىن ايتادى. «كۇندەلىكتى جاتتىعۋ جاسايمىن، نەمەرەممەن بىرگە 5-10 شاقىرىمداي جۇگىرەمىن. ونى دا جاتتىعۋعا باۋلىپ ءجۇرمىن. دۇرىس تاماقتانۋ دا ماڭىزدى. ءبىرىنشى ماماندىعىم دەنەشىنىقتىرۋ ءپانى ءمۇعالىمى بولعاندىقتان، ءومىر بويى سپورتپەن شۇعىلدانىپ كەلەمىن دەسەم دە بولادى»، - دەيدى ول.
امەگۇلسىن مۇسىلمانوۆا سوڭعى 8 جىلدا 6 ەلدى ارالاپ، 121 مارافونعا قاتىسقان. ونىڭ ەندىگى ماقساتى - 2021 -جىلى توكيودا وتەتىن ارداگەرلەر چەمپيوناتىنا قاتىسۋ. بۇگىندە ول بايراقتى باسەكەدە باق سىناۋ ءۇشىن دايىندىق جۇمىستارىن جۇرگىزۋدە.
ال، الماتى اۋداندىق ارداگەرلەر كەڭەسى پرەزيديۋمىنىڭ مۇشەسى باريوللا بۋرجۋمبايەۆتىڭ زەينەت جاسىنا شىققانىنا 10 جىلدان اسا ۋاقىت وتكەن. ول بوس ۋاقىتىن ءتيىمدى پايدالانىپ، قوعامدىق ءىس-شارالارعا ءجيى قاتىسا باستاعان.
«زەينەتكە شىققاننان كەيىن بوس ۋاقىتىم كوبەيدى. ال بوس كەزدە مەن جاي جاتقىم كەلمەيدى. سوندىقتان قوعامدىق ءىس- شارالارعا قاتىسىپ، بەلسەندى بولۋعا تىرىسامىن. كاستينگتەرگە بارىپ، ءوزىمدى اكتەر رەتىندە دە سىناپ ءجۇرمىن»، - دەدى قاريا.
باريوللا بۋرجۋمبايەۆ ءتۇرلى تەلەارنالار ۇسىناتىن الەۋمەتتىك بەينەروليكتەرگە، «اۋىلعا ساپار» سەريالىنىڭ ەپيزودتارىنا، مۇنايشىلار تۋرالى جاڭا تۇسىرىلگەن «چەرنوە مورە» فيلمىنە تۇسكەن. سونداي-اق بىلتىر «Qazaqstan» ۇلتتىق ارناسى كورسەتكەن «ەكى جۇلدىز» جوباسىندا اندەرگە قويىلاتىن دراماتۋرگيالىق قويىلىمدارعا دا قاتىسقان.
«ماعان جالپى كاستينگتەرگە بارىپ، ونەر كورسەتكەن ۇنايدى. قۇرىلىس سالاسىندا كوپ جىلدار بويى قىزمەت ەتتىم. ەندى جاڭا قىرىم اشىلىپ جاتىر. مەن مۇنداي جوبالارعا قارجى ءۇشىن بارمايمىن، تەك وزىمە قىزىق بولعان سوڭ عانا قاتىسامىن»، - دەدى باريوللا بۋرجۋمبايەۆ.
