پرەزيدەنت ەلوردا ۆولونتەرلەرىن «حالىق العىسى» مەدالىمەن ماراپاتتادى

نۇر-سۇلتان. قازاقپارات - ەلوردا اكىمى التاي كولگىنوۆ ۆولونتەرلەر مەن قالانىڭ بەلسەندى تۇرعىندارىنا «حالىق العىسى» مەدالدارىن تابىس ەتتى، دەپ حابارلايدى قازاقپارات.

«قالا تۇرعىندارى پاندەميا كەزىندە ۇيىمشىلدىق تانىتتى، جاقىندارىنا كومەكتەسىپ، Covid-19 ءدىڭ تارالماۋىنا وزدەرىنىڭ ۇلەسىن قوستى. ەرىكتىلەر باقىلاۋ-وتكىزۋ بەكەتتەرىندە كەزەكشىلىك اتقاردى، دەزينفەكتسيا جاساۋعا قاتىستى، جەدەل شتابتا دا جۇمىس ىستەدى. ازاماتتارىمىزدىڭ تۇرمىسى تومەن ساناتتارىنا ءدارى-دارمەك، ازىق-تۇلىك پەن قورعانۋعا ارنالعان زاتتاردى تاراتتى. بىرلەسكەن ەڭبەكتىڭ ارقاسىندا جاعدايدى تۇراقتاندىرا الدىق. مەملەكەت باسشىسى قايىرىمدىلىق، ۆولونتەرلىك ۇيىمدار جانە بيزنەس سالاسى وكىلدەرىمەن ونلاين كەزدەسۋدە قايىرىمدىلىق پەن ۆولونتەرلىك پاندەميا كەزىندە جالپى ۇلتتىق دەڭگەيگە جەتىپ، الەۋمەتتىك نورماعا اينالا باستاعانىن ايتتى. پرەزيدەنت ۆولونتەرلىك قىزمەتتى دامىتۋ، قايىرىمدىلىق جانە مەتسەناتتىقتى قولداۋ - مەملەكەتتىڭ ۇزاق مەرزىمدى باسىمدىعى ەكەنىن اتاپ ءوتتى»، - دەپ جازدى ا. كولگىنوۆ Instagram-دا.

قالا باسشىسى اتاپ وتكەندەي، ەلباسى باستاماسى بويىنشا قۇرىلعان «ءبىز بىرگەمىز» قورى مىڭداعان وتباسىعا قارجىلاي كومەك كورسەتتى، ەلوردالىقتار جوعارى الەۋمەتتىك جاۋاپكەرشىلىك تانىتتى.

«كەزدەسۋدە قۇرامىنا ۆولونتەرلىك ۇيىمدار مەن قوزعالىستاردىڭ بارلىق وكىلى كىرەتىن ءبىرىڭعاي پلاتفورما قۇرۋ ماسەلەسىن تالقىلادىق. بۇل ەشكىم شەت قالماس ءۇشىن مۇقتاج ادامدارعا جەكە-جەكە كومەك كورسەتۋگە مۇمكىندىك بەرەدى. بۇعان قوسا بولىنگەن كومەكتىڭ اشىقتىعى قامتاماسىز ەتىلەدى. سونداي-اق ۆولونتەرلىك ۇيىمداردى دامىتۋ جانە قولداۋدىڭ ءبىرقاتار باعىتى جايلى ءسوز قوزعادىق. بۇگىن پرەزيدەنت اتىنان بەلسەندى ەرىكتىلەر مەن ازاماتتارعا «حالىق العىسى» مەدالىن تابىستادىم. وسىنداي قيىن كەزەڭدە ايانباي ەڭبەك ەتىپ، ءوزارا جاردەمدەسكەندەرىڭىز ءۇشىن العىس ايتامىز»، - دەدى التاي كولگىنوۆ.