اسقار مامين ەۋرازيالىق دامۋ بانكىنىڭ باسقارما ءتوراعاسىن قابىلدادى

None
None
نۇر-سۇلتان. قازاقپارات - ق ر پرەمەر-ءمينيسترى اسقار مامين ەۋرازيالىق دامۋ بانكىنىڭ (ە ا د ب) باسقارما ءتوراعاسى نيكولاي پودگۋزوۆتى قابىلدادى، دەپ حابارلايدى قازاقپارات primeminister.kz-كە سىلتەمە جاساپ.

كەزدەسۋ بارىسىندا 2020-جىلعى ە ا د ب جۇمىسىنىڭ الدىن-الا قورىتىندىسى جانە بانكتىڭ بۇدان ارعى جۇمىسىنىڭ پەرسپەكتيۆالارى، ونىڭ ىشىندە قازاقستاندا ينۆەستيتسيالىق جوبالاردى ىسكە اسىرۋ كەلەشەگى تالقىلاندى.

«2020-جىلدىڭ 9 ايىندا ە ا د ب قازاقستاندا $314 ميلليون سوماسىنا جوبالاردى قارجىلاندىرۋعا قاتىستى، جىل سوڭىنا قاراي بۇل كورسەتكىشتى $335 ميلليونعا دەيىن جەتكىزۋ جوسپارلانعان.

قازاقستاندا ە ا د ب ينۆەستيتسياسىن تارتۋمەن ىسكە اسىرىلعان ءىرى جوبالاردىڭ ءبىرى تۇركىستان قالاسىندا جاڭا حالىقارالىق اۋەجايدىڭ سالىنۋى جانە «ۇلكەن الماتى اينالما اۆتوموبيل جولىن» سالۋ جانە پايدالانۋ جوباسى» بولدى.

قازاقستاندا بانك پورتفەلىندەگى جوبالاردىڭ جالپى كولەمى 2020-جىلدىڭ قورىتىندىسى بويىنشا $1,5 ميلليارد دەڭگەيىندە بولجانۋدا. ينۆەستيتسيالىق پورتفەلدىڭ سالالىق قۇرىلىمىندا ەڭ كوپ ۇلەستى ەنەرگەتيكا (%20)، كولىك (%20)، تاۋ-كەن ءوندىرىسى ونەركاسىبى (%23)، ماشينا جاساۋ (%5)، قارجى سەكتورى (%5) جوبالارى الادى.

قازاقستان ۇكىمەتىنىڭ باسشىسى ە ا د ب- نىڭ ا و ك، ونەركاسىپ، كولىك، ەنەرگەتيكا جانە ق ر ەكونوميكاسىنىڭ باسقا دا سالالارىنىڭ پەرسپەكتيۆالىق جوبالارىنا قاتىسۋىنىڭ ماڭىزدىلىعىن اتاپ ءوتتى. سونىمەن قاتار ءىرى ينفراقۇرىلىمدىق جوبالاردى قارجىلاندىرۋعا كۇش سالۋ جانە جوبا الدىنداعى قىزمەتكە باسا نازار اۋدارۋ قاجەت ەكەنىن اتاپ ءوتتى.

كەزدەسۋ بارىسىندا 2020-جىلعى ماۋسىمدا قۇرىلعان ە ا د ب سيفرلىق باستامالار قورىنىڭ جۇمىس ىستەۋ ماسەلەلەرى، سونداي-اق بانكتىڭ «قازاقستان - رەسەي» شەكارا ماڭى ىنتىماقتاستىعى باعدارلاماسىن ىسكە اسىرۋعا قاتىسۋ پەرسپەكتيۆالارى قارالدى.

بيىل جەلتوقسان ايىندا وتەتىن ءبىرىنشى ەۋرازيالىق كونگرەسكە دايىندىق بارىسى تالقىلاندى، ونىڭ باستى وقيعاسى ە ا ە و ەلدەرىنىڭ ۇكىمەتتەر باسشىلارىنىڭ «ەكونوميكالىق پراگماتيزم جانە ءوزارا تيىمدىلىك ەۋرازيالىق ەكونوميكالىق ينتەگراتسيانىڭ نەگىزى رەتىندە» پلەنارلىق سەسسياسى بولماق. كەزدەسۋگە ق ر پرەمەر-ءمينيسترىنىڭ ءبىرىنشى ورىنباسارى ءا. سمايىلوۆ قاتىستى.


سوڭعى جاڭالىقتار