قازاقستان پرەزيدەنتى قايىرىمدىلىق، ۆولونتەرلىك ۇيىمداردىڭ وكىلدەرىمەن كەزدەستى
مەملەكەت باسشىسى ءوز سوزىندە قايىرىمدىلىق پەن ۆولونتەرلىكتىڭ پاندەميا كەزىندە جالپىۇلتتىق سيپات العانىن اتاپ ءوتىپ، ونىڭ الەۋمەتتىك نورماعا اينالعانىن جانە حالىقتىڭ دۇرىس قابىلداعانىن ايتتى. قاسىم- جومارت توقايەۆ وسىنداي قيىن- قىستاۋ كەزدە سىرت قالماي، وتانداستارىنا كومەك قولىن سوزعان، مەيىرىمدىلىك، ىزگىلىك تانىتقان ءار ازاماتقا ريزاشىلىق ءبىلدىردى.
«اسار دەگەن اتا ءداستۇرىمىزدى ساقتاپ كەلە جاتقانىمىز قۋانتادى. پاندەميا كەزىندە دە ەرىكتىلەر ايانباي ەڭبەك ەتىپ، ەرەن ەرلىكتىڭ ۇلگىسىن كورسەتتى. ولار كۇندىز- ءتۇنى دارىگەرلەرمەن جانە ءتارتىپ ساقشىلارىمەن بىرلەسىپ، ىندەتپەن كۇرەستى. قايىرىمدى جاندار ورتاق ىسكە جان- جاقتى قولداۋ ءبىلدىردى. ەلباسىنىڭ باستاماسىمەن قۇرىلعان «ءبىز بىرگەمىز» قورىنىڭ جۇمىسىن ەرەكشە اتاپ وتكىم كەلەدى. بۇل يگى باستاماعا مىڭنان استام ازامات قارجىلاي ۇلەس قوستى. ءبىز وسىنداي ۇيىمشىلدىقتىڭ جانە جاۋاپكەرشىلىكتىڭ ارقاسىندا احۋالدى تۇراقتاندىرا الدىق. مۇنىڭ ءبارى - ەلدىكتىڭ جانە بەرەكە- بىرلىكتىڭ جارقىن كورىنىسى» ، - دەدى پرەزيدەنت.
قاسىم- جومارت توقايەۆ ۆولونتەرلىك قىزمەتتى دامىتۋ، قايىرىمدىلىق پەن مەتسەناتتىققا قولداۋ كورسەتۋ مەملەكەتىمىزدىڭ ۇزاق مەرزىمدى باسىمدىعى دەپ سانايدى. ۆولونتەرلىك ىسپەن اينالىسۋ - پاتريوتيزمنىڭ جارقىن كورىنىستەرىنىڭ ءبىرى. مەملەكەت باسشىسى جاريالاعان ۆولونتەر جىلى ازاماتتارىمىزدىڭ كوپشىلىگىن قايىرىمدى ءىس قوزعالىسى توڭىرەگىنە توپتاستىردى. قازاقستاندىقتاردىڭ ۇسىنىسى بويىنشا جاسالعان كوپتەگەن قايىرىمدىلىق جانە ۆولونتەرلىك جوبالار - سونىڭ دالەلى.
«قايىرىمدىلىققا تىكەلەي جانە جاناما تۇردە اتسالىساتىن ادامداردىڭ سانى تۇراقتى ارتىپ كەلە جاتقانىن كورىپ وتىرمىز. قىزمەتكەرلەردىڭ ۆولونتەرلىك جۇمىسىن ەڭبەك كىتاپشاسىنا مىندەتتى تۇردە تىركەۋ تۋرالى شەشىم قابىلداندى. بۇدان بولەك ۆولونتەرلىكپەن اينالىسقان جاستارعا ۋنيۆەرسيتەتكە، كوللەدجگە ءتۇسۋ كەزىندە ءبىرقاتار باسىمدىق بەرىلەدى. قازىرگى تاڭدا بۇل جاقسى ناتيجە دەپ ەسەپتەيمىن. بارشاڭىزدىڭ بۇعان ەلەۋلى ۇلەس قوسقاندارىڭىز ءسوزسىز» ، - دەدى قاسىم- جومارت توقايەۆ.
مەملەكەت باسشىسى ەرىكتىلەردىڭ، قايىرىمدىلىق قورلاردىڭ پاندەمياعا قارسى كۇرەس كەزىندە ۇلكەن ءرول اتقارعانىن ەسكەرە وتىرىپ، ب ۇ ۇ باس اسسامبلەياسى 75-سەسسياسىنىڭ جالپى ساياسي دەباتتارىندا ۆولونتەرلەردى جۇمىلدىرۋدىڭ حالىقارالىق كۇنىن جاريالاۋ تۋرالى ۇسىنعان باستاماسى قولداۋ تاۋىپ، جۇزەگە اساتىنىنا سەنىم ءبىلدىردى. ونىڭ پىكىرىنشە، قازاقستان ۆولونتەرلىك پەن قايىرىمدىلىقتى دامىتۋ ىسىندە وزىق حالىقارالىق ۇردىستەردەن قالىپ قويمايدى. ۆولونتەر جىلى وسى باعىتقا تىڭ سەرپىن بەردى.
«ۆولونتەرلىك قىزمەت وسى جىلمەن توقتاپ قالمايدى، الداعى ۋاقىتتا دا جالعاسا بەرەدى. ويتكەنى ۆولونتەرلىك قىزمەت مەملەكەتتىڭ الدىنا قويىپ وتىرعان ماقساتتارىمەن ۇندەسەتىن بولعاندىقتان، بۇل - رۋحتى كوتەرەتىن، حالىقتىڭ مۇڭ- مۇقتاجىن بولىسەتىن قوزعالىس»، - دەدى پرەزيدەنت.
قازىرگى ۋاقىتتا قاسىم- جومارت توقايەۆتىڭ تاپسىرماسى بويىنشا تۇسىنىكتى ءارى ءتيىمدى قۇقىقتىق مەحانيزمدەردى قامتيتىن قايىرىمدىلىق تۋرالى زاڭ ازىرلەنۋدە.
«قايىرىمدىلىق جانە ۆولونتەرلىك ۇيىمدار وزدەرىنىڭ ەڭبەك ەتۋىنە، سونىڭ ىشىندە مەملەكەتپەن جانە بيزنەسپەن بىرلەسە جۇمىس ىستەۋىنە قاجەتتى جاعداي جاسايتىن زاڭ جۇزىندە شىنايى مارتەبەگە يە بولۋى ءتيىس. ۇكىمەتكە بۇل ماسەلەنى پىسىقتاۋ تاپسىرىلدى. مەملەكەتتىك قىزمەت كورسەتۋدىڭ، ينفراقۇرىلىمدى پايدالانۋدىڭ، اقپاراتتىق قولداۋ كەزىندە جەڭىلدىكتەر بەرۋدىڭ ناقتى تەتىكتەرىن ازىرلەۋدىڭ ءمانى زور. سونىمەن قاتار سالىقتىق جەڭىلدىكتەر ماسەلەسى دە ماڭىزدى» ، - دەدى پرەزيدەنت. بۇگىندە قايىرىمدىلىق جوبالارعا باعىتتالعان ءىرى بيزنەس تابىسىن %3 جانە شاعىن جانە ورتا بيزنەس تابىسىن %4 كولەمدە سالىقتان بوساتۋ زاڭنامالىق تۇرعىدا قاراستىرىلعان. ءبىراق شاعىن جانە ورتا بيزنەس بۇل جەڭىلدىكتەردى پايدالانباي وتىر. قاسىم- جومارت توقايەۆ اتالعان جاعدايعا تالداۋ جاساپ، وسى باعىتتا ءتيىستى جۇمىس جۇرگىزۋگە تاپسىرما بەردى. بيزنەستىڭ قايىرىمدىلىققا قارجى اۋدارۋى ىڭعايلى ءارى ءتيىمدى بولۋعا ءتيىس.
«قايىرىمدىلىق قورلارعا قارجى ءتۇسۋىنىڭ جانە ونىڭ ءارى قاراي جۇمسالۋىنىڭ اشىق بولۋىن قامتاماسىز ەتۋ قاجەت. بۇل باعىتتا كۇڭگىرتتىككە جول بەرمەۋ كەرەك. قازىر قايىرىمدىلىق جاسايتىن ازاماتتار مەن كومەك الۋشىلاردىڭ رەەسترىن قۇرۋ باستاماسى ىسكە اسىرىلۋدا. بۇل مىندەتتىڭ بارىنشا ناقتى ورىندالۋىنا مۇمكىندىك جاساعان ءجون. قايىرىمدىلىق جوبالار ارقىلى وتەتىن بارلىق قارجىنىڭ جۇمسالۋىنا اقپاراتتىق جانە قوعامدىق باقىلاۋدى قامتاماسىز ەتۋ قاجەت» ، - دەدى مەملەكەت باسشىسى.
پرەزيدەنت جەكە قايىرىمدىلىقتىڭ بارلىق ءتۇرى دامۋى كەرەك دەپ سانايدى. ءار ادامنىڭ باستاما كوتەرىپ، ءوز قارجىسىن قايىرىمدىلىق ماقساتقا بولە الاتىن جۇيە قۇرىلۋعا ءتيىس.
«وكىنىشكە قاراي، ءتيىستى اقپاراتتىق جۇمىستار تالاپقا ساي جولعا قويىلماعان، ادامعا سەنىم ۇيالاتاتىن تەتىكتەر جاسالماعان. كەيدە بۇقارالىق اقپارات قۇرالدارىنان ازاماتتارىمىز كىمگە جانە قالاي كومەكتەسۋگە بولاتىنىن بىلمەيدى دەگەن اقپاراتتى ەستىپ قالامىز. ال ەگەر ازاماتتارىمىز مۇنداي جۇمىسپەن اينالىساتىن بولسا، ولاردىڭ قايىرىمدىلىق قارجىسى قاي ماقساتقا پايدالانىلاتىنىن ناقتى ءبىلۋ كەرەك»، - دەدى قاسىم- جومارت توقايەۆ.
ونلاين فورماتتا وتكەن كەزدەسۋدە «Birgemiz» قوعامدىق قورىنىڭ باسقارما ءتوراعاسى، «قازاقستاندىق «ۋ ا ق ى پ» قورى» كورپوراتيۆتىك قايىرىمدىلىق قورىنىڭ پرەزيدەنتى رۋسلان ساقيەۆ، «Kaspi Bank» ا ق باسقارما ءتوراعاسى ميحايل لومتادزە، «BTS Digital» ج ش س- ءنىڭ باسشىسى نۇرتاي ابىلعاليەۆ، «دارا» جەكە قورىنىڭ اتقارۋشى ديرەكتورى اينۇر ايمۇرزينا، «مەن الماتىلىقپىن» قوعامدىق بىرلەستىگىنىڭ جەتەكشىسى كونستانتين اۆەرشين، قازاقستان حالقى اسسامبلەياسىنىڭ مۇشەسى، ۆولونتەر نارگيزام ماحمۋدوۆا ءسوز سويلەدى. ولار بيزنەستىڭ الەۋمەتتىك جاۋاپكەرشىلىگى، قايىرىمدىلىق سالاسىن دامىتۋعا ىنتالاندىرۋ، قايىرىمدىلىق قىزمەتتىڭ اشىقتىعىن، ۆولونتەرلەردىڭ ءرولىن ارتتىرۋ جانە ۆولونتەرلىكتى دامىتۋ ماسەلەلەرىنە بايلانىستى ويلارىن ورتاعا سالدى. مەملەكەت باسشىسى ۇكىمەت جانىنداعى قايىرىمدىلىقتى دامىتۋ ماسەلەلەرى جونىندەگى كەڭەستە ايتىلعان بارلىق ماسەلەنى، باستامالاردى پىسىقتاۋعا، سونداي- اق، قازاقستان زاڭناماسىنا ءتيىستى وزگەرىستەر ەنگىزۋدى كەشىكتىرمەۋگە تاپسىرما بەردى. كەزدەسۋ سوڭىندا ءبىرقاتار ازامات پاندەميا كەزىندەگى قاجىرلى ەڭبەگى ءۇشىن «حالىق العىسى» مەدالىمەن ماراپاتتالدى.
