كۇيزەلىسكە تۇسپەۋ، سپورت، قۇنارلى تاعام: ۆيرۋس جۇقتىرماۋ ءۇشىن نە ىستەۋ كەرەك

None
None
نۇر- سۇلتان. قازاقپارات - استانا مەديتسينالىق ۋنيۆەرسيتەتى قالىپتى فيزيولوگيا كافەدراسىنىڭ مەڭگەرۋشىسى، پروفەسسور كۋرەيش حامچيەۆ كوروناۆيرۋس ينفەكتسياسىن جۇقتىرماۋ ءۇشىن ساقتىق شارالارى مەن يممۋنيتەتتى ارتتىرۋ جولدارىن ايتتى، دەپ حابارلايدى قازاقپارات ءتىلشىسى.

«كوروناۆيرۋسپەن كۇرەستىڭ ءبىرقاتار ءتيىمدى ادىستەرى بەلگىلى. سوندىقتان مۇندا ۇرەي مەن دۇربەلەڭگە جول بەرمەۋ قاجەت. ارينە، بۇل اۋرۋ ءالى زەرتتەلمەگەن، زەرتتەۋ جۇمىستارى ءالى جالعاسۋدا. دەگەنمەن، بولجامنىڭ وڭ بولاتىنىن ايتقىم كەلەدى، كوپ جاعدايدا ادامدار بۇل سىرقاتتان جازىلادى. تەك قاتار جۇرەتىن ىلەسپە اۋرۋلارى، قان اۋرۋلارى، يممۋندىق جانە ەندوكريندىك جۇيەسىندە اۋرۋى بار بار ادامدارعا قاۋىپ ءتونۋى مۇمكىن. الايدا، مۇنداي ناۋقاستار دا ەمدەلەدى، قازىر دە ەمدەلىپ جاتىر، ولاردىڭ قالىپتى جانە سالاۋاتتى ومىرگە ورالۋى ءۇشىن بارلىعى جاسالادى» ، - دەدى دارىگەر اگەنتتىك تىلشىسىنە بەرگەن سۇحباتتا.

ونىڭ ايتۋىنشا، ۆيرۋستار مەن زياندى باكتەريالار يممۋنيتەتى السىرەگەن، قورعانىس مۇمكىندىكتەرى تومەن اعزانى قوش كورەدى. سوندىقتان، ادامدار ءوز يممۋنيتەتىن كوتەرۋگە كۇش سالۋى ءتيىس.

«كەڭەس رەتىندە مۇمكىندىگىنشە سترەسستىك جاعدايلاردان اۋلاق بولۋدى، ۇرەيگە سالىنباۋدى ۇسىنامىن. تاعام راتسيونى اقۋىزعا، كومىرسۋلارعا جانە مايلارعا تولى بولۋى كەرەك، ەڭ الدىمەن ەت ونىمدەرى مەن جۇمىرتقانىڭ اعى، كوكونىستەر مەن جەمىستەر بولۋى كەرەك. قۋانىشقا وراي، قازىرگى ناۋقاندا ءزىمبىر، ليمون، الما، ءتۇرلى جيدەكتەر كوپ، ولار ءبىزدىڭ اعزامىزداعى يممۋنيتەتتىڭ جوعارىلاۋىنا پايدالى اسەر ەتەدى. بىرىنشىدەن، ۋاقىتىنان بۇرىن دۇربەلەڭ جاساماڭىز. ەكىنشىدەن، بەلسەندى ءومىر سالتى مەن دەنە شىنىقتىرۋدىڭ ءبىزدىڭ اعزامىزعا كۇش بەرەتىنىن ۇمىتپاڭىز. مەديتسينالىق تىلمەن ايتار بولساق، دەنە شىنىقتىرۋ كوڭىل- كۇيدى كوتەرەتىن، بۇلشىق ەتتەرىمىزدى، قان اينالىم جۇيەسى مەن جۇرەگىمىزدى نىعايتاتىن بيولوگيالىق بەلسەندى زاتتاردى، گورمونداردى كوپتەپ شىعارادى. ۇشىنشىدەن، تۇتاس كۇن مەن دەمالىس رەجيمىن بەكىتۋ كەرەك. وكىنىشكە قاراي، كارانتين جاعدايىندا ادامداردىڭ كوپشىلىگى تاڭنان كەشكە دەيىن تەلەديدار مەن گادجەت ارتىندا وتىرادى. مۇنى سترەسستىك جاعداي دەپ اتاۋعا دا بولادى، ويتكەنى ءبىز وسى دەرەككوزدەردەن كوپتەگەن جاعىمسىز اقپارات الامىز. ەلەكتروماگنيتتىك ساۋلەلەر اعزامىزدى السىرەتەدى. سوندىقتان جاقسى ۇيقى مەن تەلەديدار مەن كومپيۋتەرگە ازىراق ۋاقىت جۇمساۋ ماڭىزدى. كىتاپ وقىڭىز نەمەسە بالالارىڭىزبەن ۇستەل ويىندارىن ويناڭىز» ، - دەپ كەڭەس بەرەدى ك. حامچيەۆ.

سونىمەن بىرگە، دارىگەر وسىنداي كۇردەلى كەزەڭدە ينتەرنەتتە جاعىمسىز دەرەكتەردىڭ كوپتەپ تارالعانىن، راستالماعان اقپاراتقا سەنبەۋ قاجەتتىگىن باسا ايتتى.

«قالىپتى ءومىردى بۇزاتىن كەز كەلگەن فاكتور، اعزاعا ەنەتىن كەز كەلگەن اگەنت- ۆيرۋس نەمەسە باكتەريا - ءبىزدىڭ اعزامىز ءۇشىن سترەسس فاكتورى بولىپ سانالادى. اعزامىز دەرەۋ جۇمىسقا قوسىلادى دا بارلىق جۇيەلەر وسى فاكتوردان قورعانۋعا اسىعادى. ومىردە دە سونداي جاعداي بولادى: ادەتتەن تىس جاعدايدا نە ىستەۋ كەرەكتىگىن بىلمەيمىز. باستاپقىدا ابىرجۋ مەن دۇربەلەڭ پايدا بولادى، سودان كەيىن عانا ءبىراز ۋاقىتتان سوڭ، نە ىستەي الاتىنىمىزدى ءتۇسىنىپ، جوسپار قۇرا باستايمىز. اۋرۋ بەلگىلەرى بايقالعاندا دا، ۇرەيگە سالىنباڭىز. اعزاڭىز باستاپقىدا بار كۇشىن قورعانىسقا جۇمسايدى دا، كەيىنىرەك قالاي كۇرەسۋ قاجەتتىگىن جولعا قويادى. ءبىراز ۋاقىتتان كەيىن بارلىق سيمپتومدار باسىلۋى كەرەك. ال ەگەر كەرىسىنشە جاعداي ناشارلاپ، دەم الۋ قيىنداسا، كەۋدە تۇسى مەن بۋىندار اۋىرسا، دابىل قاعىپ، جەدەل جاردەم قىزمەتىن شاقىرۋ كەرەك»، - دەپ ءتۇسىندىردى ك. حامچيەۆ.

سوڭعى جاڭالىقتار