ب ۇ ۇ باس حاتشىسى: قايتىس بولعان ميلليون ادامنىڭ تاعدىرى ءبىزدى ويلاندىرۋى كەرەك
ول ءۇشىن ادامدار ءبىر- بىرىمەن ىنتىماقتاسىپ، عالىمداردى تىڭداۋ، تەرىس اقپارات تاراتپاۋ، قاشىقتىقتى ساقتاۋ، ماسكا تاعۋ جانە قول جۋۋ سياقتى تالاپتاردى مۇلتىكسىز ورىنداۋى كەرەك. بۇل تۋرالى قازاقپارات ب ۇ ۇ جاڭالىقتار ورتالىعىنا سىلتەمە جاساپ حابارلايدى. د د س ۇ مالىمەتىنشە، كوروناۆيرۋس ينفەكتسياسىنان قايتىس بولعانداردىڭ سانى ميلليون ادامنان اسقان.
«ءبىز قورقىنىشتى شەكتەن اسىپ كەتتىك: COVID-19 پاندەمياسى ميلليون ادامنىڭ ءومىرىن قيىپ كەتتى. بۇل سان ۇرەي تۋدىرادى. بۇل بىرەۋدىڭ اكەسى مەن اناسى، ايەلى مەن ەرى، اعاسى مەن اپكەسى، دوسى جانە ارىپتەسى»، - دەدى گۋتەرريش.
«COVID-19 ميلليونداعان ادامنىڭ ءومىرىن وزگەرتىپ قانا قويماي، دۇنيەگە كەلگەن كۇنىن اتاپ وتۋگە نەمەسە قىمباتتى ادامدارىمىزدى سوڭعى ساپارعا شىعارىپ سالۋ مۇمكىندىگىنەن ايىردى» - دەپ اتاپ ءوتتى ب ۇ ۇ باسشىسى.
«پاندەميانىڭ سوڭى كورىنبەيدى» ، - دەپ ەسكەرتتى باس حاتشى. بۇل ادامدار ءالى دە جۇمىستان ايىرىلىپ، ءبىلىم الۋدان قول ۇزەتىنىن، قالىپتى ومىرگە ورالا المايتىنىن بىلدىرەدى. سوندا دا بولسا، انتونيۋ گۋتەرريش ءبىزدىڭ ۆيرۋستى جەڭىپ شىعا الاتىنىمىزعا سەنىمدى. ونىڭ ايتۋىنشا، كوشباسشىلاردىڭ جاۋاپكەرشىلىگى، عىلىمي قادام، ىنتىماقتاستىق پەن سەنىمدى اقپارات بۇگىندە ەرەكشە ماڭىزدى.
«ۆاكتسينانى دايىنداۋ جۇمىستارى جۇرگىزىلگەنشە، ادامداردىڭ ءومىرىن قۇتقارۋ ءۇشىن قولدان كەلەتىننىڭ ءبارىن جاسايىق: فيزيكالىق قاشىقتىقتى ساقتاپ، ماسكا تاعىپ، قول جۋايىق»، - دەپ ۇندەدى باس حاتشى.