ىشكى ىستەر ءمينيسترى كارانتين شارالارىن كۇشەيتۋگە دايىن ەكەندىگىن ايتتى

نۇر- سۇلتان. قازاقپارات - ىشكى ىستەر ءمينيسترى ەرلان تۇرعىمبايەۆ قۇقىق قورعاۋ ورگاندارى ەلدە كارانتين رەجيمىن كۇشەيتۋگە دايىن ەكەنىن مالىمدەدى، دەپ حابارلايدى قازاقپارات ءتىلشىسى.

ەرلان تۇرعىمبايەۆتىڭ ايتۋىنشا ىشكى ىستەر ورگاندارى كارانتين رەجيمىن كۇشەيتىپ، ەلدەگى قوعامدىق ءتارتىپتى ساقتاۋعا دايىن.

«قازىرگى تاڭدا ءبىزدىڭ مينيسترلىك دەنساۋلىق ساقتاۋ سالاسىنىڭ ورگاندارىنا كارانتيندىك جانە شەكتەۋ شارالارىنىڭ ساقتالۋىنا كومەكتەسىپ كەلەدى. بۇل ماقساتتا كۇن سايىن 10 مىڭنان اسا پوليتسەي، ۇلتتىق ۇلان ساربازدارى مەن ۆولونتەرلار جۇمىس ىستەۋدە. ەكى وبلىستاعى باس سانيتارلىق دارىگەردىڭ قاۋلىسىنا سايكەس، ەكى ايماقتا ءتورت بلوك- پوست پەن ەكى سانيتارلىق پوست قويىلدى. سونىمەن بىرگە پوليتسيا 299 كارانتين نىسانىن باقىلاۋدا ۇستاپ وتىر. سونىمەن بىرگە، مەديتسينالىق مەكەمەلەردىڭ سۇراۋى بويىنشا كوروناۆيرۋس جۇقتىرعان ازاماتتارمەن بايلانىستا بولعان ازاماتتاردى انىقتاپ جاتىرمىز»، - دەدى ەرلان تۇرعىمبايەۆ ۇكىمەت وتىرىسىندا.

ونىڭ ايتۋىنشا بۇعان دەيىن پوليتسيا قىزمەتكەرلەرى دەنساۋلىق ساقتاۋ سالاسىنىڭ ماماندارى جانە جەرگىلىكتى اتقارۋشى ورگانداردىڭ وكىلدەرىمەن بىرگە ەل ىشىندە 5 مىڭنان استام بىرلەسكەن رەيد جۇرگىزگەن. وسىنىڭ ارقاسىندا كارانتين رەجيمىن بۇزۋدىڭ 28 مىڭ جاعدايى انىقتالعان. ونىڭ 4600 جاعدايى ساۋدا ورتالىقتارىندا، دۇكەندەر مەن بازارلاردا تىركەلسە، 1700 فاكت مەيرامحانالار مەن باسقا دا تاماقتانۋ ورىندارىندا بولعان.