اسقار مامين سانيتاريا رەجيمىن بۇزۋدىڭ كەز كەلگەن جاعدايىنىڭ جولىن كەسۋ قاجەتتىگىن ەسكەرتتى

نۇر- سۇلتان. قازاقپارات - ۇكىمەت باسشىسى اسقار مامين ەلدە كوروناۆيرۋس ينفەكتسياسىنىڭ قايتادان ءورشىپ كەتپەۋى ءۇشىن ءبىرقاتار شارا قابىلداۋدى تاپسىردى، دەپ حابارلايدى قازاقپارات ءتىلشىسى.

«جالپى ەلدەگى سانيتاريالىق- ەپيدەميولوگيالىق جاعداي تۇراقتالدى. ۆيرۋستىڭ رەپرودۋكتيۆتىك دەڭگەيى 0,93 قۇراپ وتىر. بۇل قابىلدانىپ جاتقان شارالاردىڭ تيىمدىلىگىن كورسەتەدى. دەگەنمەن الەمدە جانە ءبىرقاتار شەكارا ماڭىنداعى ەلدەردەگى ەپيدەميانىڭ تۇراقسىزدىعىن ەسكەرىپ، ءبىز سانيتاريالىق تالاپتاردى ساقتاۋ شارالارىن كۇشەيتۋىمىز قاجەت»، - دەدى اسقار مامين ۇكىمەت وتىرىسىندا.

ۇكىمەت باسشىسى جاۋاپتى مينيسترلىكتەرگە مىنا ماسەلەلەرگە نازار اۋدارۋدى تاپسىردى.

«بىرىنشىدەن، مۇددەلى مەملەكەتتىك ورگاندار مەن وڭىرلەردىڭ اكىمدىكتەرى سانيتاريالىق- ەپيدەميولوگيالىق ءىس- شارالاردىڭ 100 پايىز دايىندىعىن قامتاماسىز ەتسىن. دەنساۋلىق ساقتاۋ مينيسترلىگى كوشپەلى مەديتسينالىق كەشەندەر مەن جەدەل جاردەم اۆتوكولىكتەرىن، قاجەتتى تەحنيكا مەن جابدىقتى، جەكە قورعانۋ قۇرالدارىن ساتىپ الۋىن قامتاماسىز ەتىپ، ولاردى 15-قازان ايىنا دەيىن وڭىرلەرگە بەرۋ بويىنشا بارلىق قاجەتتى شارالاردى قابىلداسىن. ەكىنشىدەن، ىشكى ىستەر مينيسترلىگى مەن دەنساۋلىق ساقتاۋ مينيسترلىگى اكىمدىكتەرمەن بىرگە سانيتاريالىق تالاپتاردىڭ ساقتالۋىن باقىلايتىن مونيتورينگ توپتارىنىڭ جۇمىسىن كۇشەيتسىن»، - دەدى ول.

اسقار مامين سونىمەن قاتار سانيتاريا رەجيمىن بۇزۋدىڭ كەز كەلگەن جاعدايىنىڭ جولىن كەسۋ قاجەتتىگىن ەسكەرتتى.

«ۇشىنشىدەن، دەنساۋلىق ساقتاۋ مينيسترلىگىنىڭ قازاقستانعا كەلەتىن ازاماتتاردى سانيتاريالىق- كارانتيندىك باقىلاۋعا الۋدى كۇشەيتۋ جونىندەگى ۇسىنىستارىن ۆەدومستۆوارالىق كوميسسيادا قاراۋدى تاپسىرامىن. تورتىنشىدەن، دەنساۋلىق ساقتاۋ مينيسترلىگى، «سك- فارماتسيا» جانە اكىمدىكتەرمەن بىرلەسىپ، مەديتسينا ۇيىمدارىندا جانە ءدارىحانالاردا دارىلىك زاتتاردىڭ جانە جەكە قورعانۋ قۇرالدارىنىڭ بولۋىن قامتاماسىز ەتسىن. وڭىرلەردە دارىلىك پرەپاراتتاردىڭ باعالارىنا باقىلاۋ جۇرگىزۋ قاجەت»، - دەدى ول.