الەكسەي سوي ساقتىق شارالارى جايلى: حالىق بوساڭسىپ بارادى

نۇر- سۇلتان. قازاقپارات - دەنساۋلىق ساقتاۋ ءمينيسترى الەكسەي سوي قاۋىپسىزدىك شارالارى بويىنشا ايماق باسشىلارىنان ءتۇسىندىرۋ جۇمىستارىن كۇشەيتۋدى سۇرادى، دەپ حابارلايدى قازاقپارات ءتىلشىسى.

«ەلدەگى ەپيدەميولوگيالىق جاعدايدىڭ تۇراقتالۋىمەن بىرگە حالىقتىڭ ساقتىعى السىرەپ بارا جاتقانىن بايقاپ وتىرمىز. ماسكا تاعۋ مەن الەۋمەتتىك قاشىقتىق رەجيمى ساقتالا بەرمەيدى. وسىنىڭ سالدارى ەلدە كوروناۆيرۋس جۇقتىرعان ازاماتتاردىڭ سانىنىڭ ارتىپ، كارانتين شارالارىن كۇشەيتۋگە الىپ كەلۋى مۇمكىن. قازىر مۇنداي جاعدايدى ءبىرقاتار مەملەكەتتەن كورىپ وتىرمىز»، - دەدى الەكسەي سوي ۇكىمەت وتىرىسىندا.

ءمينيستردىڭ ايتۋىنشا، ايماقتارعا بۇعان دەيىن ءبىرقاتار رەيد جۇرگىزىلگەن.

«سول رەيدتەردەن بايقاعانىمىزداي، كارانتين رەجيمىنىڭ السىرەۋىمەن بىرگە كارانتين ءتارتىبىن بۇزۋ جاعدايلارى 34 پايىزدان 47 پايىزعا دەيىن ارتتى. كارانتين ءتارتىبىن بۇزۋ جاعدايى ون وڭىردە بايقالدى. 5-27-قىركۇيەك ارالىعىندا ماسكا رەجيمىن ساقتاماعانى ءۇشىن 1130 ادام جازالاندى. وسىعان بايلانىستى ايماق باسشىلارى نىسانداردا ماسكا رەجيمىنىڭ ساقتالۋىن قاداعالاپ، ەلگە ءتۇسىندىرۋ جۇمىستارىن كۇشەيتسە دەيمىز»، - دەدى ول.