تۇركياعا ساياحاتتاپ باراتىن قازاقستان ازاماتتارى نەنى ەسكەرۋى ءتيىس؟

None
None
نۇر-سۇلتان. قازاقپارات - وتانداستارىمىزدىڭ جەرورتا تەڭىزىنىڭ جاعالاۋىنا دەگەن قىزىعۋشىلىعى پاندەميا كەزىندە دە سەيىلگەن جوق، دەپ حابارلايدى «حابار 24».

قازىر ازاماتتارىمىز اسىرەسە ىستامبۇلدا تىنىققاندى ءجون كورەدى. تۇرىك تاراپى ەلگە ساياحاتتاپ كەلەتىن شەتەل ازاماتتارىنان كوروناۆيرۋس جۇقتىرماعاندىعى جونىندە سىناما تالاپ ەتپەيدى. اۋەجايدا دەنە قىزۋى ولشەنىپ، 38 دەن جوعارى ادامدار عانا تەست تاپسىرادى. ەگەر اۋرۋ بەلگىلەرى بولسا، تىكەلەي اۋرۋحاناعا جاتقىزىلادى. كلينيكالىق بەلگىلەرى جوق تاسىمالداۋشىلار قوناق ۇيلەرىندە نەمەسە ارنايى مەكەندەردە 14 كۇنگە وقشاۋلانادى. سوندىقتان كوروناۆيرۋسقا الدىن الا تەكسەرىلىپ العانىڭىز ءجون. شاھاردىڭ بارلىق جەرلەرىندە ماسكامەن ءجۇرۋ مىندەتتى. ەرەجە بۇزۋشىلارعا 50 مىڭ تەڭگە كولەمىندە ايىپپۇل قاراستىرىلعان.

ىستامبۇلدا تۋريستەردىڭ العاشقى ايالداماسى - سۇلتاناحمەت الاڭى. مۇنداعى مۇراجايلاردىڭ دەنى اشىق. تەك ايا- سوفيا مۋزەيى مەشىت مارتەبەسىنە اۋىسقان. سوندىقتان ايا- سوفياعا كىرۋ اقىسىز. بۇرىن بيلەت قۇنى 10 تەڭگە بولاتىن. مەشىت بولعاندىقتان، قىز- كەلىنشەكتەر باستى جاۋىپ كىرۋى ءتيىس. قىسقا كيىمدەرمەن كىرۋگە تىيىم سالىنعان. كىرە بەرىستە درەسكودتى ساتىپ الۋعا بولادى. ايا- سوفيانىڭ قازىرگى مارتەبەسىنە نارازى تۋريستەر دە بار. ولاردىڭ ايتۋىنشا، مەشىتكە اينالعان سوڭ، ءبىرقاتار يكونداردىڭ ءۇستى جابىلعان. دەگەنمەن ساياحاتتاپ كەلۋشىلەردىڭ ءبىر بولىگى وزگەرىسكە ءدان ريزا.

دينارا بولەكەنوۆا، قازاقستاندىق تۋريست:

- مۇراجاي مەشىتكە اينالىپ، تەگىن ىشكە كىرىپ، قاسيەتتى مەكەنگە الاقان جايىپ جاتىر. بىزگە قاتتى ۇنادى. وتكە كەرەمەت اسەر الىپ وتىرمىز.

شاھاردا بارلىق ساۋدا ورىندارى مەن اسحانالار اشىق. ارينە، پاندەميا كەسىرىنەن جابىلىپ قالعاندارى دا بار. قوناقۇيلەردىڭ باعاسى وتكەن جىلمەن سالىستىرعاندا تومەن. دەگەنمەن الدىن الا باراتىن مەكەن جايدىڭ جۇمىس ىستەپ تۇرعانىن تەكسەرىپ العان دۇرىس. سوڭعى كۇندەرى ەلدە ەپيدەمولوگيالىق جاعداي ءورشىپ بارادى. تاۋلىگىنە مىڭ جارىمعا جۋىق كوروناۆيرۋس جۇقتىرۋ دەرەگى تىركەلەدى. الايدا ماماندار ىستامبۇلدا جاعداي تۇراقتى دەپ سەندىرەدى. مەملەكەتتىك مەكەمەلەردىڭ جۇمىس كەستەسىنە وزگەرىس ەنگىزىلگەن. ونداعى ماقسات - جولداعى كەپتەلىس پەن قوعامدىق كولىكتەگى قاربالاستى ازايتۋ.


سوڭعى جاڭالىقتار