تۇركىستان وبلىسىندا ماقتا تيەلگەن كاماز تۇگى قالماي جانىپ كەتتى
29-قىركۇيەك ساعات 08:40 شاماسىندا بايدىبەك پوليتسياسىنىڭ كەزەكشى بولىمىنە ەكپىندى اۋىلىنان وتەتىن سامارا- شىمكەنت تاسجولىندا كاماز اۆتوكولىگىنىڭ ورتەنىپ جاتقانى جونىندە حابارلاما كەلىپ ءتۇستى. اتالعان حابارلاما بويىنشا تەز ارادا وقيعا ورنىنا جەدەل- تەرگەۋ توبى جەتتى. ءتارتىپ ساقشىلارىنىڭ تەكسەرۋ بارىسىندا انىقتاعانى:
قازىعۇرت اۋدانىنىڭ تۇرعىنى ءوزىنىڭ باسقارۋىنداعى كاماز جۇك كولىگىنە قوسىمشا جالعانعان جۇك تيەگىشىمەن 12 توننا ماقتا ارتىپ كەلە جاتقان. ءبىر كەزدە سىرتتان ادامدار توقتاتىپ، كولىكتەن ءتۇتىن شىعىپ جاتقانىن ايتادى. سودان بىردەن كولىكتى توقتاتقان جۇرگىزۋشى ءتۇسىپ قاراسا، جۇك تيەگىشتەگى ماقتا وتقا ورانىپ جاتىر ەكەن. وسىلايشا بىردەن ءورت سوندىرۋشىلەرگە حابار بەرەدى. سول جەردەگى جولاۋشىلاردىڭ كومەگىمەن جۇك كولىگىنىڭ ارتىنا جالعانعان جۇك تيەگىشى اجىراتىپ الىنادى. ءورت سالدارىنان جۇك كولىگى التى توننا ماقتامەن تولىق ورتەنىپ كەتكەن. ال، قالعان التى توننا ماقتاداعى ەندى باستالعان جالىندى ءورت سوندىرۋشىلەر اۋىزدىقتادى. اتالعان جايت كەزىندە ەشكىم زارداپ شەككەن جوق.