حالىقارالىق ىزدەۋدە جۇرگەن كۇدىكتى اقمولا وبلىسىندا ۇستالدى

كوكشەتاۋ. قازاقپارات - اۋىر قىلمىس جاساعانى ءۇشىن حالىقارالىق ىزدەۋدە جۇرگەن كۇدىكتى اقمولا وبلىسىندا ۇستالدى، دەپ حابارلايدى قازاقپارات ءتىلشىسى وبلىستىق پ د باسپا ءسوز قىزمەتىنە سىلتەمە جاساپ.

ۆەدومستۆونىڭ مالىمەتىنشە، 18- اقپاندا ارشالى اۋداندىق پ ب كەزەكشىلىك بولىمىنە يجيەۆسك اۋىلىنىڭ تۇرعىنى 86 جاستاعى ايەل ادام ارىزدانعان. قاريانىڭ سوزىنشە، بۇرىن تانىس ەر ادام ونىڭ دەنەسىنە زالال كەلتىرگەن جانە قورقىتىپ، 70 مىڭ تەڭگەسىن جانە «BQ» ماركالى ۇيالى تەلەفونىن الىپ كەتكەن.

«18- اقپاندا ساعات 17:00 شاماسىندا يجيەۆسك اۋىلىندا ماس كۇيدەگى كۇدىكتى بىرەۋدىڭ مۇلكىن ۇرلاۋ ماقساتىندا قاريانىڭ ۇيىنە بارعان. اجەيدىڭ جالعىز تۇراتىنىن بىلگەن ول الدىمەن ونى الداپ ۇيگە كىرىپ، تەمىر ەسىكتى ىشىنەن جاۋىپ الادى. قاريانى ساباپ، وتۆەرتكامەن قورقىتادى. كەيىن گاز پليتاسىنداعى گاز بالوننىن جۇلىپ الىپ «ءۇيدى ورتەيمىن» دەپ اقشا جانە التىن بۇيىمداردى بەرۋدى تالاپ ەتەدى. زارداپ شەگۋشى قورىققاندىقتان 70 مىڭ تەڭگەسىن بەرەدى. ەر ادام بۇنىمەن قويماي، تەلەديداردىڭ كابەلىمەن قاۋقارسىز قاريانىڭ اياق-قولىن بايلاپ سوققىلايدى. وتۆەرتكامەن مويىن تۇسىنان جاراقات سالادى. ارتىنشا ۇستەلدىڭ ۇستىندەگى ۇيالى تەلەفوندى الىپ، كەتىپ قالادى»، - دەيدى ۆەدومستۆودان.

وسىعان بايلانىستى ق ر ق ك 192- بابىنىڭ 2- بولىگى «قاراقشىلىق» بويىنشا ءىس قوزعالادى.

ەكى كۇننەن كەيىن ارشالى اۋداندىق سوتى كۇدىكتىگە قاتىستى «قاماۋدا ۇستاۋ» تۋرالى سانكتسيا قولدانادى. كۇدىكتىگە ىزدەۋ جاريالانادى.

«جەدەل ىزدەستىرۋ شاراسى كەزىندە 27- قىركۇيەكتە 49 جاستاعى كۇدىكتى سەلينوگراد اۋدانىنىڭ قوياندى اۋىلىنىڭ اۋماعىندا قولعا ءتۇسىپ، ۋاقىتشا ۇستاۋ وقشاۋلاعىشىنا قامالدى. انىقتالعانداي، كۇدىكتى جەرگىلىكتى فەرمالاردىڭ بىرىندە وزگە قۇجاتپەن جۇمىس ىستەگەن»، - دەپ تولىقتىردى ۆەدومستۆودان.