وسكەمەن تۇرعىنى ويىنشىق تاپانشامەن دۇكەن تونادى

وسكەمەن. قازاقپارات - وسكەمەندە بەلگىسىز ادام ويىنشىق تاپانشامەن گۇل ساتاتىن دۇكەنگە قاراقشىلىق شابۋىل جاسادى، دەپ حابارلايدى قازاقپارات ءتىلشىسى.

«پوليتسيا قىزمەتكەرلەرى گۇل ساتاتىن دۇكەننىڭ ساتۋشىسىن تاپانشاعا ۇقساس زاتپەن قورقىتىپ، كاسسادان 40 مىڭ تەڭگە الىپ، بوي تاسالاعان كۇدىكتى ەر ادامدى ۇستادى. ساتۋشى قىلمىس جاسالعانى تۋرالى پوليتسياعا حابارلاعان. دۇكەن ىشىندە ۆيدەوكامەرا بولماعان. دەگەنمەن، «سەرگەك» اپپاراتتىق- باعدارلاما كەشەنىنىڭ جانە زارداپ شەگۋشىنىڭ كۇدىكتىنى سيپاتتاپ بەرۋىنىڭ ارقاسىندا وسكەمەن قالالىق پ ب كريمينالدىق پوليتسيا ءبولىمىنىڭ قىزمەتكەرلەرى ونى انىقتاپ، ۇستادى. ۇستالعان ادامنان قارا ءتۇستى ويىنشىق تاپانشا مەن اقشا قاراجاتى تاركىلەندى»، - دەدى وسكەمەن قالالىق پوليتسيا باسقارماسى باستىعىنىڭ ورىنباسارى عالىمبەك تۇرىسبەكوۆ.

پوليتسيا باسقارماسىنىڭ مالىمەتىنشە، ۇستالعان 40 جاستاعى قالا تۇرعىنىنا قاتىستى ق ر قىلمىستىق كودەكسىنىڭ 192-بابىمەن سوتقا دەيىنگى تەرگەۋ جۇرگىزىلىپ جاتىر.

اۆتور: مارلان جيەمباي