ەمحاناعا تىركەلۋدىڭ ءۇش ءتاسىلى قانداي - مامان جاۋابى
«ءبىرىنشى ءتاسىل - ەمحانانىڭ تىركەۋ بولىمىنە بارىپ، تىركەۋ تۋرالى ءوتىنىش جازۋ. بۇل ءتاسىل جاسى بويىنشا زەينەتكە شىققان زەينەتكەرلەرگە، مۇمكىندىگى شەكتەۋلى ادامدارعا، بالالارعا، ونىڭ ىشىندە شەت مەملەكەتتەردە تۋعان بالالارعا، سابيلەر ۇيلەرىندە تۇراتىن بالالارعا، جەتىمدەرگە، سوتتالعاندارعا، كولونيالاردا جازاسىن وتەۋشىلەرگە جانە مەدرەسەدە وقيتىندارعا، مەرزىمدى قىزمەتتەگى اسكەري قىزمەتشىلەرگە نەمەسە سەنىمحات بويىنشا تىركەلۋدى رەسىمدەۋشىلەرگە عانا قولجەتىمدى. ول ءۇشىن سىزگە جەكە كۋالىك، ءتولقۇجات نەمەسە تۇرۋعا رۇقسات قۇجاتى قاجەت. ەگەر ءسىز 18 جاسقا دەيىنگى بالانى ەمحاناعا تىركەتكىڭىز كەلسە، بالانىڭ جانە ونىڭ زاڭدى وكىلىنىڭ - اناسىنىڭ، اكەسىنىڭ نەمەسە قامقورشىسىنىڭ جەكە باسىن كۋالاندىراتىن قۇجاتتارىن ۇسىنۋ قاجەت»، - دەيدى ايناگۇل داۋلەتشينا.
ونىڭ ايتۋىنشا ەكىنشى ءتاسىل - حالىققا قىزمەت كورسەتۋ ورتالىعى (ح ق ك و) ارقىلى ەمحاناعا تىركەۋگە ءوتىنىم بەرۋ. ول ءۇشىن وزىڭىزبەن بىرگە جەكە كۋالىك، ءتولقۇجات نەمەسە تۇرۋعا رۇقسات قۇجاتى بولۋى قاجەت. ءوتىنىمنىڭ وڭدەلۋ مەرزىمى - ءبىر جۇمىس كۇنى.
«ءۇشىنشى ءتاسىل - ۇيدەن شىقپاي ەمحاناعا تىركەلۋ. ياعني، سىزگە ەلەكتروندى ۇكىمەت پورتالى ارقىلى ءوتىنىم بەرۋ جەتكىلىكتى. ول ءۇشىن الدىمەن سايتتىڭ باستى بەتىندەگى «دەنساۋلىق ساقتاۋ» ءبولىمىن تاڭداڭىز. سودان كەيىن «مەديتسينالىق كومەك» قوسىمشا بەتىندەگى «مەديتسينالىق- سانيتاريالىق العاشقى كومەك كورسەتەتىن مەديتسينالىق ۇيىمعا تىركەلۋ» قىزمەتىنە باسىڭىز. «قىزمەتكە ونلاين تاپسىرىس بەرۋ» باتىرماسىن باسىڭىز. ودان سوڭ تىركەلۋگە سۇرانىس جىبەرۋ ءۇشىن جاسىل بەلگىمەن بەلگىلەنگەن بارلىق تارماقتاردى تولتىرۋ قاجەت. سۇرانىستى ءساتتى جىبەرگەننەن كەيىن ءسىز «سۇرانىم وڭدەلۋدە» مارتەبەسىن كورەسىز. تاڭداعان ەمحاناڭىزعا تىركەلۋ تۋرالى جاۋاپ ءسىزدىڭ جەكە كابينەتىڭىزگە ءبىر جۇمىس كۇنى ىشىندە كەلەدى»، - دەيدى ول.
اۆتور: ايان بەكەن ۇلى